4
1 Beju jiahue teje Diusu ja pamapa ecuaneda eihuatani tu neje cielo su yanieniti puji. Da su merejatique piada piada micuaneda cielo mue teje ya, tusa quisa saida cuana su jei puja mahue, pu putsu. 2 Cuaja Diusu ja ecuana sa tata chenu cuana quisametaidha nime, jiahue ecuana mesa quisa saida cuana quisametana ecuaneda d'eji su epu puji. Tuneda mue janahua yahua su nubi putaidha, Diusu jei aja mahue ataidha huecuana putsu. Be tuna nime mepuji. 3 Diusu jei yatani cuana bahui cielo su enubita. Jei aja mahue cuana aimue enubita mahue. Uja Diusu puidha tuna jepuiti:
Diusu bahue ema puidha quema janahua yahua su panubita huecuana mahue puji, ema duininiametaidha huecuana putsu. Beju daja Diusu ja ataidha huecuana, mundo ataidha jenetia tueda janahua yahua ataidha biame. 4 Sucuta tsine jenetia pamapa ai cuana Diusu ja apetaidha. Uja derejiji yani tueda ai cuana jepuiti:
Siete tsine puji beju janahuaidha, pamapa ape putsu. 5-6 Tuseda tsada pamapa su tu neje cielo su pajanahuatita puji. Beju piada piada cuana enubitayu tusa janahua eti jude su. Tata chenu cuana ja Diusu sa quisa saida cuana jei aja mahue ataidha putsu, aimue enubita mahue. Uja Diusu puidha:
Aimue quema janahua yahua su enubita huecuana mahue. 7 Beju jiahue di cristiano cuana eihuatani cielo su panubita puji. Uja echua puji David chenu puidha Diusu sa quirica su derejiji yani:
Ahua jiahue miada Diusu ja mi eihuatani eid'abainia su, be muesumu tadada puji. 8 Beju biahua tiempo Josué chenu ja tata chenu cuana Diusu sa janahua yahua su huidusutaidha. Diusu mu pia janahua eti jude jepuiti mimiana. Tueda eti jude da cielo epuani. 9 Da su Diusu sa dharejiji cristiano cuana cielo su enubi puji enimeid'uatitani. 10 Cuaja Diusu janahuaidha mudu ape putsu nime, daja huecha tusa dharejiji cristiano cuana cielo su enubitayu ejanahua puji, tuna sa mudu ye mundo su ape putsu. 11 Da su Diusu sa quisa saida cuana daja hue jei paaderatija cielo su enubi puji. Be tata chenu cuana putaidha nime mepuja. Aimue Diusu sa janahua yahua su nubitaidha huecuana mahue, Diusu jei aja mahue putaidha huecuana putsu.
12 Beju Diusu sa quisa saida cuana da eid'e, tucheda, espada bubeta queuda nime. Cuaja espada equita su enubiani nime, daja Diusu sa quisa saida cuana enime su enubiani. Tueda quisa saida cuana ja pamapa cristiano cuana sa piba madhada cuana ebametani. 13 Diusu butse su mue ai biame rubuajiji. Tuahueda d'eji su cama ebapetani. Tu butse su pamapa cristiano cuana sa jajeutsuti taji.
Jesús da ecuana sa sacerdote aida. Diusu ecuaneseda puji ebajatani
14 Diusu sa Ebacua Jesucristo da ecuana sa sacerdote aida. Beju cielo su putiana. Diusu butse su yani ecuaneseda puji Diusu ebaja puji. Da putsu, tu peje su ecuaneseda ebia su janimetucheati taji. 15 Tueda Jesucristo ja quitaita eshanapaenitani pamapa ecuana sa sufrimiento cuana, tueda di sufri puana putsu, ye mundo su quitaji anina su. Cuaja Ishahua ja ecuana epirubatani eshanapatani, tueda di Ishahua ja pirubatana putsu. Daja Ishahua ja pirubatana biame, aimue Jesús ja jucha atana mahue. 16 Da su beju pamapa muesumu neje Diusu peje su menariatija tuahueda ecuana meibunebataja puji, daja huecha ecuaneda tsahuataja epuani su, metsahuataja puji.