1 Niima vaiti pɛ poluma, GALA ge Abalaame zuɠɔɠɔni, é ɠɛ ma: «Abalaame!» Naa gooɠaaʋoteni, é ɠɛ ma: «Nà ɠaa!» 2 GALA ge ɠɛ ma: «È-loun zunu ɠila kpegi Izaake zeɠe, nii è nɛai ʋɛ, è li Moliya yooi zu, è kula ga gala zalaɠai gizei naa ma, nii ná yeelo ba.»

3 Abalaame wuzeɠeni ga sobuzobui, é ná-soovalegi ɠasɔɠili, é ná-botiɠɛ nu felegɔ zeɠeni ta ná-doun zunui Izaake. É koʋii ʋaliʋalini gala zalaɠai vaa ma, é li naama adaʋɛ, ʋɛ GALA ge yeeloni ná ʋa. 4 Foloi zaʋasiɛi ma, Abalaame ɠaazuwuzeɠeni, é naama adaʋɛ ɠa ɠoozama. 5 É ɠɛni ná-botiɠɛ nuiti ma: «À yɛ ʋɛ soovalegi ɠoba. Nà-o, zunu loungoi-yo, gá liizu munu, gi nɔkɔ GALA bu, naa ʋoluma gi ʋa wo ɠoba.»

6 Abalaame gala zalaɠai ma ɠoʋii zeɠeni, é ná-doun zunui Izaake laalɛ bu, é abui ta boɠai zeɠe. Ti felegɔ ti ɗa ziɛ ʋɔɔma, ti ɗa li. 7 Izaake ɓɔɛni kɛɛɠɛ Abalaame ʋɔ, é ɠɛ ma: «Kɛ̀ɛ!» É gooɠaaʋoteni, é ɠɛ ma: «Nà ɠaa, dòun zunu.» Izaake ɠɛ ma: «Abui ta koʋiiti kaa, kɛlɛ mini ɠa baala ziʋoi ná, gala zalaɠai vaa zu?» 8 Abalaame gooɠaaʋoteni, é ɠɛ ma: «Dòun zunu, GALA ɓɔɠɔgoi ɠa ʋa ga baala ziʋoi, gala zalaɠai vaa zu.» Ti felegɔ ti ɠɛni ziɛzu ʋɔɔma, ti ɗa li.

9 Ti zeeliai ma naama adaʋɛ, ʋɛ GALA ge ná lɛɛni, Abalaame zalaɠa ɠulazuʋɛ ɓɛtɛni, é koʋii la maazu ga pagɔ. É ná-doun zunui Izaake yeeiti ta kɔɠɔiti suɠilini, é da zalaɠa ɠulazuʋɛ koʋii maazu. 10 Naa ʋoluma Abalaame boɠai zeɠeni ga é ná-doun zunui ɠɔdaaleʋe. 11 Gaamago nɔ, Ɠɔoɠɔ GALAGI ná-geezuɠeelai yɛni geezuʋɛ, é toli, é ɠɛ ma: «Abalaame! Abalaame!» É gooɠaaʋoteni, é ɠɛ ma: «Nà ɠa!» 12 Geezuɠeelai ɠɛni ma: «Mina yeevɔɔɠu zunu loungoi ʋa, è ʋa faa nɔpɛ kɛ la. Mazɔlɔɔ gè kwɛni niina ga ɗa luazu GALA ba, è la kòmani ga è-loun zunu ɠila kpegi.» 13 Abalaame ɠaazuwuzeɠeni, é baala sinɛ wolai ɠa ʋoluʋɛ, minɛiti sogai dɔɓɔ goi zu, é ɓata. É baala sinɛ wolai zoni, é kula ga gala zalaɠai ná-doun zunui ʋotogi zu. 14 Abalaame naama adaʋɛ laasei pɛɛni ga Adɔnayi-Yiileyee (nii poluʋɛ ga «Ɠɔoɠɔ GALAGI nii é nu ɠulazu faa zu»). Naa ɠa é ba, zaaɠaza ti ɠɛɛzu ná ma: «Ɠɔoɠɔ GALAGI ná-gizei ma, ɗa ɠula su.»

15 Ɠɔoɠɔ GALAGI ná-geezuɠeelai yɛni geezuʋɛ, é Abalaame loli ná zeizu velesiɛi, 16 é ɠɛ ma: «Ɠɔoɠɔ GALAGI laawooi ɠaa: nà ɠonazu nà ɓɔɠɔi ma, tɛi è naa ɠɛa, è la kòmani ga è-loun zunu ɠila kpegi, 17 nà tuya loozu è ʋɛ, gè è-mavofodai ɠaawɔɔlɔ, eɠɛ pelegi somideɠaiti ti mɔinɗai la geezuʋɛ, ta eɠɛ ɲaɠaegi nii é kpoloɗɛi ɠobaʋɛ. È-mavofodai ɠa zobo sɔlɔɔ sili nuiti ma. 18 Ziiti kpein ti eteai zu, ta tuyai zɔlɔɔ è-mavofodai maaʋele ma, tɔɔzei è gòoi zogɛ.»

19 Abalaame ɠaleni ma ná-botiɠɛ nuiti pɔ pelei, naa ʋolu ti ʋilɛni pelei ma, ti ɗa li ʋɔɔma Ɓeel-Seɓa. Miná ɠa Abalaame ɠɛni zeini ná.

20 Naama vaiti pɛ poluma, Abalaame mɛnini ga, Milika ɓalaagi doun zunua zɔlɔɔni kɛɛɠɛloin Naɠɔɔl ʋɛ. 21 Use ɠa é ga ná-doun mɔungi, naa deɠeiti ti ɠɛ ga Ɓuze, ta Kemuwɛle nii é ga Alame kɛɛɠɛ, 22 Kesede, Ɠazo, Piledase, Yidilafe, ta Ɓetuwɛle. 23 Ɓetuwɛle ɠa é Eleɓɛka zɔlɔɔni. Naama loun lɔsaʋaiti ka Milika ti zɔlɔɔni Abalaame kɛɛɠɛloin Naɠɔɔl ʋɛ. 24 Anza ɠiligi nii é la ɠɛni vuluni ga zɔi ɠɛʋele, nii daaseigi ɠɛni ga Leyuma, naa dointi sɔlɔɔni, ti-laaseigiti ti ɠɛni ga: Teba, Gaɠame, Taɠase, ta Maaka.