1 Ade ɠida zalaɠa zua vaiti bu, ti ɠulazu kɔɔɠɔ ganigiti bɛ: Ade kwɛni ga «faaɠwɛ ka de pɛ de ya». «Faaɠwɛgi» ɠa ɗa nu waso, kɛlɛ nɛɛbɛi ɠa ɗa nu zapelɔ kidaaleʋei zu. 2 Zɔi é ɠisiɛzu ga é faa ɠwɛɛ, naa la dɛ faa ɠwɛɛ, ʋelei maanɛai é kwɛɛ da. 3 Kɛlɛ ni nu a GALA nɛɛna ʋɛ, GALA ge naama nui ɠwɛɛ.

4 Naa ɠa é ba, nii é ga zalaɠa zuaiti mii vai, ti ɠulazu kɔɔɠɔ ganigiti bɛ: Ade kwɛɛ ga kɔɔɠɔ gani la ga ani nɔpɛ eteai zu, GALA gila kpegi nɔ ɠa é ná. 5 Mazɔlɔɔ anɛɛ ni ta ɠɛɛzu tanigaa ma galagiti, geeɠɔlɔgi zu ɓaa zooi ma, galagiti gola mɔinʋɛ, maliɠiiti ti mɔin gola, 6 anɛɛ naa ʋe, adɔnɔi, GALA gila kpe nɔ ɠa, é ade ʋɛ, Ɠɛɛɠɛi, nii é aniiti pɛ kpɛtɛa, nii de zɛnvui wosu zeema, ta Maliɠi ɠila kpe, é ga Yesu Kilista, nii aniiti pɛ ti saɓui zu, da ɓalaa de zɛnvui wosu saɓui zu.

7 Kɛlɛ nui pɛ ge la gaamai naa ɠwɛɛ. Tanigaani ti ɓega ga ɠata kɔɔɠɔ gani fai ʋa mɛtu, niizu ti ɗa naama zuaiti mi, niiti ti ɠulaai ga zalaɠai kɔɔɠɔ ganigiti bɛ, zɛbɛ la ta-ɠisiɛiti ba, ti ɗa ɠisiɛ ga daamianigi naati ti ti ɠɔzɔa. 8 Tama daamianigi laade, é ʋa ɠɛ de maaɓuɠazu GALA ba. Ni de la daami woni, naa la ta ɠulazu de la, ni da ta miina, naa la ta laazu de ma.

9 À dama ga wa-wɔɔlɔyai nii wo sɔlɔɔgai, naa mina ɠɛ ga kɔɠɔziɠa zaɓu zɛbɛsulala nuiti bɛ kidaaleʋei zu, ti ʋa loo kotoi zu. 10 Mazɔlɔɔ ni zɛbɛsulala nui ta ɠa è ɠaana zeini sale ɠɔɔ ʋɛlɛi wu, ɗɛi faaɠwɛgi è ya, è ɗa daami wo, ná-kisiɛi la iɲɔdɔa ɓaa, é ʋa ɗa suaiti mi, ti ɠulaai ga zalaɠai kɔɔɠɔ ganigiti bɛ? 11 Naa maaʋele ma, zɛbɛsulala nui naa undaa ɠa ʋilisu, ɗa-vaaɠwɛgi maaʋele ma, ɠɛɛɠɛloin naa, nii Kilista zaai bɛ. 12 Siɛgi zu wo kotoi ɠɛɛzu la ga naa ma zii ɠɛɛɠɛleaiti daalɔɠɔma, wo ta-ɠisiɛi maawana, nii zɛbɛ la ba, Kilista ɓɔɠɔi ɠana wo kotoi ɠɛɛzu daalɔɠɔma. 13 Naa ɠa é ba, ni daamianigi ɠa a kɛ̀ɛloin loo kotoi zu, eyɛsu pɛ, gè la mɔ sua mia, naa ɠa a kɛ gè mina kɛ̀ɛloin loo.