1 Nɔ̀un nà Pɔle, nà wo maanɛɛnɛzu Kilista ná-sɛsɛbogi maaʋele ma, ta ná-nuɓɔɠɔlai, nɔ̀un nà, eɠɛʋelei ti bosu la, nà ɠɛna wo ʋa, nà ga ɓɔɠɔmaayei nu, màa a ɠoozana wo ʋa, nà ga zɛbɛsu nu wa-vaa zu, 2 nà wo maanɛɛnɛzu, à mina ɠɛ, kɛni gè ɓɔɠɔ lɛ ga zɛbɛsu nu, siɛgi zu gè ɠɛɛzu la wo ʋɔ bɛ, mazɔlɔɔ nà zoo gè dɛɛ ga nà ga zɛbɛsu nu naati daalɔɠɔma, niiti ti gi levezu ga gá ziɛzu nɔ ga kpusɛi zu vaiti. 3 Tama gá eteai ziɛzu kpusɛi zu, kɛlɛ gi la ɲɛpii ɠɔɔzu kpusɛi nɔnɔ ma ɠɛʋelei ma. 4 Kɔɔɠɔ zɔɔlaiti gi ɠɔɔzu ga tiye, ti la ga eteai zu nuɓusɛiti tɔnɔiti kɛʋele, kɛlɛ GALA ná-kɔɔɠɔ zɔɔla wolaiti be, niiti ti ada wolaiti suɓezeɠelesu. Gá zɛɛ vaiti suɓezeɠelesu, 5 ta nuɓusɛi ná-wasodai ma zobogi kpein, é wuzeɠezu GALA kwɛɛgai laalɔɠɔma. Gá kisiɛiti pɛ dɔɔzu duɔlai zu, ti ʋa ti ɠolo Kilista ʋɛ. 6 Gi ɠɛʋele ɓɛtɛʋɛ ɓalaa, ga gi woozotalai pɛ daazale, siɛgi zu wa woozoda laazeeliai pɛ kulana la kɛlɛma.

7 À faiti pɛtɛ ga pagɔ! Ni nui ta a ɓɔɠɔ levena ga toɠa ga Kilista nɔnɔ, tɔ ɓɔɠɔi é ɠisiɛ ɓalaa nii zu ga, gá ga Kilista nɔnɔiti ga tɔun kɛʋele ɓalaa. 8 Tama anɛɛ ni nà ɓɔɠɔ lɛɛzu su gola, tɔɔzei zobogi ʋa Maliɠii feai gi ya wo li vai zu luɠɔma kidaaleʋei zu, é la ga wo ɠoloɠolo faa, gè la unfega. 9 Gè la pɔ ga wo maalua ɠaazu ʋa ɠɛ bà nà-sɛʋɛiti su. 10 Mazɔlɔɔ ta ɠɛɛzu ma: «Ná-sɛʋɛi zu vaiti maayikiʋɛ, ti-zɛbɛi wɔɔlɔ, kɛlɛ tɔ ɓɔɠɔi a ɠɛna loni gi ɠaazu, zɛbɛ la ba, daawooiti ti la faa ʋaa.» 11 Kɛlɛ zɔi é ɓɔɛzu ɠana, kɛni é nii ɠwɛɛ: Zeeɠaaɠwɛɛzu la naati ba, nii gi sɛʋɛzu gá-zɛʋɛiti su, gá ɠɛna ada ɠili, ta nii gá kɛ siɛgi zu gá ɠɛ la wo zaama.

12 Gi la zooga gi ʋa ɓɔɠɔ la ti ma, ɓaa gi ʋa ɓɔɠɔ ʋokɔɠɔ naati ma, tɛiti ti ɓɔɠɔ lɛɛzu. Kɛlɛ ʋelei ti ɓɔɠɔ laazu la ɓɔɠɔ ma, ti ɓɔɠɔ ʋokɔɠɔ ɓɔɠɔ ma, ɠigi ɠana é la ti ma. 13 Gɔnɔi, gi la pɔ ga gi ʋa ɓɔɠɔ lɛ su, gi ʋa leʋe gi-ɠwɛsuʋɛ tanɔpɛ ba, gá ɠwɛsu naama ɠɔɠɔgi nɔ ʋa, nii GALA ge seiɗai gi luɠɔ, é ma zobogi veai gi ʋɛ, eyɛsu gi zeeli wo ma. 14 Siɛgi zu gi ʋaani la wo ʋɔ bɛ, gi la ɠɛni ɓudɛni naama ɠwɛgiti maazu. Gá ɠa gi ɠɛni ga nu mɔunpa gi zeeli wo ʋɔ bɛ, gi ʋa ga Woo Niinɛ Ʋagɔi é ʋilɛ Kilista ʋa. 15 Gi la ɓɔɠɔ lɛɛzu su, da ge ʋa leʋe, taɠili ná-botii ɠɛa maazu. Kɛlɛ naama ɠitogi ɠa gi ya, ga wa-ɠidaaleʋei a wɔɔlɔna, gá boti ɓii gola ɠiligaa ɠɛ wo zaama, gi yɛ loni, gi mina ɓudɛ gá-woti ɠɛɛzuʋɛ ma ɠwɛgi maazu. 16 Gá zoo ʋolu gi Woo Niinɛ Ʋagɔi laazeeli wo ʋoluʋele yooiti su, naa la bosu ga gi ɓɔɠɔ lɛ su naa maazu, nii taɠiligaa ti kɛai niina, tiya ɓɔɠɔi ta-wotii ɠɛɛzuʋɛ.

17 GALA Sɛʋɛi ɠɛ: «Zɔi é pɔ ga é ɓɔɠɔ maamusɛ, é ɓɔɠɔ maamusɛ Maliɠii ɠɛɛ vaiti su.»*10:17 Zel 9:23. 18 Kɛlɛ nui nii é ɓɔɠɔ lɛɛzu, naa la zeezeibu zɔlɔɔga, kɛni zɔi Maliɠii dɛɛzu.