1 Naa ɠa é ba, GALA ta Yesu Kilista ɠaazu, Kilista nii é ʋaazu nu vuluiti ta gɔvɛiti tukpɔɠaaleʋezu, ta tɔun paa vai ta ná-masadai maaʋele ma, nà devei nii veezu è ya, gè maaɓakpa, naama levei ɠa é ga: 2 GALA daawooi laazeeli, daazeeli ga gilimai siɛnɔpɛ su, ma yeeɠɛɠala ɠɛni de, ɓaa ma yeeɠɛɠala mina ɠɛ de, gaalɛɛ ga pagɔ, è zelii lo, è nuiti iɲɔdɔ, è ɗa kalagi wo ga ziilɔɔ laazeeliai pɛ. 3 Mazɔlɔɔ yeeɠɛɠalai ɠa ʋaazu, názu nuiti ti la mɔ wɔinɗa ga ti ʋa woilo gaama ɠalagi ma, kɛlɛ ta ʋilɛ ti ɓɔɠɔyiimaiti nɔ ʋolu, ta kalamɔinti gaalɛ ba, ga nii nɛai ti ʋɛ, naati ti ɗa naa nɔ wo ti ma. 4 Ta ɠɛlɛ woilosu gaamai ma, ti ɠaaʋote zɛɛ vaalaali ɓɔɛiti ma. 5 Kɛlɛ ɗɔun, ɠɛ ga sɔɓelama nu fai pɛ su, è yiilɔɔ kpɔlɔiti bu, ɗa-lɛnɛbo botii ɠɛ Woo Niinɛ Ʋagɔi laazeeli vai zu, ɗa-wotii ɠaaɓela ga pagɔ.

6 Mazɔlɔɔ nɔ̀un, nà ga ʋa ɠɛɛzu ga puya zalaɠai, dìi yeei zeelia. 7 Gè kɔɔ ʋagɔi ɠɔa. Gè nà-kpizɛi ɠaaɓelaga. Gè kidaaleʋei makɛgɛ. 8 Niizu niina, masa bɔɔlɔgi é ga telebo kelei, naa makɛgɛ bɛ̀. Maliɠii, tukpɔɠaaleʋe nui telebogai, naa ɠa é feezu zèa naama volo ná. Nà ɠila taade, kɛlɛ toɠa fe naati pɛ zea, niiti ti ná-kulakɛlɛmai maaɓɔunsu, nɛai ti ʋɛ.

9 Ɠaaɓa, è ʋa pɔ̀ bɛ fala. 10 Mazɔlɔɔ Demase ɓeteʋea bà, tɔɔzei eteai nii zu vaiti gola nɛɛʋɛ bɛ, é lia Tesalonike. Kelesɛnse liiʋɛ Galate yooi zu, Tite li Dalamasi yooi zu. 11 Luke ɠila kpe nɔ ɠa é bà ʋɛ. Maleke zeɠe, è ʋaa la ʋɛ, mazɔlɔɔ toɠa zoo é ɓɔ bà nà-botii zu. 12 Gè Tisike leʋegɛ Efɛze. 13 Ɗa ɠɛna ʋaa, ʋa bɛ̀ ga tookɔba wolai gè zɛni Kaalapuse ʋɔ bɛ, Toloase, ta sɛʋɛ ɓiligiti, ma un ge daa ma mɛɛ ga kɔlɔ zɛʋɛiti.*4:13 kɔlɔ zɛʋɛiti: ti ɠɛni ga kɔlɔ ɓiligi ti ɓɛtɛai ga baala kɔlɔi ɓaa boli ɠɔlɔi, nii ti ɠɛni sɛʋɛi ɠɛɛzu ma.

14 Ɠain bo nui Alɛgezandele faa ɲɔi wola ɠɛɛʋɛ ga ze. Maliɠii ɠa sala, é zoloo ná-kɛɛwotiiti ma. 15 Ɗa ɓalaagi, dama la, mazɔlɔɔ buzeɠeʋɛ gá-ɓɔɛiti daalɔɠɔma gola.

16 Kɛ̀ai ma ɓɔɠɔ maalobosu mɔungi tukpɔɠaaleʋezuʋɛ, nu nɔpɛ ge la ɠɛni loni pòlu, kɛlɛ ti pɛ ti ɠɛlɛni bà. GALA ge mina naa leve ti unma. 17 Kɛlɛ Maliɠii ɠa é ɓɔni bà, é sɛ̀bɛlɔ, naa ɠa é kɛɛni, gè zooni gè GALA daawooi laazeeli ga pagɔ zii ɠiligiti pɛ ma, gè ɠula zalai la. 18 Maliɠii ɠa kùla kɛɛwoti ɲɔiti pɛ su. Toɠa kìzo, é dɔ̀ ná-masadai zu geeɠɔlɔgi zu. Lɛbiyai ɠɛ tɔun bɛ, eyɛsu ɠɔ! Amina!

19 Gè Pilisile ta Akilase luʋɔ, ta Wonezifɔle ná-pɛlɛyeɠei. 20 Elasete yɛgɛ Kolɛnte, ta gè Tolofime yɛgɛ Milɛ, tɔɔzei é la ɠɛdɛni. 21 Ɠaaɓa, è ʋa pɔ̀ bɛ aisa samai ʋa zeeli. Ebuluse, ta Pudɛn, ta Linuse, ta Kelodia, ta ade-ɠɛɛloin zɔiti pɛ ta è luʋɔsu.

22 Maliɠii yɛ è-yɛnvui ʋa. GALA ná-zaalai yɛ wo ʋa. Amina.