1 Gè maanɔɠɔ vai ta ɠaaʋɛ mɔnɔ zooi ɠa, é ga maanɔɠɔ vaa zɛbɛlɛ nu vului pɛ bɛ. 2 Nui ta ɠa ná, GALA ge naavoloi ta kpɛtɛi veai bɛ, naa ʋɛɛ ɠaazu unfegi ʋa. Nii kpein wɔin ma, é la ʋalasu tanɔpɛ ma. Kɛlɛ GALA ge la vaani bu, é ʋa ma lɔnɔgi ta mi, nu ɠili ge ɗa ma lɔnɔgi mi. Naama vai ɠa ga wafuun faa, ta maanɔɠɔ vaa zɛbɛlɛ gola.

3 Nui ta ɠa zoo doun ungila (100) sɔlɔɔsu, sii zuɠooza, kɛlɛ undaanɛɛi ɓɛgele ɠa é bɛ, ni a naama ɠona mɔinmɔingiti kɛɛna, é la ziilɛi sɔlɔɔni, ta ni maa la ɠuluni ga pagɔ? Nɔ̀un gaazu, doin nii sɔlɔɔgai ga ma ʋooma, naa ɠɛʋelei vizɔgɛ tɔun ba. 4 Mazɔlɔɔ zɔi zɛgai dee ɠoozu, é za, naa zɔlɔɔgɛ nɔ fuun, é ɲɛɛlɛ kpidii zu, nu nɔpɛ ki ge la yɛga su. 5 É la vɔlɔ ɠaazulaani foloi ma, é la kwɛɛni, dooɠo ka bɛ é leʋe zɔi ʋa, nii dɛbigai vulua. 6 Kulanuma ɓɛgele ɠa é naa ʋa, è-zii zuɠooza ga kona waafelegɔ (2.000), nii ziilɛi ge la è ʋɛ? Naa pɛ ge ɠɛ ʋa, gaaɓelagi la ga saai ɓaa?

7 Kpɔlɔi kpein nuɓusɛi suzosu, toɠa kɛɛzu kogi nɔ ʋɛ, tama kaipa zii la lɛiɗa. 8 Undaanɛɛ ɓɛgele ɠa é ɠima nui ʋɛ, é leʋe ɠimalala nui ʋa? Bala nui zoo pa ɠaaɓaazu ɓɔɠɔ ma eteai zu, ná-undaanɛɛi ɠa naa zu ga leeni? 9 Fizɔgɛ ga nii é nu ya, è ɠoozunɛ naa ma, è mina ʋilɛ naa kpein polu, nii wɔin ɠa è zo kisiɛi ʋɔ. Naa ɓalaa ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so.

10 Nii kpein é ná, kaite ti ɠwɛɛgɛ ga ti-laaseigiti, de pɛ de nuɓusɛi ɠwɛɛni, é la zooga zeemaazui zakpesu. 11 Kpɔɛzuɠula wolai ʋolu ɠa nɔ ga wafuun kpɔɛiti, kulanumai ɠa naa zu ga lee? 12 Nuɓusɛi zii ma voloiti ta leʋesu eɠɛ niinigi. Ɓɛ ɠa é kwɛɛ nii fizɔgai ma ná-wafuun yeeɠɛɠala ɓuɠagi laawu? Nu nɔpɛ ge la ná, nii a naati bona, niiti ti ʋaazu ɠɛɛzu zooi ɠa tɔun poluma.