18
Luhanga naafubila Bbabbu̱looni̱
1 Haanu̱ma yʼeki naabona malai̱ka onji naalu̱gha mu eghulu, Luhanga amuhaaye bu̱toki̱ bwamaani̱. Kyeleeli̱ kya ki̱ti̱i̱ni̱sa ekyamu̱lu̱ghaghʼo kyabbeneli̱ya kimui nsi yoona. 2 Aabu̱gha nʼelaka lyamaani̱ ati,
“Kyegengi̱ye! Kyegengi̱ye kibugha kikulu Bbabbu̱looni̱!
Kyafooki̱ye ka ya bi̱li̱mu̱,
ki̱i̱kalo kya mi̱li̱mu̱ yoona,
ki̱i̱kalo kya bu̱li̱ noni̱ eghi ebhi̱i̱hi̱ye kandi eghi boohi̱ye.
3 Nanga mahanga ghoona ghaatamiiye
vi̱i̱ni̱ ya bubhi bwa bu̱syani̱ bwa kibugha eki,
kandi bakama baa munsi basyane nakiyo,
na basu̱u̱bu̱li̱ baa munsi baaguudhaliiye kimui haabwa etunga eli baahi̱ye
mu kweghomba kwamaani̱ kwa kibugha eki.”
4 Niibuwo naaghu̱u̱ye eleka linji ndi̱lu̱gha mu eghulu ndighila liti,
“Enu̱we bantu banje, mu̱lu̱ghe mu kibugha eki,
naanu mutaba mu bibhi bya kibugha eki,
kandi mutaba mu bifubilo byamaani̱ kya kibugha eki.
5 Bibhi bya kibugha eki bi̱hu̱ni̱ki̱ye ku̱hi̱ka mu eghulu,
kandi Luhanga aasu̱ki̱ye bubhi bwakiyo.
6 Mukikolʼo ngoku kyakoli̱ye bantu banji,
kandi mukyongelemu kabili haabwa eki kyakoli̱ye,
kiikopo kya vi̱i̱ni̱ esaaliiye eghi kyabanweseei̱ye,
enu̱we mukyongelemu kabili.
7 Ngoku kyonini kyehaaye ki̱ti̱i̱ni̱sa kandi kyakala mu kweghonja,
haaliikuwo naanu mwakisaali̱ja kandi mwaki̱tu̱ntu̱li̱ya mutiyo.
Nankabha kiba nki̱bu̱gha mu mutima ghwakiyo ngu,
‘Nsitami̱ye nga mukamakali̱, tandi mu̱kwi̱si̱ya,
kubona-bona taku̱ku̱mpi̱kʼo.’
8 Bhaatu bifubilo byakiyo ebi bi̱li̱ki̱hi̱ki̱lʼo mu kilo kimui:
lu̱ku̱, kubona-bona na njala yamaani̱,
kandi mulilo ghu̱li̱kyoki̱ya,
nanga Mukama wa Bu̱toki̱ Bwona
niiye ali̱twi̱la kibugha eki musango.”
9 “Ti̱ bakama baa munsi abaasyane kandi abeeghonji̱ye na kiyo, balilila haabwa kiyo kandi batuntule munu obu balibona mwi̱ka ghwa kibugha eki ngucuuka. 10 Balyemilila haseli̱ye, boobai̱ye haabwa kubona ngoku bakukibona-boni̱ya, kandi balighila bati,
“Ai̱ bhaawai̱! Ai̱ bhaawai̱! Uwe kibugha kikulu!
Uwe kibugha kyamaani̱ Bbabbu̱looni̱!
Kifubilo kyaku̱hi̱kʼo mu saaha emui yonkaha.”
11 “Basu̱u̱bu̱li̱ baa munsi balilila kandi beeghala-ghale haabwa kibugha eki, nanga taaliyo muntu nʼomui oghu alyeyongela kubaghulʼo bintu byabo. 12 Bintu nga: feeja, jaabbu, bubaale bwa bbei̱ yamaani̱, bukwanji bwa muhendo, ngoye sisemeleeye kimui, ngoye siimutuku sya bbei̱, biti byona ebikusasa kulungi. Bintu byona ebi̱koleeu̱we mu maano ghaa njoghu̱, bintu byona ebi bakoli̱ye mu mbaau, mu bintu ebi̱gu̱mi̱ye, mu byoma bi̱gu̱mi̱ye na mabaale aghakubbyokelela; 13 ebyoku̱nu̱li̱ya mukubi, bubbani̱, miila, bubbani̱ bwa muhendo, vi̱i̱ni̱, mafuta, buhunga, ngano, nte, ntaama, nkai̱na na bigaali̱ byasiyo, hamui na basyana, aba baaghu̱li̱yagha.
14 “Maghobo agha mutima ghwawe ghwangubbali̱ye, ghaahooyʼo,
kandi byona ebi weepanki̱i̱si̱yagha hamui na ki̱ti̱i̱ni̱sa kyawe
waabifeeleeuwe, tookutodha kubibona!”
15 “Basu̱u̱bu̱li̱ baa bintu ebi, aba etungo lya kibugha eki lyaguudhaai̱ye, balyemilila hambali haseli̱ye, boobahi̱ye baboone ngoku kikwete kubona-bona, batuntuuye kandi mbalila bati,
16 “Ai̱ bhaawai̱! Ai̱ bhaawai̱! Kibugha kikulu,
ekyalu̱walagha lughoye lusemeeye, lwa langi̱ esemeeye kandi mutuku,
ekyalu̱walagha bintu bi̱koleeu̱we mu feeja, bubaale bwa bbei̱ yamaani̱ na bukwanji bwa muhendo!
17 Buguudha obu bwona baabu̱hwelekeleei̱ye mu saaha emui yonkaha.”
“Kandi bakama baa maati̱, na abakughendelaghamu, na balu̱ki̱ baaghʼo, nʼabakusuubulilagha haa nanja balyemilila haseli̱ye, 18 mbalilila kimui haabwa kubona mwi̱ka ghwa kibugha eki ngucuuka, balyebu̱u̱li̱ya bati,
“Ni kibugha ki ekyabaagha kyengaane na kibugha kikulu eki?”
19 “Balyeseesa ki̱tu̱u̱tu̱ haa mituwe. Bwile obu baliba mbaghana, batuntuuye kandi mbalila bati,
“Ai̱ bhaawai̱! Ai̱ bhaawai̱! Kibugha kikulu,
ekyaguudhai̱ye boona abaabaagha na maati̱ haa nanja!
Baaki̱hwelekeleei̱ye mu saaha emui yonkaha!”
20 Niibuwo malai̱ka aaghi̱li̱ye ati,
“Enu̱we abʼomu eghulu mudheedhuwe, nanga Luhanga aahwelekeleei̱ye kibugha Bbabbu̱looni̱.
Enu̱we bantu baa Luhanga, bakwenda, na balangi̱ mudheedhuwe.
Nanga Luhanga aahaaye kibugha eki kifubilo haabwa ebi baakoli̱yʼo enu̱we!”
21 Niibuwo malai̱ka wamaani̱ aahi̱mbi̱ye kibaale kiinamu̱li̱to aakikuba mu nanja, aaghila ati,
“Bbabbu̱looni̱ kibugha kikulu
niikuwo balikigenga hansi na maani̱ batiyo,
kandi takilitodha kuboneka.
22 Malaka ghaa bateeli̱ baa du̱ngu̱, na bali̱mbi̱,
bateeli̱ baa nsengu hamui na bateeli̱ baa bi̱i̱di̱yo,
tabalitodha ku̱u̱ghwi̱ka mu enu̱we;
kandi mu̱koli̱ wa mulimo ghwona
taakutodha kuboneka mu enu̱we;
na elaka lya musekulo
tabakutodha ku̱li̱i̱ghu̱wa mu enu̱we.
23 Kandi kyeleeli̱ kya taala
takikutodha kuboneka mu enu̱we.
Elaka lya mugholi wabusaasa kedha wabukali̱
talikutodha ku̱u̱ghwi̱ka mu enu̱we.
Majima kuwo basu̱u̱bu̱li̱ bʼewaanu bakaba bamanu̱u̱we munsi,
kandi mahanga ghoona mukaghabhi̱i̱ya na bubhi bwanu.
24 Kandi mu kibugha eki niimuwo haaseeseki̱ye saghama ya balangi̱,
na bantu baa Luhanga,
na bantu boona aba baati̱ye munsi.”