1 Izelayɛle ʋɛbɛi kpein ge zeɠeni Sin teʋebai zu, eɠɛʋelei Ɠɔoɠɔ GALAGI ná-devei ɠɛni la, é ʋilɛ ta-ziɛ vai ʋa, ti liini, ti ʋu Lefidime. Ʋɛ nuɓusɛiti ti la ɠɛni ziɛ zɔlɔɔni ná, ti ʋa ɓɔɔle. 2 Názu ɠa nuɓusɛiti ti wuzeɠeni la Moize laalɔɠɔma. Ti ɠɛ ma: «À ziɛi ve gi ya, gi ɓɔɔle.» Moize ti wooɠaaʋoteni, é ɠɛ ti ma: «Leeni vaa zu wo wuzeɠezu dàalɔɠɔma? Leeni vaa zu wo Ɠɔoɠɔ GALAGI zuɠɔɠɔsu?» 3 Nuɓusɛiti ti ɠɛni ná, kpɔɔle wɔin ɗa ɓɔi ti la, ti ɗa zelii lo Moize ma. Ti ɠɛni ɠɛɛzu ma: «Lee vaa zu è gi ɠulaai Ezipete yooi ʋa, ga è gi ʋaa ga kpɔɔle wɔin, giya-o, gi-lointi-yo, ta gá-loganiiti-yo?» 4 Moize wooɠulani Ɠɔoɠɔ GALAGI ma, é ɠɛ ma: «Leeni ɠa nà kɛ, é lo niima nuɓusɛiti ba? Ná tago nɔ ʋe, ti ʋa ti sɔ̀ɔ ga kɔtui.»

5 Ɠɔoɠɔ GALAGI ɠɛni Moize ma: «Leʋe nuɓusɛiti kakala ʋelei, è Izelayɛle ɠɛwolai tanigaani seɠe, ɗa-lukpɔi ɓalaa seɠe, nii è ziɛ wolai Nile loɠani la, è li luɠɔ ʋelei. 6 Wɛlɛ, nà liizu, gè lo è luɠɔ Ɠɔɔlɛɓe ɠɔtui ma, ɗa kɔtui loɠa, ziɛi ɠa ɠula ba, nuɓusɛiti ta ɓɔɔle.» Zekana Moize kɛɛni la, Izelayɛle ɠɛwolaiti gaazu. 7 É naama adaʋɛ laasei pɛɛni ga Masa ta Meeliɓa (niiti ti-ʋoluʋɛti ga «suɠɔɠɔgi» ta «maaɠaalii»), tɔɔzei Izelayɛle nuiti ti maaɠaalii ɠɛɛni ná, ti Ɠɔoɠɔ GALAGI zuɠɔɠɔ, ti ɗa ɠɛ ma: «Ɠɔoɠɔ GALAGI ɠa ade zaama nɛi, ɓaa é la ná?»

8 Amalɛke nuiti ti ʋaani, ti kɔɔi ʋɛɛ Izelayɛle nuiti ba Lefidime. 9 Moize ɠɛni Zozuwe ma: «Yiimazeɠe ga zunui tanigaa ade ʋɛ, wo li, wo vala Amalɛke nuiti ba. Lina, nà liizu, gè lo gize unmaʋɛ, GALA ná-tukpɔi zoni zèa.» 10 Zozuwe naa ɠɛɛni, nii Moize boni ma, ga é Amalɛke zakpe. Moize ʋɛɛ Aalɔn ʋa, ta Ɠuul ti lɛɛni gizei unmaʋɛ. 11 Siɛgi zu Moize a la yeei wuzeɠena la, Izelayɛle ɠɛni pilɛ sɔlɔɔsu, kɛlɛ siɛgi zu a la yeei yeina la, Amalɛke ɠɛni pilɛ sɔlɔɔsu. 12 Tɛi Moize yeeiti suɓɔlɔni, ti kɔtui zeɠeni, ti da bu, é zei maazu. Aalɔn ta Ɠuul ti zeeiti soni, gilagi lo kakamaʋɛ, zɔi lo zɔɔla ʋelei, zeeiti maalegai yɛni de kpaan eyɛsu foloi da. 13 Zozuwe pilɛ sɔlɔɔni Amalɛke ma ta ná-nuɓusɛiti, ga boɠa zɔkpɔ ɠaaligi.

14 Ɠɔoɠɔ GALAGI ɠɛni Moize ma: «Niima vaiti sɛʋɛ sɛʋɛi zu, é ɠɛ ga ɠizɛsu vaa, è bo Zozuwe ma ga, nà Amalɛke ma zuwui ɠaaleʋezu geeɠɔlɔgi wu, nu la mɔ ɠisiaa ti zu.»

15 Moize zalaɠa ɠulazuʋɛ ta loni, é daasei pɛɛni ga: «Ɠɔoɠɔ GALAGI ɠa ga nà-ɗalapoi.» 16 É ɠɛni ma: «Tɔɔzei nui ta yeei wuzeɠea Ɠɔoɠɔ GALAGI ná-masa kpɔkpɔgi laalɔɠɔma, Ɠɔoɠɔ GALAGI ná-kɔɔi ɠa ɠɛ Amalɛke laalɔɠɔma, yeeɠɛɠalaiti pɛ su.»