1 Gá tɔɔzeizu ga gi ɓɔɠɔ ɠaliva, gá ɓɔɠɔi ɓaa? Ɓaa, gi ɓɛdɛ ɠa é ba, eɠɛʋelei tanigaani ti la, gi gi ɠalivaa zɛʋɛ ve wo ya, ɓaa gi ta maaɠaazaɠabo wo ma? 2 Wa ɓɔɠɔi ɠa wo ga gá-zɛʋɛi, sɛʋɛai gi-yiimaʋɛti, nuiti pɛ ta zoo kwɛɛsu, ti ɗa kala. 3 Koleʋɛ ga wa ga Kilista ná-sɛʋɛ ɠɛai, nii kalivaai gá-wotii ma, kɛlɛ é la zɛʋɛni ga sɛʋɛ ɗɛi, kɛni zɛnvu su ƓALAGI ná-Zɛnvui, é la zɛʋɛni kɔtu ɠokolo ma, kɛni nuiti ziimaʋɛti.

4 Naama ladalai ɠa gi sɔlɔɔgai Kilista ya, GALA gaazu. 5 Tama naa la bosu ga, gá ɓɔɠɔi gá zoo ɠisiɛzu ga gi faa nɔpɛ kɛ giya ɓɔɠɔi ga gi-zɛbɛi. GALA pɔ bɛ ɠa gá-zoofaalai pɛ ge zeɠezu ná. 6 É zobogi ɓalaa fea gi ya, ga gi ɠɛ ga minazeɠe niinɛi ma wotiɠɛ nuiti. Naa la ɠɛɛni tɔ sɛʋɛi zaɓui zu, kɛni Zɛnvu Ɲadegai. Mazɔlɔɔ tɔ sɛʋɛai ɠa ɗa paai wo, kɛlɛ Zɛnvui ɠa zɛnvui veezu.

7 Tɔgi naa zu wooiti ti zɛʋɛni kɔtui ma, tama Moize ɠɛni botii ɠɛɛzu tɔgi naa ʋɛ, nii é ɠɛni saai veezu. Anɛɛ naa ʋe, naama wotii ɠɛni lɛbiya wola veezu zea. Lɛbiyai naa maaʋele ma, nii é ɠɛni volozu gaazuʋɛ, Izilayɛle nuiti ti la ɠɛni zoosu ti ʋa wɛlɛ gaazuʋɛ ʋa. Lɛbiyai naa ma ge la ɠɛni lɛbisu. 8 Zɛnvu Ɲadegai ná-botii ma lɛbiyai la wɔɔlɔa, é ʋa leʋe naa ʋa ɓaa? 9 Lɛbiyai ɠɛni botii naa zu nii é ʋaazu ga nuɓusɛiti peelalai vai, tama zɔɔma wotii é nuɓusɛiti kɛɛzu ga telebo nu GALA gaazu, naa ná-lɛbiyai wola ɠa wɔɔlɔ. 10 Lɛbiyai nii é voloni wɔlɔwɔlɔi zu, naa ɠaaʋa niizuʋɛ lɛbiyai ɠaazu, nii teʋegai ba gola. 11 Tama ni zɔi é ɠɛni ná yeeɠɛɠala go laawu, naa lɛbiya zɔlɔɔni, zɔi é ná ɠɔoɠɔ, naa ná-lɛbiyai wola ɠa wɔɔlɔ.

12 Tɔɔzei naama ɠitogi ɠa gi ya, gi-yiimaʋɛ laavegɛ ga ladalai. 13 Gi la kɛɛzu ga Moize ɠɛʋele, nii é seɠei ʋɛɛni ɠaazuʋɛ, Izilayɛle nuiti ta ʋa lɛbiyai ɓe pelei ɠa, nii é la ɠɛni lɛbisu. 14 Ta-ɠisiɛi la ɠɛni zooni é ʋa niima vaiti gaaɠa. Zaaɠaza, siɛgi zu ti minazeɠe pɔlɔmai ma zɛʋɛiti kalasu da, seɠe ɠilagi naa ɠa dɛ ʋɛɛni ta-ɠisiɛiti gaazu. Seɠei naa la zooga a ʋa zeɠe ná, kɛni nui nii a ɠili Kilista ʋa, toɠa zeɠe naa ɠaazu. 15 Zaaɠaza, siɛgi zu ti Moize ná-sɛʋɛiti kalasu da, seɠei naa ɠa dɛ ʋɛɛni ta-ɠisiɛiti gaazu. 16 Kɛlɛ siɛgi zu nu latisu da Maliɠii ma, seɠei ɠa zeɠezu ná. 17 Tɔɔzei Maliɠii ɠa ga Zɛnvui, ʋɛ Maliɠii ná-Zɛnvui ná, miná ɠa wɔɔlɔyai ná. 18 Ade kpein dɛiti de ɠaazu ɲakai, da wɛlɛzu, eɠɛ da ɠɛ wɛlɛzu pɛtɛgi zu, de ɗa Maliɠii ná-lɛbiyai ɠa. Naa ɠa de valibosu tɔun maaniinigi zu, naama lɛbiyai zu, nii é liizu nɔ ga wɔɔlɔa. Botii ɠana nii Maliɠii ná-Zɛnvui kɛɛzu.