1 Kɛ̀ɛleaiti, gá pɔ ga wo naa ɠwɛɛ, ʋelei GALA ná-zaalai ɠulaai la kɛlɛma Masedoane Egilisiiti su. 2 Ʋoluɠulai ɠɛɛʋɛ ga kpɔlɔ wola, é zeeli kidaaleʋe nuiti ma, kɛlɛ ta-ɠoozunɛɛi wɔɔlɔ ʋelei ma, ti ɓɔɠɔ lɛɛni ga ta ga faanɛɛ ɠɛ nua, anɛɛ ni ta ga bala nu ga gola. 3 Gè bo wo ma ga gaamai, ti feeni, eɠɛʋelei ti-zoodai ɠɛni la. Ti feeni vɔlɔ é ɓudɛ ta-zobogi maazu, ti kɛ ga tiya ɓɔɠɔi ti-yiimai. 4 Ti ɠilini gi ma ga maanɛɛnɛ wolai, ga gi ma zobo fe ti ʋɛ, ga gi ɓɔ ti ʋa, kpɔba anii leʋe fai zu GALA ná-nuiti ma Zeluzalɛme. 5 Ti la ɠɛni kɛɛni nɔ ga eɠɛʋelei gi-ɠigi ɠɛni ba la, kɛlɛ ti ɓɔɠɔ veeni mɔunpa Maliɠii ya, naa ʋoluma, GALA ziimai maaʋele ma, ti ɓɔɠɔ ve gi ya.

6 Naa ɠa é ba, gi Tite maanɛɛnɛni ga é ʋa wo ʋɔ bɛ, é yeeyɛ faanɛɛ ɠɛɛ wotii naa ʋa eyɛsu gaaɓela, eɠɛʋelei é tɔɔzeini la. 7 Fai pɛ gaavɔnigɛ wo zaama: kidaaleʋei, kpɔɛzuɠulai, faaɠwɛgi, sɛbɛzeɠei ma zii pɛ, nɛɛbɛi ɠa wo-yiimaʋɛ é lo gi ʋa. À ɠaaɓa, wo li luɠɔma ɓalaa faanɛɛ ɠɛɛ wotii zu.

8 Deve laade gè ʋa ɠɛ feezu wo ya, kɛlɛ zɔiti ta-zɛbɛzeɠei ma vaa ɠa gè bosu, naa ɠa a kɛ gè wa-nɛɛbɛi wuuʋɛtɛ ga pagɔ. 9 Mazɔlɔɔ wo ade-Maliɠii Yesu Kilista ná-zaalai ɠwɛɛ, tɔungi é ɓɛtɛni gola, kɛlɛ é ɓɔɠɔ ɠɛɛni ga bala nui wo ʋɛ, nii a kɛ wo ɓɛtɛ ná-baladai zu.

10 Naa ma, nà kìsu vai wosu é ʋilɛ niima vai ʋa: Soloogɛ wo ma ga wo yeeyɛ naa ʋa, nii wo tɔɔzeini konagi teʋegai. Wa ɠa wo ɠɛni ga ma mɔungi, é la nɔ ga wo zeeɓɔgi wo, kɛlɛ wo ɠɛʋele ɓɛtɛni ga wo kɛ. 11 À yeeyɛ ba niina, wo niima ɠɛɛwotii ɠaaɓela. Kisiɛ ʋagɔi é ɠɛni wo-yiimaʋɛ wo deveai ma, à ʋilɛ naa ʋolu, wo gaaɓela, é zoloo zobogi naa ma, nii é wo ya. 12 Siɛgi zu nu feezu la ga ɗa ɓɔɠɔi è-yiimai, GALA ka ɗa-vebɛanii naa zo, é ɠisiɛ naa zu nii é è ya, é la ga zɔi é la nu ya.

13 É la ga gè wo lɔ kidaaʋiligi zu, gè zɔiti maavizɔ, kɛlɛ kɛni wo ɠaa ɠɛ sɔli. 14 Niizu anii mɔinʋɛ wo ya. Naa ma, wa zoo wo ɓɔ naati ba ti kpalai zu. Naa ʋolu, yeeta wa ɠɛna kpalai zu, anii mɔinɗai ti ya, ta zoo ti ɓɔ wo ʋa. Ʋele ɠana faiti gaa a ɠɛ la sɔli, 15 eɠɛʋelei sɛʋɛai la GALA Sɛʋɛi zu, é ɠɛ ma:

16 Nà GALA mamasu, nii é wa-vai ma yiizoolɛi lɔai Tite yiima ga nɔ̀un kɛʋele! 17 Mazɔlɔɔ falimai gi boni la, é yeezeini bu gaamago nɔ. É ɠaazuvilɛni ga devea tɔ ɓɔɠɔi ga é ʋa wo ʋɔ bɛ. 18 Gá teʋesu, ta ɠɛɛɠɛloin naa, nii maamusɛ wooi wosu Egilisiiti pɛ su, tɔɔzei ná-botii ʋa é kɛɛzu Woo Niinɛ Ʋagɔi vaa zu. 19 É ɓudɛ naa maazu, tɔ ɠa Egilisiiti ti yeeloni ba ga é gi maazaa siɛi ma, gi faanɛɛ ɠɛɛ wotii ɠɛɛzu su, é ɠɛ ga lɛbiyai Maliɠii ʋɛ, é ɠɛ ga zeele wooi, é lɛ ga gi wɔinʋɛ ga gi ɓɔ zɔiti ba.

20 Gá ɠaaɓaazu, gi dama, ga nu nɔpɛ ge mina gi ʋeelala, ʋelei gi ɓaazu la vebɛani ɓiigi tɛi maazu. 21 Mazɔlɔɔ gá ɠaaɓaazu, gi naa ɠɛ nii sɔlegai, naa la nɔ ga Maliɠii ɠila gaazu, kɛlɛ é ɠɛ nuɓusɛiti ɓalaa gaazu.

22 Gi ti leʋegɛ ʋɔɔma, ti ʋa ta gi-ɠɛɛloin, nii gi pɛtɛgai ga sɛbɛzeɠe nu ʋe, gi suɠɔɠɔgɛ faa mɔinmɔin su. Niizu mɔnɔ é ná-zɛbɛzeɠei lɛɛʋɛ, ta ʋelei daai la wo la gola. 23 Nii é ga Tite letegi, toɠa ga nà-botiɠɛɲɔɠɔi, gi botii ɠɛɛzu ʋɔɔma wo ʋɛ, gi-ɠɛɛleai zɔiti ta ga Egilisiiti ta-ɠeelaiti, Kilista ná-lɛbiyai ma vaa ma. 24 À dɛɛ ga tiye ga wo ti nɛɛʋɛ ʋɛ ɠiteɠite, naa ɠa a kɛ Egilisiiti ti la da, ti kwɛɛ ga gaamai ɠa gi ya, ga gi ɓɔɠɔ maamusɛ ga wa-vai ti ɠaazu.