1 Loɓoame ná-masa fai zei ʋele ɓɛtɛai ma kpɛ, é la mɔ ɠɛni kɛɛzu é ʋa ɠolo Ɠɔoɠɔ GALAGI ná-tɔgiti bɛ. Izilayɛle nuiti pɛ ti ʋokɔɠɔni ma naa zu. 2 Loɓoame ná-konagi lɔɔlusiɛi ma masadai zu, Ezipete masagi Sisake lɛɛni Zeluzalɛme laalɔɠɔma. Wooʋaladai nii Izilayɛle kɛɛni ga Ɠɔoɠɔ GALAGI, naa zuɓoloi ɠɛni ga naa ti ɠɛni kɔmɔsu. 3 Sisake zeɠeni Ezipete ga kɔɔɠɔ wotolo waagila unfelegɔ (1.200) ta soo ɓizɛ zalaʋusu waaʋuulɔzita (60.000), é ɠɛni kɔɔʋɛbɛ wola untuɠɔ nii nu la zooga gaalusu, niiti ti ɠɛni ga Ezipete nuiti, Liɓi nuiti, Suki nuiti, ta Etiyopi nuiti. 4 É Zuda laa wolaiti soni, eyɛsu é zeeli Zeluzalɛme ma.

5 GALA goo wo nui Semaya liini, é Loɓoame ta Zuda lotuɠɔiti pɛtɛ, niiti ti ɠaalɛɛni ba Zeluzalɛme, siɛgi zu Sisake ɠɛni maaɓuɠazu la, é ɠɛ ti ma: «Ɠɔoɠɔ GALAGI wooi ɠaa: ‹Wo ɠɛlɛa bà, nà ɓalaagi gè ɠɛlɛa wo ʋa, gè wo yɛ Sisake yeezu.› » 6 Izilayɛle lotuɠɔiti ta masagi ti ɓɔɠɔmaayeini, ti ɠɛ ma: «Ɠɔoɠɔ GALAGI lelebogɛ.» 7 Siɛgi zu Ɠɔoɠɔ GALAGI kaani la ga ta ɓɔɠɔmaayeizu, é ɓɔɛni ʋolu Semaya ʋɔ ga niinɛ, é ɠɛ ma: «Tɛi ti ɓɔɠɔmaayeiɗa, gè la mɔ ti undaaʋilisu, su la mɔ ɠoozani, gè ti unmɔɔ, naa ʋolu nà-ziiɠaawanai la yeizu Zeluzalɛme ma ga Sisake maaʋele. 8 Naa pɛ ge ɠɛɛ ʋa, ta yɛsu naa yeezu, naazu ta zɔɠɔzu ɠa niina botii ɠɛai ʋa bɛ̀, ta botii ti kɛɛzu zou ɠili su masagiti bɛ.»

9 Ezipete masagi Sisake ʋaani, é kɔɔi vala Zeluzalɛme ʋa. É Ɠɔoɠɔ GALAGI zei ʋɛlɛi wu naavolo makɛsuʋɛ anii pɛ seɠeni ta masa pɛlɛi wu geleiti, é anii pɛ seɠeni. É lati, é zanu kɔɔɠɔ zɛpɛgiti seɠe, niiti Salomɔn ti ɓɛtɛni. 10 Masagi Loɓoame naati maavalibogi ɠɛɛni ga kɔlu ɓɔi kɔɔɠɔ zɛpɛgiti, é ti ve salaʋusui niiti ti ɠɛni masa pɛlɛi laaʋɛ makɛsu, naati ta-ɠundiɠiiti zea. 11 Masagi li laa ɠilagila Ɠɔoɠɔ GALAGI zei ʋɛlɛi ma ɠoizuʋɛ, salaʋusuiti ti ɓena kɔɔɠɔ zɛpɛgiti seɠe, naa ʋoluma ti ɠale ma ga tiye, ti ti la ma ʋɛlɛi wu. 12 Siɛgi zu Loɓoame ɓɔɠɔmaayeini la, Ɠɔoɠɔ GALAGI ná-ziiɠaawanai zeɠeni ma, é la mɔ ɠɛni ɠoloɠoloni mɛtu. Tɔun vɔlɔ faa ʋagɔi tanigaa ti ɠɛni dɛ ɠɛɛzu Zuda yooi zu.

13 Masagi Loɓoame masadai ɠɛɛni Zeluzalɛme, é ná masadai zapelɔɔni. Ná-konagi ɠɛni ga puunaani maazu ɠila (41), siɛgi zu é zeini la ga masagi. Kona puugɔ maazu lɔfela (17) ɠa é kɛɛni masadai zu Zeluzalɛme, taai nii Ɠɔoɠɔ GALAGI yiimazeɠeni la Izilayɛle wolodamaiti pɛ saama ga tɔɠɔi ʋɛɛ ná ʋa. Loɓoame dee laa ɠɛni ga Naama, Amɔn nu ɠɛni de. 14 É Ɠɔoɠɔ GALAGI wanama vai ɠɛɛni, mazɔlɔɔ é la ɠɛni ɠilizu naa ʋa ga yii pɛ. 15 Loɓoame ná-kɛɛwotii, é zo ma mɔungiti ma, é li gaaɓelagiti pɔ, naati sɛʋɛʋɛ GALA goo wo nuiti Semaya ta Ido ta-zɛʋɛi zu, boloda lɔlɔ sɛʋɛi zu. Kɔɔi yɛni nɔ ɠɔ Loɓoameni zɔɠɔzu ta Zeloɓoame. 16 Loɓoame zaani. Ti maaɠuluni Davide ná-taa wolai zu. Ná-doun zunui Aɓiya ɠa é masadai ɠɛɛni potogi zu.