Kitabo kya
Lu̱u̱si̱
Kwanjula
Kitabo kini ki̱bu̱ghi̱yʼo Lu̱u̱si̱ oghu akalu̱gha mu ehanga lya Mowaabu, elyabaagha bu̱lu̱gha ejooba bwa I̱saaleeli̱.
Obu njala yaaghuuye mu Bbeteleheemu, ka emui ya Banai̱saaleeli̱ baalu̱gha mu ehanga lyabo, baaghenda baakala mu ehanga lya Mowaabu. Omui haa batabani̱ baa ka eghi aaswela Lu̱u̱si̱. Basaasa baa ka eghi boona baaku̱wa, aati̱ghalʼo Nawomi̱ na bagholi be.
Obu Nawomi̱ aatu̱u̱yemu kukuuka Bbeteleheemu, Lu̱u̱si̱ aatu̱wamu kughendayo kandi aasi̱i̱ma Luhanga wa Nawomi̱ kuba Luhanga wee. Nankabha mbaaki̱dhi̱ye Bbeteleheemu batali na kantu, musaasa mulungi kandi muguudha oghu baaghilaghamu Bbowaaji̱, aaswela Lu̱u̱si̱ kandi aaloleelela Nawomi̱. Omui haa baasukulu baa Bbowaaji̱ na Lu̱u̱si̱ ni mukama Dhau̱dhi̱.
Kitabo kya Lu̱u̱si̱ kyoleki̱ye ngu Luhanga akuhaagha mu̱gi̱sa bantu baa bu̱li̱ ehanga abaku̱mu̱si̱i̱magha.
1
Eli̱meleeki̱ na baa ka yee mbaghenda Mowaabu
1 Mu bwile obu bacu̱ baa misango baabaagha balemi̱ye mu I̱saaleeli̱, njala yaaghuwa mu nsi eghi. Hakaba haliyo musaasa aakaaye mu tau̱ni̱ ya Bbeteleheemu mu di̱si̱tu̱li̱ki̱ti̱ ya Bu̱yu̱daaya. Aaghenda mu ehanga lya Mowaabu na mukali̱ wee, na batabani̱ baabo babili. 2 Musaasa oghu baamughilamu Eli̱meleeki̱ kandi li̱i̱na lya mukali̱ wee aaniiye Nawomi̱. Bakaba bali na batabani̱ babili, Maaloni̱ na Ki̱li̱yooni̱. Bantu aba bakaba bali baa mu ntu̱la ya Efulaati̱, baakaaye mu tau̱ni̱ ya Bbeteleheemu, mu di̱si̱tu̱li̱ki̱ti̱ ya Bu̱yu̱daaya. Baaku̱lu̱ka, baaghenda kuukala mu ehanga lya Mowaabu.
3 Banaliyeyo, Eli̱meleeki̱ aaku̱wa. Nawomi̱ aati̱ghali̱ya batabani̱ be babili. 4 Batabani̱ be baaswela bakali̱ Banamowaabu, Olupa na Lu̱u̱si̱. Bantu aba baakala mu ehanga eli kumala haai myaka eku̱mi̱. 5 Maaloni̱ na Ki̱li̱yooni̱ nabo dhee baaku̱wa. Nawomi̱ aati̱ghala enkaha, atali na bali̱i̱ wee kandi baana.
Nawomi̱ na Lu̱u̱si̱ mbakuuka Bbeteleheemu
6 Kilo kimui Nawomi̱ anali e Mowaabu, aaghu̱wa ngoku Mukama aabungiiye bantu baa ewaabo, aaleka baatunga byokuliya bikani̱ye. Nawomi̱ hamui na bagholi be babili beeteekani̱ja ku̱lu̱ghayo. 7 Baatandika hamui lughendo lwa kukuuka mu di̱si̱tu̱li̱ki̱ti̱ ya Bu̱yu̱daaya.
8 Mbanaghenda, Nawomi̱ aabaghila ati, “Oleke bu̱li̱ omui akuuke e ka ewaa ni̱na wee. Mukama abaghilile kisa, ngoku mwakighiliiye si̱ye kandi beebaanu̱we abaaku̱u̱ye. 9 Mukama abakoonele, mutodhe musweluwe kandi mutunge maka.”
Aabaghuwa mu ki̱ku̱bha kubalagha, du̱mbi̱ ebo baatandika kulila. 10 Baamughila bati, “Bbaa, tukughenda naawe mu bantu bʼewaanu.”
11 Nawomi̱ aabaghila ati, “Bahala banje, mukuuke ewaanu. Mbiki bi̱leki̱ye nimubbala kughenda nanje? Mukuteekeleja nangutodha ku̱byala baana abangubaswela? 12 Mukuuke ewaanu, naakaakuliiye kimui, tankugubha kutodha kusweluwa. Nankabha ngila nti nkunihila kutodha kusweluwa, ndangaale na musaasa kandi nibyale baana baabusaasa, 13 mwangubalinda ku̱hi̱ki̱ya baku̱li̱ye? Kyangubatanga kusweluwa basaasa banji? Bbaa, bahala banje, mukimani̱ye ngu eki takikugubhukana. Mukama niiye akankola atiyo kandi nsaaluuwe munu haabwanu.”
14 Baatodha baatandika kulila. Olupa aaghuwa ni̱nabyala wee mu ki̱ku̱bha aamulagha, aaghenda. Bhaatu Lu̱u̱si̱ eeboheelela Nawomi̱.
15 Nawomi̱ aaghila Lu̱u̱si̱ ati, “Tongasyawe aaku̱u̱ki̱ye mu bantu bʼewaabo kandi mu baaluhanga be, naawe dhee omukwame.”
16 Bhaatu Lu̱u̱si̱ aamukuukamu ati, “Otambhinga! Oleke ngende naawe. Hambali okughenda niiyo nkughenda, hambali okuukala, niiyo nkuukala. Bantu baawe bakuba bantu banje kandi Luhanga waawe akuba Luhanga wanje. 17 Hambali oli̱kwi̱la, niiyo ndi̱kwi̱la kandi niiyo balinjiika. Ninaaku̱lu̱ghi̱yʼo, Mukama anfubile kwonini. Lu̱ku̱ lwonkaha niiluwo lulitutambulani̱ya.” 18 Obu Nawomi̱ aamani̱ye ngoku Lu̱u̱si̱ aacuuyemu kughenda naye, taatodhi̱ye abu̱gha kantu.
Nawomi̱ na Lu̱u̱si̱ mbakuuka Bbeteleheemu
19 Nahabweki bakali̱ babili aba baaghenda, baaki̱dha mu tau̱ni̱ ya Bbeteleheemu. Obu baaki̱dhi̱yeyo, bantu bakani̱ye bʼomu tau̱ni̱ eghi baadheedhuwa. Bamui mu bakali̱ baayo baaghila bati, “Oghu ni Nawomi̱?”
20 Nawomi̱ aabaghila ati, “Muleke kungilamu Nawomi̱,*1:20 Nawomi̱ lyamani̱i̱si̱yagha kudheedhuwa. mungilemu Maala,†1:20 Maala lyamani̱i̱si̱yagha busaali̱ji̱. nanga Luhanga wa Bu̱toki̱ Bwona ambona-boneei̱ye kwonini. 21 Nkaghenda ntu̱ngi̱ye, bhaatu Mukama anku̱u̱ki̱i̱ye ntali na kantu. Mukwete kungilamu Nawomi̱ nangaaki? Mukama wa Bu̱toki̱ Bwona ambona-boneei̱ye kwonini.”
22 Nawomi̱ niikuwo aaku̱u̱ki̱ye atiyo, ali na mugholi wee Lu̱u̱si̱ Munamowaabu, oghu aalu̱ghi̱ye naye mu ehanga lya Mowaabu. Baaki̱dha mu tau̱ni̱ ya Bbeteleheemu mu bwile obu bantu baakesagha bbaale.‡1:22 Bbaale ni kilimuwa eki baahelagha mu I̱saaleeli̱, baakikesagha nga mucele kandi baateekaghamu migaati̱.