Xapulh Xcarta Hua̠ntu̠ Tzokli
San Juan
Acxni̠ a̠cu xtzucuni̠t cristianos tali̠pa̠huán Cristo, na̠chuná xtalakapuntumi̠ma aktum lanca taaksaní̠n, porque xuancán pi̠ xma̠n huá tla̠n nakalhi̠y laktáxtut hua̠nti̠ tze̠k xca̠ma̠xqui̠cani̠t aktum talacapa̠stacni xa̠hua xli̠skalala Dios, pero mat ni̠ lhu̠hua hua̠nti̠ xtaamá̠nalh talaktaxtuy. Cumu chuná xtala̠akskahuimi̠má̠nalh huá xpa̠lacata San Juan ca̠li̠tzóknilh u̠má carta a̠ma̠ko̠lh ca̠najlaní̠n la̠qui̠ nac u̠má xcarta naca̠ma̠akata̠ksni̠y hua̠ntu̠ luu xtalulóktat xtachuhuí̠n Dios. Acxni̠ San Juan huan pi̠ “Dios huá taxkáke̠t”, antá lacatancs quilhuama pi̠ hua̠ntu̠ xlacata Dios ni̠para pu̠lactum anán hua̠ntu̠ xlá ni̠ catzi̠y, o para tícu tla̠n nama̠tze̠kniy hua̠ntu̠ tlahuama.
Xa̠huachí xtahuila̠nampá makapitzí̠n hua̠nti̠ kalhtum xtahuán pi̠ Cristo ni̠ xli̠ca̠na huá a̠má hua̠nti̠ xli̠mínit xuani̠t, hua̠nti̠ xli̠ca̠na Xkahuasa Dios. La̠ta xli̠hua̠k u̠má taaklhú̠hui̠t hua̠ntu̠ xlama, nac u̠má carta ca̠li̠ma̠kalhchuhui̠ni̠cán y ca̠li̠ma̠lacapa̠stacni̠cán pi̠ niaj ca̠mini̠niy tícu naca̠li̠ma̠kalhchuhui̠ni̠y a̠túnuj talacapa̠stacni porque xlacán takalhi̠y Espíritu Santo hua̠nti̠ quinca̠ma̠siyuniyá̠n xli̠hua̠k xtalacapa̠stacni Dios hua̠ntu̠ xlá quinca̠ma̠catzi̠ni̠putuná̠n; xa̠huachí Espíritu Santo li̠ma̠luloka pi̠ Dios lama nac xlatama̠tcán a̠ma̠ko̠lh hua̠nti̠ tali̠pa̠huán Cristo y taca̠cni̠naniy cumu la̠ Xpu̠chinacán.
Xa̠huachí liakasputa u̠má carta antanícu xli̠hua̠k tapa̠xuhuá̠n huan pi̠ xli̠hua̠k hua̠nti̠ lakapasa Dios ca̠pa̠xqui̠y xta̠cristianos, porque Dios huá tapa̠xqui̠t.
1
Huá Jesús Xtachuhuí̠n Dios hua̠ntu̠ ma̠siyuy lácu nakalhi̠yá̠hu latáma̠t
1 Aquit camá̠n ca̠li̠ma̠kalhchuhui̠ni̠yá̠n nac u̠má quincarta hua̠ntu̠ cca̠tzoknimá̠n xlacata hua̠nti̠ xlamajá hasta xamaká̠n quilhtamacú acxni̠ ni̠najtú a̠ xma̠lacatzuqui̠y Dios. Huá aquit cuanima Cristo hua̠nti̠ huanicán Xtachuhuí̠n Dios porque huá ma̠siyuy lácu nakalhi̠yá̠hu latáma̠t, y aquinín ma̠n ckaxmatni̠táhu lácu huan, y ma̠n cliucxilhni̠táhu quilakastapucán lácu luu tasiyuy, huá luu li̠huana̠ cli̠lakapasni̠táhu porque mismo quimacancán ma̠n cli̠xamani̠táhu y ctalulokni̠táhu pi̠ huá tamá xkalhi̠y tachuhuí̠n hua̠ntu̠ ma̠sta̠y latáma̠t. 2 Porque hua̠nti̠ ma̠sta̠y latáma̠t ma̠n quinca̠tasiyunini̠tán y aquinín ma̠n cucxilhni̠táhu, tancs cma̠luloká̠hu pi̠ xli̠ca̠na lama y cca̠liakchuhui̠nanima̠náhu xli̠hua̠k cristianos la̠qui̠ natali̠pa̠huán xma̠sta̠ná latáma̠t hua̠ntu̠ ne̠cxnicú nalaksputa. Xapu̠lh xlá xta̠lama̠chá Quintla̠ticán Dios nac akapú̠n pero huata ma̠n quinca̠lakmini̠tán la̠qui̠ nalakapasá̠hu. 3 Aquinín xma̠n huá cca̠li̠ma̠kalhchuhui̠ni̠má̠n hua̠ntu̠ cucxilhni̠táhu y ckaxmatni̠táhu la̠qui̠ huixinín na̠ macxtum naqui̠la̠ta̠layá̠hu chuná cumu la̠ aquinín macxtum cta̠lani̠táhu Quintla̠ticán Dios xa̠hua Xkahuasa Jesucristo. 4 Pero huá xpa̠lacata cca̠li̠tzoknimá̠n eé carta la̠qui̠ huixinín na̠ nakalhi̠yá̠tit u̠má lanca tapa̠xuhuá̠n hua̠ntu̠ aquinín ckalhi̠yá̠hu.
Cali̠latamá̠hu xtaxkáket Dios hua̠ntu̠ kalhi̠y
5 Umá xli̠ma̠peksí̠n Quimpu̠chinacán Jesucristo hua̠ntu̠ xlá quinca̠li̠ma̠kalhchuhui̠ní̠n, na̠ huatiyá cca̠li̠ma̠kalhchuhui̠ni̠ma̠náhu xli̠hua̠k cristianos, huan pi̠ Dios huá li̠taxtuy taxkáket y nac xlatáma̠t ni̠tu̠ kalhi̠y y ni̠ anán hua̠ntu̠ xalakaca̠pucsua. 6 Para aquinín huaná̠hu pi̠ ta̠talacastucni̠táhu Dios pero para nac quilatama̠tcán li̠lama̠náhu hua̠ntu̠ xalac ca̠pucsua tascújut xli̠ca̠na pi̠ liaksani̠naná̠hu quintachuhui̠ncán xa̠hua quilatama̠tcán. 7 Pero para aksti̠tum li̠lama̠náhu xtaxkáket Dios xa̠hua lacuán xtascújut, xli̠ca̠na tla̠n ma̠luloká̠hu pi̠ ta̠talacastucni̠táhu Dios y xkalhni Quimpu̠chinacán Jesucristo hua̠ntu̠ stajmákalh quinca̠lacxacaniko̠yá̠n xli̠hua̠k hua̠ntu̠ xkalhi̠yá̠hu quintala̠kalhi̠ncán.
8 Pero para nahuaná̠hu pi̠ ni̠tu̠ kalhi̠yá̠hu quintala̠kalhi̠n, que̠cstucán taakskahuitama̠yá̠hu y ni̠tu̠ talulóktat nac quilatama̠tcán. 9 Pero para li̠ta̠yayá̠hu kalhapalaniyá̠hu Dios pi̠ tlahuani̠táhu tala̠kalhí̠n entonces tla̠n nali̠pa̠huaná̠hu pi̠ Dios naquinca̠ma̠kantaxti̠niyá̠n hua̠ntu̠ ma̠lacnu̠ni̠t, naquinca̠ma̠tzanke̠naniyá̠n quintala̠kalhi̠ncán y naquinca̠lacxacaniyá̠n xli̠hua̠k hua̠ntu̠ li̠xcájnit kalhi̠yá̠hu nac quilatama̠tcán. 10 Para kalhtum huaná̠hu pi̠ ni̠tu̠ tlahuama̠náhu tala̠kalhí̠n nac quilatama̠tcán, xli̠ca̠na pi̠ huata li̠maca̠náhu Dios cumu lá̠mpara huata huá xaaksani̠ná, para chuná tlahuayá̠hu ni̠ xli̠ca̠na maktum pi̠ makamaklhti̠nani̠táhu xtachuhuí̠n y ni̠ xli̠ca̠na li̠pa̠huaná̠hu.