1 Zɛnvu Ɲadegai ɠa dɛɛzu kpezekele ga tanigaa ta ɠɛlɛ kidaaleʋei ʋa yeeɠɛɠala ɠaaɓelagiti su, tɔɔzei ta ɠili kaka zɛnvuiti ba, ta inɛgiti ta-ɠalagiti. 2 Ta ɓɔɠɔ yɛsu ná, ti ɠaka ga zɛɛ wo nuiti ta-wooveledai maaʋele, niiti ta-ɠisiɛi zaai na, eɠɛ kɔlu ɓɔii a ziɛ ma, é gala. 3 Nui naati ta kalagi wosu ga é la ʋani ga nu anza zei, ta kɛni nu daamianigi tanigaa maaɲɛ. Kɛlɛ GALA ge naama laamianigiti kpɛtɛʋɛ ga kidaaleʋe nuiti ti gaamai ɠwɛɛ, ti mi faanɛɛ wuuɠwɛɛgai zu. 4 Mazɔlɔɔ nii kpein GALA ge kpɛtɛai, ti pɛ pagɛ, tanɔpɛ ge la ná, nii nu a ɠɛlɛ ba, ni nɔ nu ɠa seɠezu ga faanɛɛ wuuɠwɛɛgai GALA bɛ, 5 tɔɔzei GALA daawooi ta GALA falii ɠa é ti pɛ ɲadesu.

6 Ni ɗa niima ɠalagi wona ga de-ɠɛɛleaiti, ɗa ɠɛ ga Yesu Kilista ná-botiɠɛ nu ʋagɔi, kɔnɔgi ga kidaaleʋei ma wooiti ta gaama ɠalagi, nii è ʋilɛgai polu ga pagɔ. 7 Kɛlɛ ɠɛlɛ ɠimalala vaalaaliiti ba, niiti ti la zolooni kidaaleʋei ma. Ɠaaɓa GALA gaazuluabai zu, 8 kpusɛi ná-maaɠoloi losu go ɠa ba. Kɛlɛ GALA gaazuluabai vizɔgɛ fai pɛ su, zɛnvui é wosu eteai nii zu, naama minazeɠegi ɠa su, ta zɛnvui é ʋaazu wosu etea niinɛi zu. 9 Naama wooiti ta ga lada ɓɔɛi, maanɛai ɛsɛ pɛ ge yeezei bu. 10 Naa ɠa é ba, gá botii ɠɛɛzu, gi ɗa ɲɛpii ɠɔ, tɔɔzei ba ga gi ɠitogɛ zɛnvu su ƓALAGI ʋa, é ga nuɓusɛi pɛ Kizo Nui, ma un ge daa ma ga kidaaleʋe nuiti.

11 Niima vaiti ka ɗa ti-ma levei ve, è ma ɠalagiti bo. 12 Mina va bu nu nɔpɛ ge ʋa sumɔ ɗa-loungo vai ma, é ʋa è ʋɛlɛʋɛlɛ, kɛlɛ ɠɛ kidaaleʋe nuiti bɛ ga poo pagɔ, è ɓɔɛ ʋelei zu, è-ziɛ ʋelei zu, ɗa-nɛɛbɛi zu, ɗa-ɠidaaleʋei zu, ta ɗa-ɲadedai zu. 13 Eyɛsu gè ʋa, ɠaaɓa, è ɗa GALA Sɛʋɛi ɠala gaalɛbaiti su, è ɗa tɛnɛgi wo, è ɗa nuiti kala. 14 Mina yeema zɛnvu zu vebɛanii ma, è sɔlɔɔni, GALA ná-kulakɛlɛma vai zu, siɛgi zu Egilisi lotuɠɔiti ti yeelaani la è ma. 15 Ɠaaɓa, è niima wotii ɠɛ, è ɓɔɠɔ ve zea ɲɛgɛlɛin, naa ɠa a kɛ ɛsɛ pɛ ge è ɠa, è ɗa li luɠɔma. 16 Dama ga ɓɔɠɔ, è dama ga ɗa-ɠalagi wo pelei, lo kpaan naa pɛ su. Mazɔlɔɔ ni ɗa naa ɠɛɛzu, ɗa ɓɔɠɔ ɠizosu, è naati ɓalaa kizo, niiti ti woilosu è-woo ma.