1 De kwɛɛ de ɠɛ, ni seɠe ɠotai de eteai ziɛzu bu, é ga de-ɓusɛi, naa a ɠoloɠolona, pɛlɛ ɠa de yeema geeɠɔlɔgi zu, nii GALA ge togai tɔ ɓɔɠɔi, eyɛsu ná ɠɔoɠɔ, nuɓusɛ yee laade é ʋa to. 2 Ada kpalagi wosu ɓalaa niizu, de wɔinʋɛ ga de zɔɔma zeɠei loo ɠɔba, nii é ga da-ʋɛlɛi é geeɠɔlɔgi zu, 3 tama ni naa ɠa de ɠɔba, de maaɲaka la ɠɛa de. 4 Mazɔlɔɔ, ni da dɛ eteai ziɛzu nɔ seɠe ɠotai tɛi bu, ada ɓalakpalasu, eɠɛ da ɠɛ kasɔ wu. É la ga da pɔ de de-ɓusɛi ɠula ɠɔba, kɛlɛ da pɔ ga geeɠɔlɔgi zu ɓusɛi loo de ɠɔba, naa ɠa a kɛ, zɔi é ga saa gele, naa maaɓɔle ga zɛnvui. 5 Tama GALA ɓɔɠɔi ɠa é naama valibo fai levea ade ma, é ná-Zɛnvui ve ade ya, ga faanɛɛiti ti ʋaazu naati ma ʋoogi.

6 Naa ɠa é ba, ade laavegɛ ga ladalai yeenɔpɛ, de kwɛɛ de ɠɛ, ni nɔ dɛ da niima ɓusɛi zu, de maaɠoozaʋɛ Maliɠii ʋa, 7 mazɔlɔɔ ada ziɛzu ga kidaaleʋei, wozaɠaai laade. 8 Ade laavegɛ ga ladalai, wɔin ɠa de ma gola, ga de zeɠe niima ɓusɛi zu, de li, de yɛ Maliɠii ʋa. 9 Naa ɠa é ba, de ɠaaɓaazu la ga de yɛni niima ɓusɛi zu, ɓaa de ɠulani su, de nɛɛ tɔun bɛ. 10 Mazɔlɔɔ kɛni ade pɛ de ɠula kɛlɛma, de lo, ʋɛ Kilista tukpɔi ɠaaleʋezu ná, naa ɠa a kɛ, ɛsɛ pɛ ge sɔlɔɔ, é zoloo ná-faa ʋagɔi ma, ɓaa ná-faa ɲɔi ma, nii é kɛɛni, siɛgi zu é ɠɛni la kpusɛi zu.

11 Gi Maliɠii ɠaazuluabai ʋoluʋɛ ɠwɛɛ, naa maaʋele ma, gá pɔ gi nuɓusɛi pɛ kigi lati. GALA ge gi ɠwɛɛ mɛtu. Nà ɠisiɛzu ga wa ɓɔɠɔi wa-ɠisiɛi zu, wo gi ɠwɛɛ ɓalaa. 12 Gi la ɓɔɠɔ lɛɛzu ga woye ga niinɛ, kɛlɛ gá yeeɠɛɠalai yɛsu wo ya, wo ɗa ɓɔɠɔ maamusɛ ga giye. Naazu wa zoo wo naati gooɠaaʋote, niiti ti wasosu ga kɛlɛzu vaiti nɔ, ti la nui yiimaʋɛ vaiti kaazu. 13 Tama ni gaama ʋe ga ɠi ge la gi ma, gá ɠana GALA bɛ, ni tama ɠi pagɔ ɠa gi ma, toɠa gi ma wo ʋɛ. 14 Mazɔlɔɔ Kilista ná-nɛɛbɛi ɠa zeini gi unda, gɛiti gi laai da ga tɛi nu ɠila ge zaa nuiti pɛ bɛ, naa maaʋele ma, ɛsɛ pɛ ge zaa. 15 É zaani nui pɛ bɛ, naa ɠa a kɛ niiti ti yɛnvuzu, ti mina mɔ yɛnvu ɓɔɠɔ ʋɛ, kɛni naa ʋɛ, nii é zaani, é wuzeɠe, é ɠula saai ya ti ʋɛ.

16 Naa ɠa é ba, é zo niizu ma, gi la mɔ nu nɔpɛ kaa ga kpusɛi ná-kɛʋelei maaʋele. Ni gi Kilista ɠaani ga kpusɛi ná-kɛʋelei maaʋele, niizu gi la mɔ kaa ga naama ɠɛʋelei maaʋele. 17 Naa ɠa é ba, nu nɔpɛ ta ɠilina ʋa ta Kilista, naa ɠɛa ga kpɛtɛani niinɛ. Nii é ɠɛa ga ma wɔlɔmai, naa leʋega, é ɓe, pɛtɛ, ma niinɛi ɠa é ná niina. 18 Naa pɛ ka ga GALA ná-botii, tɛigi é ade yɔɠɔzuɓɛtɛa ada tɔ ɓɔɠɔi ga Kilista maaʋele. É zɔɠɔzuɓɛtɛ wotii ɠalivaaʋɛ gi ma. 19 Mazɔlɔɔ, GALA ge botii ɠɛɛni ga Kilista maaʋele, é nuɓusɛiti ta tɔ ɓɔɠɔ ti yɔɠɔzuɓɛtɛ ga tɔun maaʋele, é la nuɓusɛiti ta-vaaɠaazagiti deveni ti ʋɛ. É gi ɠɛ ga zɔɠɔzuɓɛtɛ ɓɔɛi laazeeli nuiti.

20 Gá ga Kilista ɠaazuʋɛti, gi ɗa gooi wo wo ma, GALA ge ɗa ɓɔɛ wo ʋɔ ga gi maaʋele. Gá wo maanɛɛnɛzu Kilista laaseigi zu, à va bu, wo yɔɠɔzuɓɛtɛ wa GALA. 21 Kilista la ɠɛni koto nɔpɛ kɛɛni, kɛlɛ GALA ge ada-ɠoto ɠasɔi laani tɔun unma, nii a kɛ da-ɠilibalai zu da Kilista, de ɠɛ GALA gaazu ga telebo nuiti.