1 Nà pɔ ga wo naa ɠwɛɛ, ɲɛpi wolai gè kɔɔzu wo ʋɛ, wa Laodisé nuiti, ta niiti ti la kwɛ̀ɛ kpusɛi zu. 2 Nà ɲɛpi ɠɔɔzu ti ʋɛ, ga ti iɲɔ ge lɔ, ti ɠili ʋa nɛɛbɛi zu, ti ladalai ma mɔinmɔin sɔlɔɔ, nii keleɠele kitei feezu. Ta GALA ná-faazeikpasui ma lɔɔɠuzu vai ɠwɛɛ naazu, naa ɠa é ga Kilista ɓɔɠɔi. 3 Ɠimalai ta faaɠwɛgi ma naavoloi pɛ dɔɔɠuʋɛ tɔun zea.

4 Nà nii wosu wo ma ga nu nɔpɛ ge mina wo ɠaka ga ná-kpɔɛzuɠula ʋagɔiti. 5 Mazɔlɔɔ anɛɛ ni kpùsɛi la miná wo zaama, kɛlɛ nà wo ʋa kisiɛi zu, ta toɠa bɛ̀ ga koozunɛ, gè faazeikpasu ʋagɔi ɠa é ɠɛɛzu wo zaama, ta ʋelei wo loni la kpaan wa-ɠidaaleʋei zu Kilista ma.

6 Naa ɠa é ba, tɔɔzei wo yeezeiɗa Yesu Kilista wu ga wo-Maliɠii, wo-ziɛ ʋelei dɛɛ ga wo ɠiliʋɛ ba. 7 À zapelɔ, wo lo kpaan wa-ɠilibalai zu wa Kilista, wo zɛbɛlɔ kidaaleʋei zu, eɠɛʋelei kalagiti ti la wo ti zɔlɔɔni. À yɛ GALA mamasu ɓalaa yeenɔpɛ.

8 À dama, nu nɔpɛ ge mina wo lɔ duɔlai zu ga ná-ɠima ɓɔɛ ɲakaiti, ti ga nu ɠaka saɓui, ti ɠulazu nuiti ta-vaa wɔlɔmaiti su, ta eteai zu yɛnvuiti su, ti la zolooni Kilista ná-faiti ma. 9 Mazɔlɔɔ galadai laazeeliaiti pɛ seiʋɛ Kilista ɓusɛi zu. 10 Fai pɛ daazeeliʋɛ wo ʋɛ tɔun saɓui zu. Tɔ ɠa é ga zobodaiti ta kundiɠilaiti ma ungi.

11 Wa-ɠilibalai zu wa Kilista, wo latigɛ pɛlɛʋolu. Tatipɛlɛʋolui naa la ga nii nuiti ti kɛai ga yeei, kɛlɛ toɠa ga tatipɛlɛʋolui nii é zeɠezu Kilista ʋɔ bɛ, é nu unmɔɔsu, é kula kotoba ɓusɛi ná-zɛbɛi ya. 12 Wo maaɠuluʋɛ ʋɔɔma wa Kilista ga ɓatizei maaʋele, wo wuzeɠe ɓalaa ʋɔɔma, wo ɠula saai ya, tɔɔzei wo laani GALA ná-zɛbɛi la, nii é buzeɠeni, é kula saai ya. 13 Wɔi wo zaa ɠɛni de zɛnvu zu vaiti tetemazu, wa-vaaɠaazagiti maaʋele ma, tɔɔzei wo ɠɛni ga tatipɛlɛʋolulala nuiti kpusɛi zu. Kɛlɛ niizu GALA ge wo vulua su ʋolu ʋɔɔma wa Kilista. GALA ge ade zuvaayɛga ga da-vaaɠaazagiti pɛ. 14 Mazɔlɔɔ de maalɔ zɛʋɛi, é ɠɛni ade laalɔɠɔma, é ɠɛni dɛɛzu ga ada ɠa de la deveiti sosu, é naa ɠaaʋaani, é koloɠolo, é kpadɔ saa wului ma. 15 GALA ge kundiɠilai ta zobodaiti suvikɛi ɠulani zɛnvuiti zea, é zɔngɔ zɛlɛ ti ʋa eteai pɛ gaazu, é pilɛ sɔlɔɔ ti ma ga Kilista maaʋele.

16 Naa ɠa é ba, à mina va bu, nu nɔpɛ ge ʋa wo ʋeelala naama vaa zu, nii wa mi, ɓaa nii wa kpɔle, ɓaa fɛti vaa zu, ɓaa alu niinɛ vaa zu, ɓaa dooɠo folo vaa zu. 17 Naati pɛ ti ɠɛni nɔ ga niiti ti ʋaazu ti-maaniinigi, kɛlɛ ma ɠitei ɠa ga Kilista nɔ. 18 À mina va bu, nu nɔpɛ ge ʋa wo ʋeelala, nii ziimai ga zɛɛ ɓɔɠɔmaayeii, ta geezuɠeelaiti dɛbi vaiti. Ti ɠilizu ta-ɠulakɛlɛmaiti nɔ ʋa, ti laavegai ga wasogi wafuun, ga kpusɛ zu ɠisiɛiti maaʋele. 19 Ta ɠɛlɛzu ga ti mina ɠili Kilista ʋa, nii é ga ma ungi. Tɔun saɓu zu ɠa kpusɛi kpein ge ɠɔnɔgi zɔlɔɔsu da, giliai ɓɔɠɔ ʋa ga todazuʋɛti ta pɛɛpɛɛbazuʋɛti maaʋele, é ɗa wɔɔlɔ eɠɛʋelei GALA ge pɔ la.

20 Wo zaani ʋɔɔma wa Kilista, eteai zu yɛnvuiti ti la mɔ ga ani nɔpɛ wo letema. Leeni vaa zu mu wo wa-eteai ziɛzu eɠɛ wa ɠɛ ga eteai nɔnɔ? Leeni vaa zu wo vaazu bu, ti ɗa naama leve ziiti da wo ma: 21 «Mina nii zeɠe! Mina naa ɠɔɠɔ! Mina yeevɔɔɠu nuu ʋa!»? 22 Naama aniiti kpein ti la ɠoloɠolosu ɓaa, botii ɠɛa ʋoluma ga tiye? Naama leveiti ta ga nuɓusɛiti ta-leveiti nɔ, ta ta-ɠalagiti. 23 Gaamazu, naama leveiti ta ɠɛɛzu eɠɛ ɠima vaa, ɓɔɠɔyiima ɠala dɛbii, zɛɛ ɓɔɠɔmaayeii, tɔgi ti seizu ɓɔɠɔ ma, ga ti ti-ɓusɛi ɓɔlɔ gola, kɛlɛ tosu nɔpɛ ge la ti ʋa, ga de ʋa vɔni kpusɛi yiimaiti ma la.