GALA Daawoo Zɛʋɛi Ezekiyɛle 28

Tiil masagi loobu vai

1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, naa wo Tiil masagi ma: ‹Maliɠii Ɠɔoɠɔ GALAGI wooi ɠaa: È-yiimaʋɛ laaveni ga wasogi, è ɠɛni: Nà ga gala, nà zeini galagiti ta-masa kpɔkpɔgi ɠa, kpoloɗɛi zaamaʋɛ! Kɛlɛ ɗɔun, ɗa ga nui, gala ta ga ɗe, ɗa ɗa-ɠisiɛi ɠaazu ga GALA ná-kisiɛi ʋe. 3 Ɗa ɓɔɠɔ ɠaazu ga ɠima nu è leʋe Daniyɛle ʋa, dɔɔɠuzu vaa la lɔɔɠua è ʋa. 4 Ɗa-ɠimalai ta ɗa-ɠeleɠelegi zu, è kulanumai ɠaalɛa ba, zanugi ta walii é ga naavoloi. 5 Ɗa-ɠimala wolai zu yaaɠo vai zu, è ɗa-naavoloi ɠaawɔɔlɔa, naama naavoloi è yiilaavega ga wasogi.

6 « ‹Naa ɠa é ba, Maliɠii Ɠɔoɠɔ GALAGI wooi ɠaa: Tɔɔzei ɗa ɗa-ɠisiɛiti kaazu ga GALA ná-kisiɛiti be, 7 nà ʋaazu ga wɛɛinti è laalɔɠɔma, ti wola ziliai ziiti saama. Ta boɠa zɔkpɔi ʋili ɗa-ɠimalai ma lɔnɔ pagɔiti ma, ti ɗa-ʋadai ɠɔzɔ. 8 Ta è ʋili kabayeɠei zu, ɗa za ga maaɓaai kpoloɗɛi zaamaʋɛ. 9 Ɗa ɠɛna loni è ʋaa nui ɠakala, ɗa zoo è ɠɛ ma nɛi: Nà ga gala? Ɗa yɛ nɔ nuɓusɛlai zu, è la ɠɛa ga gala, naama nui yeezu nii é è ʋaazu. 10 Ɗa za ga tatipɛlɛʋolulala nuiti saa ʋelei, zii ɠiligiti zeezu, mazɔlɔɔ nà ɠa gè boga,› » Maliɠii Ɠɔoɠɔ GALAGI wooi ɠana.

Mɔungi zu ta niizu

11 Ɠɔoɠɔ GALAGI ɓɔɛni pɔ̀, é ɠɛ mà: 12 «Ɗa ʋe, zunui, maawɔin wuyei loo Tiil masagi ma, ɗa ɠɛ ma: ‹Maliɠii Ɠɔoɠɔ GALAGI wooi ɠaa: È ɠɛni ga daazeelii ma ʋoo pagɔi, è laaveni ga ɠimalai, è laazeeli pagi zu. 13 È ɠɛni Edɛn, GALA ná-kpelei zu. È maaɠilini ga kɔtu zɔngɔ ɓaagi ma zii pɛ, saaledowanegi, ta topazegi, ta diamai, ta kelizolitegi, ta wonikesegi, ta zasepegi, ta safiilegi, ta gelenategi, ta emelɔdegi, ɗa-lamadegiti ta ɗa-ɠooleiti ti ɠɛni è yeema, ti ɠɛʋele ɓɛtɛni ga zanugi è ɓɛtɛ voloi ma vaa ma. 14 È ɠɛni ga seeluɓɛin nii é makɛi wosu, koʋegiti ba. È ɠɛni zeini GALA ná-gize ɲadegai ma, è ɠɛni ziɛzu kɔtuiti saama, ti volozu gola. 15 È-ziɛ ʋelei ʋani, è zoloo su, tɔɔzei è ɓɛtɛ volo ma, eyɛsu faa ɲɔi ɠula kɛlɛma è ʋɔ bɛ. 16 Ɗa-yaaɠolai ɠaa yɛ ga wɔɔlɔzu è ya, é è lɔa toomai zu, è kotoi ɠɛ. Naa ma, gè è-losuʋɛ ɠulaa è ya, è ɠɛ ga tanɔ, gè è ɓɛ nà-gizei ma, ɗa ʋe, seeluɓɛin nii é makɛi wosu, gè è laaʋiliga, è ɠula kɔtuiti saama, ti volozu. 17 Ɗa-ʋadai è wasoga, è vaa bu foloi è bosu, naa ɗa-ɠimalai yaava. Gè è ʋilini ya zooi ma, è ɠɛ ga pɛtɛ gani zɔɔma masagiti bɛ. 18 Ɗa-ɠotoi mɔin ʋelei ma ɗa-yaaɠolai zu è kɛɛzu ga telebotalai, è ɗa-zalaɠa ɠulazuʋɛti kɔzɔni. Naa ma, nà abu ɠaazosu è-zeizuʋɛ, é è ɠala. Nà è ɠɛ ga zuʋui eteai zu, naati pɛ gaazu ti è ʋɛtɛsu. 19 Ɗa-vai ɠa maaɠili lɔ nuɓusɛiti pɛ ma ti è ɠwɛɛ, ɗa ɠɛ ga ti maalua ɠani, ɗa ɠoloɠolo eyɛsu ɠɔ.› »

Sidɔn yooi laalɔɠɔma

20 Ɠɔoɠɔ GALAGI ɓɔɛni pɔ̀, é ɠɛ mà: 21 «Ɗa ʋe, zunui, ɠaaʋote Sidɔn taai ma, GALA gooi wo daalɔɠɔma, 22 ɗa ɠɛ ma: ‹Maliɠii Ɠɔoɠɔ GALAGI wooi ɠaa: Nà ʋaazu wuzeɠezu Sidɔn laalɔɠɔma. Nà lɛbiya zɔlɔɔ taai zaama. Ta suɠwɛɛ naazu ga nà ɠa gè ga Ɠɔoɠɔ GALAGI, siɛgi zu nà tukpɔiti gaaleʋena la daalɔɠɔma. Naazu nà nà-ɲade faiti kula kɛlɛma ga tɔun maaʋele. 23 Nà ɗɔfɔ zeeɓɛi la è wu, ɲamai ɠa ʋu taazuʋɛ ná pɛ, nu ʋoomaiti ti ɠɛ ʋuuni ná pɛ, ti zaazu ga boɠa zɔkpɔi é zeɠezu mini-o-mini, é ʋa è laalɔɠɔma. Ta suɠwɛɛ naazu ga nà ɠa gè ga Ɠɔoɠɔ GALAGI.› »

Izilayɛle unmɔɔ fai

24 «Ɠain ge la mɔ ɠɛa Izilayɛle nuɓusɛiti daalɔɠɔma, é ʋa ɠɛ ti laɓazu, ɓaa é ʋa ɗa ti maawana, ti-zeiɲɔɠɔ la mɔ ɠɛa ná, a ti wɔinzeɠe. Ta suɠwɛɛ naazu ga nà ɠa gè ga Maliɠii Ɠɔoɠɔ GALAGI. 25 Maliɠii Ɠɔoɠɔ GALAGI wooi ɠaa: ‹Nà Izilayɛle nuiti gaalɛ ba, gè ti ɠula nuɓusɛiti saama, ʋɛti gè ti vazani náti, gè dɛɛ ɠana ga zii ɠiligiti ga nà ga GALA ɲadegai. Ta zei ti ɓɔɠɔ yooi zu, nii gè feeni nà-botiɠɛ nui Zakɔɓe ʋɛ. 26 Ta zei ná ziilɛigi zu, ti pɛlɛiti to, ti leezɛn ɓeleiti da. Ta eteai ziɛ ziilɛigi zu, mazɔlɔɔ nà ti-maaɠoolii zu nuiti sala, tɛiti ta ti zopele ɲɔu. Ta suɠwɛɛ naazu ga nà ɠa gè ga Ɠɔoɠɔ GALAGI, ta-ƓALAGI.› »