Pol köp höd aku Tesalonaika nöbö mö ñɨgö kai kɨtöŋa
1
Apos 17:1-9An Pol, Sailas, Timoti, yörɨk pɨsaŋ mɨdön köp kai kɨtön, ñɨgö Acö God, Nöbö Dib Jisas Krais nuarö hogwa nöbö mö ñɨŋa taun dib Tesalonaika röb gɨ mɨdöi akuyöbö, ñɨgö köp kɨ kai kɨtmɨdöla.
God Acö ana aipam, Nöbö Dib Jisas Krais aipam, ñɨgö uliöxön pɨ ösös rɨ ri abɨŋ, ñɨŋ madmag yuö ñɨŋ kwo tar mɨd ri aböña.
Tesalonaika nöbö mö Krais nugw pön nugw pɨ gö nɨgmä
An höjöpalön, ñɨgö magalɨg öim God nugwo ri ablaŋe rɨmɨdöla. 1Kor 13:13; Kol 1:4-6An Acö God höjöpalön, öim ñɨgö rɨbyöx nugwön, ñɨŋ pödpödiö rɨg rɨmɨdöi aku rɨbyöx nugwön, God nugwo ri ablaŋe rɨmɨdöla. Ñɨŋ Nöbö Dib ana Jisas Krais nugw pön nugw pɨ gö nɨgön, mabö nuŋwa rɨ ri abmɨdöia; ñɨŋ Nöbö Dib ana Jisas Krais madmag nɨgön, kwockwoc palön mabö nuŋwa rɨ gör mɨdöia; ñɨŋ Nöbö Dib ana Jisas Krais pɨsaŋ mögörɨb adöx yöd röul adö kau sö yöraku wöluön ap wä pɨnɨŋö, rön, ömörö höm rɨb mɨga yöx nugwölöi.
Haul nöbö mölöu nöbö wä. An nugwöla, God nuŋ ñɨgö madmag nɨgön nöbö mö nuŋwa keir yad nɨgɨm mɨdöia. 1Kor 2:4-5Krais mönö mag wä nuŋ aku rag ram ñɨŋ piaku wön, ñɨgö mönö mag akwör yad nölmɨŋa. Inöm Leia nuŋ yuö an kwo mɨdön, ölɨsö nuŋwa anɨŋ nölmɨn nugugɨrön, Krais mönö wä aku mönö ma ödöriö mɨdö, rön, ñɨgö mönö paxdöriö akwör yad nölmɨn nugw pɨmä. Ñɨŋ pɨsaŋ mɨdön, ñɨgö me rön aliö rɨmɨdöl aku ñɨŋ keir mödö nugwöia. Apos 17:5-9Ñɨŋ Nöbö Diba rɨmɨd aku nugwön, an keir rɨmɨdöl aku nugwön, paŋ mag akwör rɨmɨdmä. Ñɨŋ mɨ öliöx mɨdmɨdöia jɨ Inöm Leia nuŋ rɨmɨn, ñɨŋ Krais mönö wä aku nugwön, wahax pɨ gɨrön nugw pɨmä. Aliar rɨ ri abmɨdmä aku, Krais nöbö mö nuŋwa Masedonia Propins mɨdim bla aipam, Akaia Propins mɨdim bla aipam nugwön, paŋ mag akuyöbö akwör algör rɨ ri ab gɨr mɨdmä.
Ñɨŋ God nugw pɨmä aku, mönö aku dumɨd dumɨd, Masedonia Propins, Akaia Propins bla akwör yöi, mögörɨb adadö piaku piaku magalɨg dumɨn, nöbö mö akuyöbö magalɨg mödö nugwöia. Makwam, an mögörɨb bli uröpɨnmɨn, nöbö mö piaku keir haiwo urön yadmɨdöia, “Ñɨŋ Tesalonaika nöbö mö ñɨgö mönö wä aku yad nölmɨn, ñɨgö yad wahax pön pɨ ri abön, ap inakmönö höjöpalmɨdöi akuyöbö röböxön, God mɨ öim kömö mɨd aku nugwo nugw pön, nuŋ rɨg yadmɨd mag akuyöbö akwör rön, 10 Ha nuŋwa Jisas wöröxɨm, God rɨmɨn öbɨlöŋ aku, adöx yöd röul adö kau sebö höuöil hönɨŋö, rön, pöx mɨdöiŋö,” rɨmɨdöia. Jisas anɨŋ ñöx nɨgön wöröxöŋ aku mɨ, God ölɨsö rödön paiŋö ölɨŋ höb diba pɨ nöiön aku pöinɨŋ.

1:1: Apos 17:1-9

1:3: 1Kor 13:13; Kol 1:4-6

1:5: 1Kor 2:4-5

1:6: Apos 17:5-9