GALA Daawoo Zɛʋɛi 2 Timɔte 1

Pɔle Ná-Sɛʋɛi Velesiɛi
É Teʋeni

Timɔte Ma

Sɛʋɛi lɔɔzeizuʋɛ ma woo mɔungiti

Timɔte ná-sɛʋɛi velesiɛi ɠa é ga sɛʋɛi velesiɛi nii keelai Pɔle teʋeni ná-kaladopoi Timɔte ma. Sɛʋɛi nii ɠɛɛʋɛ Pɔle ná-eteai ɠaaɓela siɛgi zu. É ɠɛni kasoi ɠa Wɔlɔme naama ziɛgi zu. Pɔleni ta Timɔte ti wola ɠilini ʋa, siɛ mɔinmɔin su é ɓena naa loli vɔlɔ ga ná-doun zunui (1Ti 1:2, 18; Fil 2:22).

Sɛʋɛi nii ɠa sɛʋɛ naanigɔiti saama niiti Pɔle ti leʋega nu ɠilagilagiti ma, kɛlɛ é la teʋeni Egilisi ma. Zɔ saʋagɔiti ta ga: Timɔte ná-sɛʋɛ mɔungi ta Tite nɔnɔi, naa ʋɛɛ Filemɔn nɔnɔi ʋa. Timɔte ná-sɛʋɛi velesiɛi nii ɠɛɛ ziɛgi zu, wɔinzeɠemai ɠa é ɠɛni keletiɛinti polu Wɔlɔme masa zooi zu ná pɛ. Kɛɛʋɛ eɠɛ naama vai maaʋele ɠa é kɛɛni Pɔle ɠɛni la kasoi ɠa, ta é ɠɛni Timɔte iɲɔdɔɔzu la ga naa yiilɔɔ kpɔlɔiti bu. É ɠɛni Timɔte ma ɓalaa, yeeɠɛɠala ɓaaɓaagiti ta ʋaazu (3:1).

Unsosuʋɛ

1. Pɔle tɔɔzeiʋɛ ga Timɔte luʋɔ fai (1:1-2), naa ʋoluma é naa iɲɔdɔɔ vai (1:3-18).

2. Naa ʋoluma é Timɔte zasulɔɔni ga naa yiilɔɔ kpɔlɔi zu (2:1-13).

3. É zɛba kalagi tanigaa ve zea é ʋilɛ kiti vai tanigaa ʋa (2:14-26).

4. É tooni ɠisu naa ʋolu é lo yeeɠɛɠalaiti ba ti ʋaazu, ta ʋelei a zoo ɓɔɠɔ zosu da naama ziɛgi zu ga pagɔ (3:1—4:8).

5. Pɔle ná-sɛʋɛi ɠaaɓelagɛ ga fai tanigaa é zumɔgai, é lo Timɔte ɓɔɠɔi ʋa (4:9-22).

Tuʋɔ gooiti

1 Nɛ̀i gè ga Pɔle, gè ga Yesu Kilista ná-keelai, GALA ziimai maaʋele ma, nɛ̀i tèʋegai ga gè ɗa minazeɠe zɛnvui ma vai laazeeli, de sɔlɔɔsu da-ɠilibalai zu da Yesu Kilista, 2 nà è luʋɔsu, Timɔte, dòin è nɛai bɛ̀ gola. Ɠɛɛɠɛ GALA ta de-Maliɠii Yesu Kilista ti zaalai la è ma, ti è maawɔinɠa, ti ziilɛigi ve è ʋɛ.

Mamagi ta iɲɔdɔɔi

3 Nà GALA mamasu, nii gè botii ɠɛɛzu bɛ kisiɛ ʋagɔi zu, eɠɛʋelei mɛ̀mɛwolani ti kɛɛni la bɛ, nà ɗa ɠisiɛ è zu yeenɔpɛ nà-GALA faliiti su, kpidi ʋɛɛ folo ʋa. 4 Nà ɗa ɠisiɛ è-ɠaazuɗɛi zu, wɔin ɠa mà gola ga gè è ʋɛtɛ, nii a kɛ zìimaʋɛ laave ga koozunɛɛi. 5 Kì ka ɗa-ɠidaaleʋei zu, nii wooveleda la su. È-lee Loyise ta è-leewola Enise ɠa naama ɠidaaleʋei ɠɛni ti ya è luɠɔ. Dàaʋɛ da ga zekana é è ya la ɓalaa. 6 Naa ɠa é ba, nà è loozu ɠisu, ga è GALA ná-vebɛanii niinɛ ʋolu, nii è sɔlɔɔni, siɛgi zu gè yeelaani la è ma. 7 Mazɔlɔɔ Zɛnvui GALA ge feai de ya, é la de ɠɛɛzu ga ladalala nuiti, kɛlɛ ná-Zɛnvui ɠa zɛbɛi veezu de ʋɛ, ta nɛɛbɛi, naa ʋɛɛ ɠimalai ʋa.

8 Naa ɠa é ba, mina unfe ga zeele wooi wo fai Maliɠii ʋɛ. Mina unfe ɓalaa ga ze, nɛ̀i gè ga kasoɠa nui ná-faa zu. Kɛlɛ kɛni è ɗɔnɔ zɔlɔɔ kpɔlɔi zu Woo Niinɛ Ʋagɔi vaa zu, eɠɛʋelei GALA ge ma zɛbɛi veezu la è ya. 9 Tɔ ɠa é de ɠizogai, é de loli ga toli ɲadegai, naa maa la zɔlɔɔni ga kɛɛwotiiti maaʋele niiti de ti ɠɛɛni, kɛlɛ tɔɔzei é seini kpasu, é deve ɠana, ná-zaalai zu. É naama zaalai veeni de ʋɛ ga Yesu Kilista maaʋele, kaite aisa wɔlɔwɔlɔi. 10 Kɛlɛ zaalai naa ɠulaa kɛlɛma niizu de ʋɛ, ga de Ɠizo Nui Yesu Kilista ʋaa vai. É saai ná-zobogi ɠulaai zea, é zɛnvui ta saalalai ɠula kɛlɛma ga Woo Niinɛ Ʋagɔi.

11 GALA ge kàsɔɠiliʋɛ ga gè Woo Niinɛ Ʋagɔi naa laazeeli, gè ɠɛ ga keelai ta kalamɔin. 12 Naa ɠa é ga nà-kpɔlɔiti ma ungi. Kɛlɛ gè la unfesu ga naa, mazɔlɔɔ gè naa ɠwɛɛ, nii kìdaaleʋeai ma, dàaʋɛ da ga zobogi ɠa bɛ, nii é kalivaai mà, é naa makɛ eyɛsu tukpɔɠaaleʋe voloi. 13 Gaama ɓɔɛiti è ti mɛnigai dà, ziɛ ga tiye, kɛ kidaaleʋei ta nɛɛbɛi zu ti zɔlɔɔsu ni nu ɗa ɠilina Yesu Kilista ʋa. 14 Makɛ kala pagɔiti ma, ti ɠalivaai è ma ga Zɛnvu Ɲadegai maaʋele, nii é zeini ade-yiimaʋɛ.

15 È suɠwɛɛ ga niiti pɛ ti Azi yooi zu, ti màaɠelesa teʋea, ma un ge daa ma mɛɛ ga Fizɛle ta Ɛlemozɛne. 16 Maliɠii ná-maawɔinɠai ɠɛ Wonezifɔle ná-pɛlɛyeɠei ʋɛ, mazɔlɔɔ é ɠɛni ìɲɔdɔɔzu yeeɠɛɠala mɔinmɔin su, é la ɠɛni unfeni ga nà-kasoɠa vai, 17 tɔun siɛgi zu é ʋaani la Wɔlɔme, é gàiziɛni gola, eyɛsu é kà. 18 Maliɠii va bu, é GALA ná-maawɔinɠai zɔlɔɔ tukpɔɠaaleʋe voloi. È suɠwɛɛ ga pagɔ, botii kpein é kɛɛni bɛ̀ Efɛze taazuʋɛ.