1 Abalaame zeɠeni niima yooi zu, é li ga lɛkpɛmaʋɛ nu yeezazu ʋelei, é zeini Kadɛseni zɔɠɔzuʋɛ ta Suul, é lago zeini Gelaal. 2 Abalaame a la ɠɛna ɓɔɛa, é lo anzai Sala ʋa, é ɠɛni ɠɛɛzu ma: «Toɠa ga bàazeelai.» Gelaal masagi Aɓimelɛke Sala zeɠeni. 3 Naazu, GALA ge ɠulani kɛlɛma segi zu Aɓimelɛke ʋɛ kpidii, é ɠɛ ma: «Wɛlɛ, ɗa ʋaazu zaazu, tɔɔzei anzanui naa ná-faa zu, nii è seɠeai, mazɔlɔɔ zini ka bɛ.»

4 Aɓimelɛke la ɠɛni dɛ daani ʋolu, é gooɠaaʋoteni, é ɠɛ ma: «Màliɠii, ɗa sɔbalala nuiti paa ɓaa? 5 Sinigi ɓɔɠɔi lɛi kɛai mà: ‹Bàazeelai ʋe›? Ta anzanui ɓɔɠɔi ɓalaa bogɛ ga: ‹Dìɛi ʋe›? Gè kɛɛʋɛ kisiɛ ʋagɔi zu, ta sɔbalalai zu.»

6 GALA ge ɠɛni ma segi zu: «Gè kwɛɛ gè ɠɛ è kɛɛʋɛ zii ʋagɔlai zu, naa ɠa é kɛa gè pele ɓesagai è luɠɔ ga è mina koto ɠɛ dàalɔɠɔma. Naa ɠa é ba, gè la vaani bu ga è ʋa da ʋolu. 7 Niizu zunui nii anzai ve zea, mazɔlɔɔ toɠa ga GALA goo wo nui ta. Toɠa maanɛɛnɛi wo è ʋɛ, ɗa yɛ vulua. Kɛlɛ ni è la teʋeni pɔ, suɠwɛɛ ga ɗa za, ɗa-o, ɗa-nuɓusɛiti-yo.»

8 Aɓimelɛke wuzeɠeni sobuzobui, é ná-botiɠɛ nu wolaiti toli, é naama vaiti pɛ bo ti ma, ti wola luani. 9 Aɓimelɛke Abalaame ɓalaa tolini, é ɠɛ ma: «Lee ɠa è kɛai ga giye? Kotoi ɓɛgele ɠa gè kɛai è laalɔɠɔma, nà-o, nà-masadai-yo, è gi lɔai kotoi nii zu? È-ziɛ ʋelei é lo nɔ̀un ba, nu maa la nɛɛni ga é ʋa naa ɠɛ.» 10 Aɓimelɛke ɠɛni Abalaame ma: «Leeni ɠa é ɠɛa è ɠisu, è niima vai ɠɛai?»

11 Abalaame gooɠaaʋoteni, é ɠɛ ma: «Gè ɠɛni ɠisiɛzu, gè ɗa ɠɛ ɓɔɠɔ ma, zeɠema nɔpɛ ge la ba, ta ʋaazu pàazu ànzai vai zu, tɔɔzei GALA gaazuluaba ɠila kpalaa ge la niima yooi zu. 12 Gaama ʋe, toɠa ga bàazeelai, é ga kɛ̀ɛ ná-doun anzanui, kɛlɛ dèe ná-doun anzanu laade. Toɠa ga ànzai. 13 Siɛgi zu GALA ge kɛ̀ɛni la ga teʋeteʋe nu, gè ɠula kɛ̀ɛ ná-pɛlɛyeɠei wu, gè ɠɛni Sala ma: ‹Ʋɛ nɔpɛ de liizu ná, kɛni è ɠɛ bɛ̀ ga wooɠɛɠila nu, è ɗa ɠɛ ti ma: Dìɛi ʋe.› »

14 Aɓimelɛke toganii tanigaa zoni baalagiti saama, ta boliiti, ta nikɛiti, é ti ve Abalaame ya, é pɛɛ botiɠɛ zunuiti ba, ta botiɠɛ anzanuiti. É anzai Sala ɓalaa teʋeni pɔ. 15 É ɠɛni ma: «Nà-zooi laalaogɛ è luɠɔ, zei ʋɛ nɔpɛ ná nɛɛzu è ʋɛ.» 16 É ɠɛni Sala ma: «Gè wali ɠae waagila (1.000) fea è-liɛ ya, é ɠɛ ga poogi ga è la ga sɔba nu niima vaiti su, è-maaɠoolii zu nuiti gaazu.»

17 Abalaame GALA falini. GALA ge Aɓimelɛke ɠɛdɛni, ta anzai, ta ná-botiɠɛ anzanuiti, ti zooni ti ɗa dointi sɔlɔɔ ʋolu. 18 Mazɔlɔɔ Ɠɔoɠɔ GALAGI Aɓimelɛke ná-pɛlɛyeɠei wu anzanuiti pɛ kɛɛni ga doun zɔlɔɔtala nuiti, Abalaame anzai Sala ná-faa zu.