Pɔle Ná-Sɛʋɛ Mɔungi
É Teʋeni
É Teʋeni
Tesalonike Nuiti Ma
Sɛʋɛi lɔɔzeizuʋɛ ma woo mɔungiti
Pɔle ɠa é Tesalonike nuiti ta-zɛʋɛ mɔungi ɠɛai (1:1). Tanisu tɔ ɠa é ga Pɔle ná-sɛʋɛ mɔunpagi nii é kɛai, nii kɛai ga GALA daawooi ɠilazuʋɛ ta, ɠɛzɛɠɛzɛ. É zɛʋɛni kona ʋuulɔɔlugɔ maazu ɠila (51) kɛɠala leʋegai ma, Yesu zɔlɔɔga ʋoluma. Pɔle kɛɛni siɛgi zu é ɠɛni la Kolɛnte, é teʋe Tesalonike Egilisii ma, Egilisii nii é daaɠulani ná-keela ziɛi velesiɛi zu (KKw 17:1-10). Bogɛ Keelaiti Kɛɛwotiiti ma zɛʋɛi zu ga Egilisii naa zu nuiti ti ɠɛni Zuifui tanigaani ta Gɛlɛkii ma mɔinmɔin.
Egilisii laaɠulaai ma bɛ, Pɔle la ɠɛni zooni é ʋa lɛbi gola Tesalonike, naa ɠa é kɛa é sɛʋɛi nii ɠɛɛni la ná ʋoluma, nii a kɛ é kidaaleʋe nuiti iɲɔdɔ. Sɛʋɛi nii ɠa kala ungi ma mɔinmɔin su vaiti gaaɠulazu ba, é kalagi ve ɓalaa é lo faiti ba, ti ga kiti vaiti, naa ta ɠa ga ɠɛʋelei Keletiɛin maanɛai é eteai ziɛ la. Pɔle lago ɠiliʋɛ kpaan Kilista ʋaa laa velesiɛi ma. Kɛɛʋɛ eɠɛ Tesalonike ɠidaaleʋe nuiti ti wola ɠilini naama vai ʋa ga zɛbɛ. Pɔle Kilista ʋaa laa velesiɛi ma vai zeɠeni, é ti zɛbɛlɔ la ga ti eteai ziɛ ga ʋelei nɛai la GALA bɛ (5:6-8).
Unsosuʋɛ
1. Pɔle sɛʋɛi nii lɔɔzeiʋɛ ga é ná-tuʋɔ gooi laazeeli Egilisii ma, ta é GALA mama naa ná-faa zu (1:1-10).
2. Naa ʋolu é ná-botiiti zɔɠɔzu lɛɛni, é zɛba fai niiti Timɔte ti woni ma, é naati suɠula (2:1—3:13).
3. Pɔle zɛba, é kalagiti fe, é lo Keletiɛin ziɛ ʋelei ʋa, é zoloo Kilista ʋaa laa velesiɛi ma (4:1—5:25).
4. Pɔle sɛʋɛi ɠaaɓelagɛ ga é Egilisii luʋɔ ʋolu ga niinɛ, ta é ɠɛ ti ma ti fai pɛ kɛ, nii a kɛ ɛsɛ pɛ ge sɛʋɛi nii ɠala Egilisii zu (5:26-28).
1
Tuʋɔ gooiti
1 Nɛ̀i gè ga Pɔle, gá Silase, naa ʋɛɛ Timɔte ʋa, gá wo luʋɔsu, wɔi wo Egilisii zu Tesalonike taazuʋɛ, wo ga Ɠɛɛɠɛ GALA ta Maliɠii Yesu Kilista nɔnɔiti. Zaalai la wo ma, ta ziilɛigi ve wo ʋɛ!
Woo Niinɛ Ʋagɔi ná-dituɠɔmai Tesalonike
2 Gá GALA mamasu yeenɔpɛ wo pɛ wa-vaa zu, gi ɗa wa-vaa wo yeenɔpɛ gá-ƓALA faliiti su. 3 Wa-ɠidaaleʋei ma luʋa ʋele ʋagɔi ta wa-nɛɛbɛi ma wotii, naa ʋɛɛ wa-ɠitogi wɔɔlɔ ʋelei ʋa de-Maliɠii Yesu Kilista letegi, gá ɠizɛsu naati su GALA gaazu nii é ga ade-Ɠɛɛ. 4 Kɛ̀ɛleaiti, gi suɠwɛɛ ga GALA ge wo nɛa ʋɛ, é yiimazeɠe ga woye, ga wo ɠɛ ga ná-nuiti. 5 Mazɔlɔɔ gi la Woo Niinɛ Ʋagɔi laazeelini wo ma ga kpɔɛzuɠulai letelegi nɔ, kɛlɛ gi kɛɛni ɓalaa ga zɛbɛi, ta Zɛnvu Ɲadegai ná-kpɔbai. Naa ʋoluma, gi wola laani naa la, nii gi ɠɛni bosu. Wo suɠwɛɛ ʋelei gi ziɛni la wo zaama, é ɠɛ wo ʋɛ ga faa ʋagɔ. 6 Wo ʋilɛni gi-ɠɔɠɔ ʋogi ʋa, ta Maliɠii nɔnɔi. Wo kpɔlɔ mɔinmɔin sɔlɔɔni, kɛlɛ tama wo GALA daawooi zɔlɔɔni ga Zɛnvu Ɲadegai ná-koozunɛɛi. 7 Naa ma wo ɠɛa ga poogi kidaaleʋe nuiti pɛ bɛ Masedoane yooi zu ta Akayi yooi. 8 Mazɔlɔɔ Maliɠii laawooi zeɠeni wo ʋɔ bɛ, daazeeli Masedoane ta Akayi yooi pɛ su, kɛlɛ é la ɠwɛni miná, wo ɠidaaleʋe vai GALA ma, naama wooi vazaga mini-o-mini, gi ɓɛdɛ la mɔ ba ga gi ʋa naa ta wo. 9 Mazɔlɔɔ ti pɛ ta bosu, ʋelei wo yeezeini la gi wu, gi ʋaai ma wo ʋɔ bɛ, ta ʋelei wo ɠɛlɛni la kɔɔɠɔ ganigiti ba, wo lati GALA ma, ga wo ɗa botii ɠɛ zɛnvu su ƓALAGI ʋɛ, é ga GALA kitei, 10 wa ná-Doun Zunui Yesu maaɓɔunsu, é ʋa, é zeɠe geeɠɔlɔgi zu. Tɔ ɠa GALA ge buzeɠeni, é kula saai ya, tɔ ɠa é de ɠulazu GALA ná-ziiɠaawanai wu, nii é ʋaazu.