1 Tiil masagi Yilame keelaiti teʋeni Davide ma, é sɛdele guluiti teʋe ma, ta kɔtu zaɠa nuiti, naa ʋɛɛ pɛlɛ maalɛɛ nuiti ba, nii a kɛ ti masa pɛlɛi lo Davide ʋɛ. 2 Davide kwɛɛni naazu ga Ɠɔoɠɔ GALAGI tɔun toga ga Izilayɛle masagi, ta é ɠɛni ná-masadai ɠaawɔɔlɔzu, ná-nuɓusɛiti maaʋele ma, Izilayɛle nuiti.

3 Davide zeiɗai ma Zeluzalɛme, é anza ɠiligaa vuluni, é doun zunuiti ta doun anzanuiti sɔlɔɔni naati ba. 4 Davide ná-doun zunuiti daaseigiti kaa, niiti ti zɔlɔɔni Zeluzalɛme: Samua, Soɓaɓe, Natan, Salomɔn. 5 Yiɓaal, Elisua, Ɛlɛpelɛte, 6 Nɔga, Nefɛge, Yafia 7 Elisama, Ɓeyeliyada, ta Elifelɛte.

8 Siɛgi zu Filisiti nuiti ti mɛnini la ga ti gulɔi ziaa Davide ma ga é ɠɛ ga Izilayɛle masagi, ti lɛɛni gaiziɛ vai ma. Davide ma wooi mɛnini, é liini ti laaɠomisu. 9 Filisiti nuiti ti ʋaani ga kɔɔi, ti loo Lefayime ʋɛtugi zu nuiti ma. 10 Davide GALA gaazaɠani, é ɠɛ ma: «Nà zoo nɛi gè li Filisiti nuiti daalɔɠɔma? Ɗa ti lɔ nɛi zèezu ɓaa?» Ɠɔoɠɔ GALAGI gooɠaaʋoteni, é ɠɛ ma: «Li, nà ti lɔɔzu è yeezu.»

11 Filisiti nuiti ti zeelini Ɓaale-Pelasime, Davide vɔni ti ma miná. É ɠɛni ma: «Ɠɔoɠɔ GALAGI zeɠe wɔɔʋɛ sìli nuiti ta-ɠɔɔɓɔgi ʋa ga zèe, eɠɛʋelei ziɛi a ɗa kaaɠai ɠolo la.» Naa ɠa é kɛɛni ti ná laasei pɛɛni ga Ɓaale-Pelasime (nii poluʋɛ ga «Maliɠii nii é zeɠe wɔɔzu»). 12 Filisiti nuiti ti ta-ɠɔɔɠɔ ganigiti tooni ya miná, Davide devei veeni ná-nuiti zea ga ti naati gala.

13 Filisiti nuiti ti ɠaleni ma ʋolu ga kɔɔi, ti loo pɛtugi zu nuiti ma. 14 Davide GALA gaazaɠani ʋolu. Naa gooɠaaʋoteni, é ɠɛ ma: «Mina ti laaɠomi. Ɠula ga ti ʋoluʋelei, ɗa zeelizu ti ma guluiti tetemaʋɛ. 15 Siɛgi zu è nu ɠɔɠɔ lugi mɛnisu da guluiti unsuʋɛ, zuvilɛ, è ʋa, è vala ti ʋa, mazɔlɔɔ názu ɠa gè losu da è luɠɔ, nii a kɛ gè vɔni Filisiti nuiti ma.» 16 Davide naa ɠɛɛni, nii GALA boni ma. Ná-nuiti ti vɔnini Filisiti nuiti ta-ɠɔɔɓɔgi ma, ti ɗa ti ɓɛ, é zo Gaɓaɠɔn, é zeeli Gezɛɛl. 17 Naa ɠɛɛni nɛi feya, Davide lɔɠɔi ɠula, ma wooi vazani zooiti pɛ su, Ɠɔoɠɔ GALAGI Davide maayikini zooiti pɛ gaazu.