2
Id'abaeni taji Diusu sa ai quisa saida cuana
1 Beju Cristo huaraji aida ebainia putsu, ecuaneseda ebia su id'abaeni taji tu jepuiti ai quisa saida cuana, ecuaneda tusa jabuetsuati butsepi cuana jenetia ejeitid'u mahue puji. 2 Biahua tiempo Diusu ja mesa ai quisa cuana cristiano cuana quisataidha ángel cuana jepuiti. Tueda quisa cuana da ene quita mimi Diusu ja bametaidha huecuana. Da su quebata ja ángel sa quisa aja mahue ataidha, Diusu ja tueda jubida matsetaidha. 3 Jiahue mu ebia su jubida quita Diusu ja Cristo jepuiti quisa saida id'abaja mahue yatani cuana ematsetayu. Equene Echua Puji Jesucristo ja quitaita tueda quisa saida cuana cristiano cuana quisapirutana. Da su beju tu id'abaji cuana ja di ecuanaju quisatana. 4 Diusu ja ai nimetiuda cuana atana cristiano cuana tueda quisa saida su jei paputa puji. Espíritu Santo di ecuanaju tiatana. Tuahueda mesa tsapiapiati jatiati ai cuana ecuanaju tiatana, cuaja mesa tsada batame, cristiano cuana tueda quisa saida ene quita ebame puji.
Jesucristo da ecuana sa Ehuidusuji
5 Beju Diusu ja ye yahua eichacua yatayu. Aimue ángel cuana tueda yahua eichacua su ecuatsasia eputa mahue. Jesucristo bahui ecuatsasia epu. 6 Diusu sa quirica su uja derejiji epuani tueda ai cuana jepuiti:
¿Jucuaja su ni da Diusu ja cristiano cuana ebia su ibuneda ebatani?
¿Jucuaja puji tuna jepuiti ebia su epibajucuatiani?
7 Angel cuana sa chidi puji cristiano cuana ichataidha quejucua tiempo puji.
Beju daja biame, Diusu ja mesa dharejiji cristiano cuana huaraji aida, tucheda atana.
8 Pamapa ajiji cuana tuna ema su ichaenitana.
Diusu ja pamapa ai cuana emetse ichatana huecuana. Daja biame, jiahue mu aimue pamapa ai cuana tuna ema su yani mahue tsuhu ebatani. 9 Mepibatija Jesús peje su. Tueda da Diusu biame, ye mundo su deja bataji puana. Diusu ja tueda ángel cuana sa chidi puji ichatana quejucua tiempo puji. Diusu sa tsada puana Cristo pamanu puji pamapa cristiano cuana sa eturuca, ebia su ibuneda ebatani huecuana putsu. Jianhue beju Cristo eid'e yani cielo su. Tata Diusu ja Jesús pamapa pia cuana ebia su huaraji aida atana, curusu su manuana putsu.
10 Diusu ja pamapa ai cuana ataidha tuseda cama papu puji. Tuahueda pamapa ai cuana yasemetani. Tuseda tsada pamapa mesa ebacua dharejiji cuana, Cristo neje cielo su cama paanitita puji. Da putsu, Diusu ja Cristo curusu su sufri ametana. Da neje Diusu ja Cristo tuna D'eji su Aji atana. 11 Beju Jesucristo sa Tata Diusu da ecuaneseda di Tata Diusu epuani, Jesús ja ecuana tu peje su nimebutsepi atana putsu. Da putsu, Jesús aimue ebidhuani mahue ecuana neje edue yati puji. 12 Uja Diusu sa Ebacua Jesucristo puidha Diusu sa quirica derejiji su:
Tata Diusu, ema quema edue cuana peje su mi jepuiti saida emimi.
Tuna duju su satsu neje yama mi emitsutsua. 13 Uja Cristo pia puidha Diusu sa quirica su derejiji yani:
Ema Tata Diusu peje su enimetucheati.
Neicha uja Cristo pia puidha Diusu sa quirica su derejiji yani:
Hue ema upia yani Diusu ja ema tiatana edue cuana neje.
14 Beju Jesús da deja quitaji bataji puana ecuana nime epu puji. Daja bataji puana tueda equita neje emanu puji. Manu putsu, beju Ishahua sa tucheda apeenitana, Ishahua da emanu emetse puina biame. 15 Emanu puji ebia su iyuame eputani cuana Cristo ja d'eji su atana, tueda id'eibana putsu. 16 Bahue ecuaneda aimue Cristo pueana ángel cuana etsahua puji mahue. Abraham chenu sa familia jenetia deja bataji puana cristiano cuana bahui etsahua puji. 17 Daja etsahua huecuana puji Cristo sa bataji pu taji puana tuna nime deja quitame. Tuna nime pu putsu, beju tuna sa sacerdote puji puana tuneseda puji ibuneda neje Tata Diusu daja hue ebajadera puji. Deja equita pu putsu, Cristo quitaita curusu su jairutsuatiana Diusu peje su tuna sa jucha cuana echujetia puji. 18 Da su beju jiahue Cristo ja Ishahua ja epirubatani cristiano cuana saida tsahuata cua, pamapa ai sufrimiento, Ishahua sa japirubati je jaitianana putsu.