Amɔse
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Amɔse ná-GALA gooiti ka ti sɛʋɛi nii zu. Amɔse ɠɛni togani makɛ nu (1:1) ta tii ɠɛɛ nui (7:14). Naa ʋoluma, GALA ge tolini ga é ɠɛ ga ná-GALA goo wo nui. Amɔse ɠɛni ga Tekoa taa wolai zu nu. Tekoa ɠɛni Zuda masadai zu, nii é ɠɛni lɛkpɛma nu yeezazu ʋelei, kɛlɛ Amɔse ná-keela wooi bɔɔlɔzu ɠɛni liizu Izilayɛle masadai ʋɔ, nii é ɠɛni lɛkpɛma nu ɠɔʋɛzu ʋelei. Amɔse GALA gooiti boni siɛgi zu Woziase ɠɛni la ga Zuda masagi, naazu Zeloɓoame velesiɛi ɠa é ɠɛni ga Izilayɛle masagi, kona undɔfela puulɔɔlugɔ (750) ɠɛɠala, aisa Yesu Kilista ʋa zɔlɔɔ.
Gaaɠwɛsu mɔun felegɔiti su, Amɔse GALA gooi woni zii mɔinmɔin daalɔɠɔma, kɛlɛ ná-keela wooi bɔɔlɔzu ɠɛni liizu Izilayɛle ʋɔ. Naama yeeɠɛɠalai ɠɛni ga dituɠɔma yeeɠɛɠalai Izilayɛle ʋɛ. Dituɠɔma yeeɠɛɠalai naa zu, ti yeemani GALA ma, ti ɗa bala nuiti maanɔɠɔ (2:6). GALA ná-tukpɔɠaaleʋei ɠɛni ga kɛni ta la li ga tiye duɔlai zu (7:17). Anɛɛ naa ʋe, GALA ge minazeɠeni ga toɠa ɓɔ Izilayɛle nuɓusɛiti ba, ti zɔɔma yooiti so ʋolu, niiti ti masadai ɠɛɛni ti unda pɔlɔma (9:12).
Unsosuʋɛ
1. Amɔse ɓɔɠɔ lɛɛ vai (1:1).
2. É GALA ná-tukpɔɠaaleʋei ma vaa wogɛ zii mɔinmɔin daalɔɠɔma (1:2—2:16).
3. É tukpɔɠaaleʋe vai woni Izilayɛle laalɔɠɔma ta dii vai duɔlai zu (3:1—9:10).
4. GALA ge minazeɠeni ga toɠa Izilayɛle ɠidaaleʋe nui mɔtaiti gaaɠale ma (9:11-15).
1
Sɛʋɛ ungi
1 Wooi niiti ka Ɠɔoɠɔ GALAGI dɛɛni ga Amɔse, Tekoa taazuʋɛ logani makɛ nui gila ge ɠɛni de. Ɠɔoɠɔ GALAGI ɓɔɛni pɔ Izilayɛle laalɔɠɔma, Zuda masagi Woziase ná-siɛgi zu, ta Izilayɛle masagi Zeloɓoame velesiɛi ná-siɛgi zu, Zoase ná-doun zunui. Niima vaiti kɛɛʋɛ kona felegɔ leʋe pɛ, zou ɓalii ʋa ɠɛ. 2 É ɠɛni ɠɛɛzu ma:
«Ɠɔoɠɔ GALAGI ɠa zikɔzu Siyɔn,
gooi ɠa ɠulazu Zeluzalɛme.
Togani lo nuiti ta-lufa lɛnugiti suɠaalɛiɗa
Kaalamɛle gizei unmaʋɛ vɔa.»
Siili nuiti daalɔɠɔma
3 Ɠɔoɠɔ GALAGI wooi ɠaa:
«Damase nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti Galaade nuiti koloɠologɛ
ga wozawoli ɠali ɠaazoɓagi.
4 Nà ʋaazu abui losu Ɠazayɛle ná-pɛlɛyeɠei ʋa,
toɠa Ɓɛne-Ɠadade ʋoluzeizuʋɛti gala.
5 Nà Damase taai ma ɓogiti galeɠale da,
gè Avɛne nɛmɛi naa zu nuɓusɛiti undaaʋili,
ta zɔi é masadai ɠɛɛzu Ɓɛte-Edɛne ʋɛlɛi wu.
Siili nuɓusɛiti ta li duɔlai zu Kiil.»
Ɠɔoɠɔ GALAGI ɠa é boga.
Filisiti nuiti daalɔɠɔma
6 Ɠɔoɠɔ GALAGI wooi ɠaa:
«Gaza nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti liini ga kasoɠa nu mɔinmɔin,
ti naati fe Edɔme ya ga duɔiti.
7 Nà ʋaazu abui losu Gaza ziɠigi ʋa,
toɠa poluzeizuʋɛti gala ná.
8 Nà Asadɔde taaʋeaiti undaaʋili,
ta zɔi é masadai ɠɛɛzu Asekalɔn.
Nà Ekelɔn loɠa,
Filisiti nuiti kpein ti undaa ɠa ʋili, kulaba la ba.»
Maliɠii Ɠɔoɠɔ GALAGI ɠa é boga.
Tiil nuiti daalɔɠɔma
9 Ɠɔoɠɔ GALAGI wooi ɠaa:
«Tiil nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti la ɠizɛni kɛɛɠɛloun minazeɠegi zu,
ti liini ga taa mɔinmɔin su nuɓusɛiti pɛ Edɔme ʋɔ duɔlai zu.
10 Nà ʋaazu abui losu Tiil ziɠigi ʋa,
toɠa poluzeizuʋɛti gala ná.»
Edɔme nuiti daalɔɠɔma
11 Ɠɔoɠɔ GALAGI wooi ɠaa:
«Edɔme nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti ʋilɛgɛ ti-ɠɛɛlointi polu ga boɠa zɔkpɔi,
ti gaazumaawɔinɠai pɛ tooni ya,
ti la looɠoni pɛ ga naati kpɔlɔa ga ta-yiiɠaawanai,
ti ta-vaawanamai zeiʋɛ yiima kpaan.
12 Nà ʋaazu abui losu Teman taai ʋa,
toɠa poluzeizuʋɛti gala Ɓosela taazuʋɛ.»
Amɔn nuiti daalɔɠɔma
13 Ɠɔoɠɔ GALAGI wooi ɠaa:
«Amɔn nuiti ti tɔ koloɠolo mɔinmɔin kɛɛʋɛ, da ge leʋe.
Naa ɠa é ba, gè la zeɠea nà-devei ʋolu pɛ.
Mazɔlɔɔ ti koma nuiti kogiti daaʋalini Galaade,
nii a kɛ ti ta-yooi zuwɔɔlɔ.
14 Nà ʋaazu abui losu Laɓa ziɠigi ʋa,
toɠa poluzeizuʋɛti gala ná.
Naa ɠa ɠɛɛzu ga kɔɔɠɔ voloi,
kɔɔi maalugi zaama,
tɔngɔlɔ fiilɛi zaama, yeei fiilɛ wolai lokoleʋezu la.
15 Ta-masagi ɠa li duɔlai zu,
ta ná-kundiɠiiti.»
Ɠɔoɠɔ GALAGI ɠa é boga.