Xcarta San Pablo Hua̠ntu̠ Pulh
Ca̠tzóknilh Corintios
San Pablo ca̠tzóknilh u̠má carta a̠ma̠ko̠lh cristianos hua̠nti̠ xtahuilá̠nalh nac xaca̠chiquí̠n Corinto cumu xlacán na̠ xtali̠pa̠huán Cristo, huá ca̠li̠tzoknúnilh porque luu akatiyuj xtali̠lamá̠nalh xtalacapa̠stacnicán cumu cati̠huá hua̠nti̠ xca̠li̠ma̠kalhchuhui̠ni̠y a̠túnuj talacapa̠stacni hua̠ntu̠ ni̠ luu xtalulóktat Dios. Y cumu chuná xlacán akatiyuj xtahuilá̠nalh luu lhu̠hua taaklhú̠hui̠t xca̠lakchima nac xlatama̠tcán a̠ma̠ko̠lh cristianos hua̠nti̠ xtali̠pa̠huán Cristo; xtatapajpitzimá̠nalh pu̠laclhu̠hua xtataxtumá̠nalh porque tunuj túnu xtalacapa̠stacnán. Na̠ xca̠ma̠aksti̠tumi̠putún nac xlatama̠tcán porque makapitzí̠n xlacán hua̠nti̠ xtatlahuamá̠nalh lhu̠hua hua̠ntu̠ lacli̠xcájnit tala̠kalhí̠n hua̠ntu̠ ni̠ tzinú ca̠mini̠niy tatlahuay hua̠nti̠ tali̠pa̠huán Cristo. Hasta makapitzí̠n xlacán chunatiyá xtalaktzaksay la̠ta xapu̠lh xtalakachixcuhui̠y tzincun ni̠ xtamakxtekta̠yamá̠nalh xtasmani̠ncán, xa̠huachí luu xtali̠taaklhu̠hui̠y xli̠skalala xa̠hua xli̠tlihueke hua̠ntu̠ Espíritu Santo catu̠huá xca̠li̠ma̠tlahui̠y, ni̠ xtaakata̠ksa pi̠ u̠má li̠skalala y li̠tlihueke huá ca̠li̠ma̠xqui̠cani̠t la̠qui̠ natala̠li̠makta̠yay. Na̠chuná acxni̠ pu̠tum xtatamacxtumi̠y xlacata macxtum natahua̠yán la̠qui̠ natalakachixcuhui̠y Dios, lhu̠hua hua̠nti̠ ca̠ta caj xtakama̠nantaxtuy y makapitzí̠n li̠túm akatiyuj xtalay ni̠ luu xtaca̠najlay para xli̠ca̠na o ni̠ xli̠ca̠na talacastacuanán ni̠n nac ca̠li̠ní̠n. San Pablo pu̠lacatunu pu̠lacatunu tzúculh ca̠ma̠aksti̠tumi̠niy hua̠ntu̠ akatiyuj xtali̠lamá̠nalh la̠qui̠ naca̠ma̠akata̠ksni̠y hua̠ntu̠ luu xtalulóktat. Xli̠hua̠k hua̠nti̠ ca̠catzí̠nilh pi̠ ni̠tlán hua̠ntu̠ xtatlahuamá̠nalh xlá ca̠lacaquílhni̠lh, pero ca̠li̠ma̠kalhchuhuí̠ni̠lh cristianos pi̠ acxtum catala̠pá̠xqui̠lh cumu la̠ li̠nata̠lán, porque San Pablo li̠macá̠n tapa̠xqui̠t luu xlacasquinca nama̠kantaxti̠yá̠hu, xta̠chuná cumu la̠ li̠pa̠huaná̠hu Dios y kalhkalhi̠ma̠náhu hua̠ntu̠ xlá ma̠lacnu̠ni̠t naquinca̠ma̠xqui̠yá̠n nac akapú̠n.
1
1 Aquit Pablo hua̠nti̠ Dios lacsacni̠t nacli̠taxtuy xapóstol Jesucristo. Aquit xa̠hua Sóstenes 2 cca̠tzoknimá̠n eé carta la̠qui̠ nacca̠ma̠lakacha̠niyá̠n xli̠huák huixinín hua̠nti̠ huilátit nac xaca̠chiquí̠n Corinto hua̠nti̠ xcamaná̠n Dios li̠taxtuni̠tátit porque xlá ca̠lacsacni̠tán xlacata nali̠pa̠huaná̠tit Cristo Jesús y namacama̠xqui̠yá̠tit milatama̠tcán la̠qui̠ xma̠nhuá natamacuaniy, y na̠ clacasquín pi̠ caca̠maktá̠yalh eé quintachuhuí̠n xli̠hua̠k a̠ma̠ko̠lh nata̠lán hua̠nti̠ tahuilá̠nalh nac a̠lacatúnuj ca̠chiqui̠ní̠n hua̠nti̠ na̠ ankalhi̠ná taquilhcha̠niy Quimpu̠chinacán Jesucristo porque na̠ huá Xpu̠chinacán. 3 Clacasquín pi̠ Quintla̠ticán Dios chu Quimpu̠chinacán Jesucristo ankalhi̠ná caca̠siculana̠tlahuán y caca̠ma̠xqui̠n tla̠n latáma̠t.
Pablo pa̠xcatcatzi̠niy Dios caj xpa̠lacata hua̠ntu̠ tlahuani̠t nac xlatáma̠t
4 Aquit ankalhi̠ná cpa̠xcatcatzi̠niy Dios caj hua̠ntu̠ milacatacán porque luu lhu̠hua hua̠ntu̠ xlá ca̠li̠siculana̠tlahuani̠tán caj xpa̠lacata Cristo Jesús. 5 Caj cumu li̠pa̠huaná̠tit Jesús Dios ca̠ma̠xqui̠ni̠tán lhu̠hua li̠skalala la̠qui̠ li̠huana̠ naakata̠ksá̠tit hua̠ntu̠ xtapa̠xuhuá̠n y la̠qui̠ tancs nali̠chuhui̠naná̠tit xtalacapa̠stacni. 6 Xli̠hua̠k hua̠ntu̠ ma̠lacnu̠y Cristo nama̠kantaxti̠y nac milatama̠tcán hua̠nti̠ tali̠pa̠huán, xli̠ca̠na pi̠ chuná qui̠taxtuy y tla̠n huixinín li̠ma̠luloká̠tit milatama̠tcán porque hua̠katá makamaklhti̠nani̠tátit hua̠ntu̠ ma̠lacnu̠y. 7 Xli̠hua̠k hua̠ntu̠ huixinín maclacasquiná̠tit Dios aya ca̠ma̠xqui̠ni̠tán la̠qui̠ aksti̠tum nalatapa̠yá̠tit li̠huán kalhkalhi̠tahuilayá̠tit a̠má quilhtamacú acxni̠ namimparay xli̠maktiy Quimpu̠chinacán Jesús. 8 Quintla̠ticán Dios ankalhi̠ná naca̠makta̠yayá̠n la̠qui̠ ni̠tu̠ nali̠tamokosta̠yayá̠tit hua̠ntu̠ ni̠tlá̠n, y la̠qui̠ aksti̠tum nalatapa̠yá̠tit y ni̠ cha̠tum tícu catica̠li̠ma̠ma̠xaní̠n para túcu acxni̠ namimparay Quimpu̠chinacán Jesucristo. 9 Xli̠ca̠na pi̠ luu cali̠pa̠huántit porque hua̠ntu̠ Dios ma̠lacnu̠y hua̠k ma̠kantaxti̠y, pus huá chú Quintla̠ticán Dios luu ma̠n ca̠lacsacni̠tán la̠qui̠ huá natapeksi̠niyá̠tit y acxtum nata̠latapa̠yá̠tit cane̠cxnicahuá quilhtamacú.
Pablo huan pi̠ ni̠ catatapajpítzilh hua̠nti̠ tali̠pa̠huán Jesús
10 Nata̠lán, nac xtacuhuiní Quimpu̠chinacán Jesucristo aquit cca̠li̠ma̠akatzanke̠yá̠n xlacata pi̠ aktumá talacapa̠stacni cakalhí̠tit y ni̠ caj catapajpitzítit huata acxtum cala̠pa̠xquí̠tit cala̠lakalhamántit cumu la̠ ti̠ xli̠ca̠na acxtum tatapeksi̠y. 11 Huá chuná cca̠li̠huaniyá̠n porque makapitzí̠n xli̠talakapasni Cloé quintali̠ta̠kalhchuhui̠nani̠t pi̠ ni̠ xmaka̠sni la̠makasi̠tzi̠tahuilayá̠tit nac milaksti̠pa̠ncán. 12 Porque quihuanicán pi̠ makapitzí̠n hua̠nti̠ huixinín ca̠ta̠tamacxtupi̠yá̠tit kalhtum tama̠luloka acxni̠ tahuán: “Aquit huá ctapeksi̠niy Pablo”; makapitzí̠n tahuamparay: “Huá aquit ctapeksi̠niy Apolos”; makapitzí̠n tahuamparay: “Aquit huá ctapeksi̠niy Pedro”; y tahuila̠nampá chú ti̠ tahuán: “Aquit huá ctapeksi̠niy Cristo.” 13 Bueno, ¿pi̠ cha̠lhu̠hua Cristo la̠qui̠ nahuaná̠hu pi̠ cha̠lhu̠hua hua̠nti̠ naquinca̠ma̠akapu̠taxti̠yá̠n? ¿Osuchí quimpekextokohuacácalh aquit nac cruz la̠qui̠ nacxoko̠nún xpa̠lacata mintala̠kalhi̠ncán? Osuchí acxni̠ taakmunútit, ¿pi̠ nac quintacuhuiní taakmununi̠tátit? 14 Ca̠na̠ cpa̠xcatcatzi̠niy Dios pi̠ ni̠tícu luu cakmununi̠t nac milaksti̠pa̠ncán, caj xma̠n huá Crispo chu Gayo. 15 Pus huá xpa̠lacata cca̠li̠huaniyá̠n pi̠ huixinín ni̠lay nahuaná̠tit para nac quintacuhuiní taakmununi̠tátit. 16 Ma̠squi xli̠ca̠na pi̠ na̠ cca̠akmúnulh xli̠talakapasni Estéfanas, pero niaj cpa̠staca para tícu cca̠akmununi̠t a̠túnuj. 17 Porque Cristo ni̠ huá quili̠lacsacni̠t xlacata caj nacakmunu̠nún, huata huá quili̠lácsacli la̠qui̠ nacli̠chuhui̠nán a̠má laktáxtut hua̠ntu̠ Dios ca̠li̠lakma̠xtuputún xli̠hua̠k cristianos, pero acxni̠ huá cli̠chuhui̠nán ni̠ cli̠lacata̠qui̠nán hua̠ntu̠ luu li̠skalala tachuhuí̠n la̠qui̠ pi̠ ni̠ nacli̠ma̠cti̠y xli̠tlihueke hua̠ntu̠ kalhi̠y xtalakalhamaní̠n Jesús acxni̠ ni̠lh nac cruz.
Cristo kalhi̠y xli̠tlihueke y xli̠skalala Dios
18 Ama̠ko̠lh cristianos hua̠nti̠ tali̠pa̠xuhuay hua̠ntu̠ ma̠laktzanke̠nán xlacán talacpuhuán pi̠ ni̠tu̠ li̠macuán ma̠squi Jesús ni̠lh nac cruz xlacata nalakma̠xtunún; pero xli̠hua̠k aquinín hua̠nti̠ lakma̠xtuputuná̠hu quili̠stacnicán catzi̠yá̠hu pi̠ hua̠ntu̠ Jesús akspulani̠t nac cruz xli̠ca̠na huá xtalulóktat y xli̠tlihueke Dios naquinca̠lakma̠xtuyá̠n. 19 Porque xli̠ca̠na la̠ huan Dios nac li̠kalhtahuaka:
Aquit cámaj ca̠lactlahuaniy xli̠skalalacán hua̠nti̠ lakskalalán lacchixcuhuí̠n,
y ni̠túcu cactili̠má̠xtulh xtalacapa̠stacnicán hua̠nti̠ luu lactali̠pa̠hu ca̠maklhcatzi̠cán.
20 Caj la̠ta chú caquila̠huaníhu, a̠ma̠ko̠lh lakskalalán lacchixcuhuí̠n, chu lactali̠pa̠hu ma̠kalhtahuake̠naní̠n, xa̠hua hua̠nti̠ hua̠k talakapasa la̠ta túcu laclanca talacapa̠stacni anán nac ca̠quilhtamacú, ¿túcu chú ca̠li̠macuanini̠t? Osuchí ¿pi̠ huá ca̠maktá̠yalh la̠qui̠ natali̠pa̠huán Dios? Xli̠ca̠na pi̠ Dios maktumá ma̠siyuni̠t pi̠ ni̠tu̠ li̠macuaniy xli̠skalalacán y xtalacapa̠stacnicán hua̠nti̠ lactali̠pa̠hu tali̠taxtuputún. 21 Cumu Dios kalhi̠y lanca li̠skalala xlá ni̠ lacásquilh pi̠ caj xtalacapa̠stacnicán lakskalalán lacchixcuhuí̠n hua̠nti̠ uú xala ca̠quilhtamacú nali̠lakapascán xtalacapa̠stacni, huata huá li̠macámilh xtachuhuí̠n la̠qui̠ naca̠lakma̠xtuy xli̠hua̠k hua̠nti̠ natali̠pa̠huán, ma̠squi xli̠ca̠na pi̠ huá u̠má tachuhuí̠n hua̠ntu̠ ma̠sta̠y laktáxtut talacpuhuán pi̠ ni̠tu̠ ca̠li̠macuaniy xli̠hua̠k a̠ma̠ko̠lh hua̠nti̠ taamá̠nalh talaktzanka̠ta̠yay.
22 Ama̠ko̠lh judíos talacpuhuán pi̠ ni̠tu̠ li̠macuán porque xlacán pu̠lh taucxilhputún aktum lanca li̠cá̠cni̠t xtascújut Dios la̠qui̠ natali̠pa̠huán, y griegos caj tzucuy tata̠ma̠lacastuca xli̠skalalacán a̠má tachuhuí̠n aver para xli̠ca̠na hua̠ntu̠ li̠chuhui̠nancán la̠qui̠ chú na̠ nataca̠najlay. 23 Pus huá xpa̠lacata acxni̠ aquinín liakchuhui̠naná̠hu cha̠tum Cristo hua̠nti̠ xtokohuacácalh nac cruz caj quimpa̠lacatacán, judíos tzucuy taliaklhu̠hua̠tnán tali̠si̠tzi̠y y tahuán pi̠ huá eé caj li̠xcájnit talacapa̠stacni; y a̠ma̠ko̠lh hua̠nti̠ ni̠ judíos acxní takaxmata quintachuhui̠ncán xlacán ni̠tu̠ taliucxilha porque tali̠ma̠xtuy cumu la̠ xtalacapa̠stacni lactonto lacchixcuhuí̠n. 24 Pero xli̠hua̠k aquinín hua̠nti̠ Dios quinca̠lacsacni̠tán xlacata naquinca̠lakma̠xtuyá̠n, chuná la̠ judíos cumu la̠ hua̠nti̠ ni̠ judíos, stalanca catzi̠yá̠hu pi̠ a̠má Cristo hua̠nti̠ aquinín li̠chuhui̠naná̠hu li̠macuán hua̠ntu̠ xlá ma̠kantaxti̠ni̠t nac cruz, porque antá ma̠siyuma Dios lanca xli̠tlihueke chu xli̠skalala. 25 Porque a̠má xtalacapa̠stacni Dios huá la̠ta quinca̠lakma̠xtuputuná̠n, ma̠squi nac xlacati̠ncán cristianos tasiyuy pi̠ ni̠tu̠ li̠macuán pero huata huá tlak li̠macuán ni̠xachuná xtalacapa̠stacnicán lakskalalán lacchixcuhuí̠n xala ca̠quilhtamacú. Y para huí ti̠ lacpuhuán pi̠ Dios ni̠ xli̠ca̠na kalhi̠y li̠tlihueke porque makní̠calh Jesús nac cruz pus lacatancs cca̠huaniyá̠n pi̠ Dios makatlajako̠y xli̠hua̠k li̠tlihueke hua̠ntu̠ anán nac ca̠quilhtamacú. 26 Nata̠lán, calacapa̠stáctit la̠ta Dios ca̠lacsacni̠tán la̠qui̠ naca̠lakma̠xtuyá̠n ma̠squi lhu̠hua huixinín hua̠nti̠ ni̠ lakskalalán lacchixcuhuí̠n cumu la̠ huancán uú nac ca̠quilhtamacú, lhu̠hua huixinín hua̠nti̠ ni̠ laktlihuekén, y na̠ ni̠ kalhi̠yá̠tit li̠ma̠peksí̠n, chunali̠túm ni̠ lactali̠pa̠hu cristianos mili̠talakapasnicán. 27 Pero Dios luu chuná ca̠lacsacni̠t hua̠nti̠ nac ca̠quilhtamacú ca̠li̠ma̠xtucán luu lactonto la̠qui̠ la̠n naca̠ma̠ma̠xani̠y a̠ma̠ko̠lh lacchixcuhuí̠n hua̠nti̠ luu lakskalalán tali̠taxtuy, y la̠qui̠ la̠n naca̠ma̠ma̠xani̠y hua̠nti̠ lakke̠lanca y laktlihuekén, xlá ca̠lacsacni̠t hua̠nti̠ ni̠para tzinú lacli̠ca̠na ca̠li̠ma̠xtucán uú nac ca̠quilhtamacú. 28 Dios ca̠lacsacni̠t naca̠lakma̠xtuy hua̠nti̠ ni̠ lactali̠pa̠hu lacchixcuhuí̠n, a̠ma̠ko̠lh hua̠nti̠ ni̠ ca̠ucxilhputuncán uú porque ni̠túcu takalhi̠y, la̠qui̠ chuná la̠n naca̠ma̠ma̠xani̠y a̠ma̠ko̠lh hua̠nti̠ talacpuhuán pi̠ tla̠n tahuilá̠nalh y luu lactali̠pa̠hu. 29 Dios ca̠lacsacni̠t hua̠nti̠ ni̠túcu xkasatcán la̠qui̠ chuná ni̠para cha̠tum tícu nalacpuhuán pi̠ luu a̠tzinú tali̠pa̠hu nac xlacatí̠n. 30 Pero caj la̠ta Dios quinca̠lakalhamaná̠n xlá quinca̠ta̠ma̠lacastucni Cristo Jesús, y na̠ luu chuná lacasquín pi̠ caj xpa̠lacata Cristo nalakapasá̠hu xli̠hua̠k xtalacapa̠stacni y aksti̠tum nalatama̠yá̠hu cumu la̠ xli̠ca̠na̠ xcamaná̠n, xa̠huachí niaj caquintica̠ma̠xoko̠ní̠n xli̠hua̠k hua̠ntu̠ xtitlahuani̠táhu quintala̠kalhi̠ncán porque xli̠ca̠na pi̠ aya quinca̠lakma̠xtuni̠tán. 31 Pues luu quinca̠mini̠niyá̠n pi̠ quilacán natlahuayá̠hu a̠má tachuhuí̠n hua̠ntu̠ tíhua Dios hua̠nchú tu̠ tatzokni̠t nac li̠kalhtahuaka antanícu chiné huan: “Para tícu caj luu sacstu tali̠pa̠hu li̠taxtuputún, mejor li̠huana̠ calacapá̠stacli hua̠ntu̠ Dios tlahuani̠t nac xlatáma̠t.”