1 Zakɔɓe siɛi lɔɔzeini ʋolu, é li folo ɠulazu ʋelei yooi zu. 2 É wɛlɛni yeeta, é kɔlɔyeɠei ɠa dɔɓɔi zu, pɛtɛ, togani ɓulu seizu saʋagɔ ɠɛni ná, ti ɗa looɠo, mazɔlɔɔ naama ɠɔlɔyeɠei ɠa togani ɓulugiti ti ɠɛni ɓɔɔlezu la. Kɔtu wolai ɠa é ɠɛni ga kɔlɔyeɠei lakulugi. 3 Siɛgi zu togani ɓulugiti kpein ti ɓena ɠaalɛ ba la ná, ti ɓena kɔtui ɠilikili, ti seɠe ziɛyeɠei laaʋɛ, ta la ziɛi veena togani ɓulugiti zea, ti kɔtui la daazuʋɛ ziɛyeɠei la.

4 Zakɔɓe ɠɛni togani makɛ nuiti ma: «Kɛ̀ɛleaiti, mini nu ɠa ga woye?» Ti gooɠaaʋoteni, ti ɠɛ ma: «Gá ga Ɠalan nuiti.» 5 É ɠɛni ti ma: «Wo Laɓan ɠwɛɛ nɛi ɓaa, nii é ga Naɠɔɔl ná-doun zunui?» Ti gooɠaaʋoteni, ti ɠɛ ma: «Uun, gi kwɛɛ.» 6 É ɠɛni ti ma: «Kɛdɛgɛ nɛi ɓaa?» Ti gooɠaaʋoteni, ti ɠɛ ma: «Kɛdɛgɛ, wɛlɛ nuu, ná-doun anzanui Lasɛle ʋa, é ʋaazu ga togani goiti.» 7 Zakɔɓe ɠɛni ma: «Wɛlɛ, foloi wɔɔlɔʋɛ dɛ, yeeɠɛɠala la ga nii, ga nu togani ɓulugiti gaalɛ ba. À ziɛi ve togani goiti zea, naa ʋolu, wo li ga tiye ga ti daami wo.» 8 Ti gooɠaaʋoteni, ti ɠɛ ma: «Gi la zooga, kɛni togani ɓulugi kpein gaa ɠa lɛɛna ba, názu ɠa gá ɗa kɔtui ɠilikili da, é zeɠe ziɛyeɠei laaʋɛ, gi ziɛi ve togani goiti zea.»

9 É yɛni nɔ ɓɔɛzu dɛ ti ʋɔ, Lasɛle ɗa unkula ga kɛɛɠɛ ná-togani goiti, mazɔlɔɔ é ɠɛni ga togani makɛ nui. 10 Siɛgi zu Zakɔɓe kɛkɛ Laɓan ná-doun anzanui Lasɛle ɠaani la, ta Laɓan ná-togani ɓulugi, é maaɓuɠani ba, é kɔtui ɠilikili, é seɠe ziɛyeɠei laaʋɛ, é ziɛi ve kɛkɛ Laɓan ná-togani ɓulugi ya. 11 Naa ʋolu, Zakɔɓe Lasɛle nɛɛnɛni ga daaʋɛ komagai, é wooɠula, é wɔlɔ. 12 Zakɔɓe boni Lasɛle ma ga toɠa ga kɛɛɠɛ ná-nu, é ga Eleɓɛka ná-doun zunui. Lasɛle ɓizɛni, é li, é bo kɛɛɠɛ ma.

13 Laɓan baazeelai ná-doun zunui Zakɔɓe ʋaa vai ma wooi mɛnini nɔ feya, é ɓizɛni, é daaɠomi, é velevele da, é nɛɛnɛ. É loni tuɠɔ, é lii la ná-pɛlɛi wu. Faiti ti ziɛni, Zakɔɓe naati kpein gaalɛɛni la. 14 Laɓan ɠɛni ma naazu: «Gaamazu, ɗa ga màvofoda ɓɔɠɔɓɔɠɔgi.» Zakɔɓe alu gila kɛɛni Laɓan ʋɔ bɛ.

15 Naa ʋoluma, Laɓan ɠɛni Zakɔɓe ma: «Nà-nui ɠa ga ɗe, ɗa yɛsu boti ɠɛɛzu bɛ̀ ɠana nɔ ɓaa? Nii a ɠɛ ga è-zalai, naa lɛ ga ze.»

16 Tama anzanu loun felegɔ ɠɛni Laɓan ya. Ma mɔungi laaseigi ɠɛni ga Lea, loungo gelei laaseigi ɠɛ ga Lasɛle. 17 Lea la ɠɛni wola ʋani, kɛlɛ Lasɛle wola ʋaga ɠɛni de. 18 Lasɛle maayo ge ɠɛni Zakɔɓe ʋɛ. É ɠɛni Laɓan ma: «Nà boti ɠɛ è ʋɛ ga kona dɔfela, è-loun anzanui loungo gelei ná-faa zu.» 19 Laɓan ɠɛni ma: «Yɛ pɔ̀ bɛ, nɛɛʋɛ bɛ̀ ga gè fe è ya, gè ʋa ʋɛ liizu feezu zunu ɠili zea.» 20 Ʋele ɠana Zakɔɓe boti ɠɛɛni la kona dɔfela zu Lasɛle ná-faa zu, kɛlɛ ti ɠɛni gaazu, eɠɛ foloi tanigaani nɔ, tɔɔzei maayo ge ɠɛni bɛ.

21 Naa ʋolu Zakɔɓe ɠɛni Laɓan ma: «Ànzai veena zèa, mazɔlɔɔ nà-botiɠɛ voloi laazeelia, nà pɔ ga gè ʋilɛ polu.» 22 Laɓan náʋɛ nuiti kpein gaalɛɛni ba, ti daamii ɠoozunɛɛi wo. 23 Kpɔkɔi zeeliai ma, é ná-doun anzanui Lea zeɠeni, é lii la Zakɔɓe ʋɔ, naa ʋilɛni polu. 24 Laɓan botiɠɛ anzanui Zilepa zeɠeni, é fe ná-doun anzanui Lea ya, ga naa ɠɛ ga ná-botiɠɛ anzanui.

25 Ma ɠeelaalaogai ma, Zakɔɓe ɗa wɛlɛ, é Lea ɠa, é ɠɛ Laɓan ma: «Lee ɠa è kɛai ga ze? Lasɛle ná-faa ɠa gè boti ɠɛai ma è ʋɔ bɛ. Lee vaa zu è yàavaai?» 26 Laɓan ɠɛni ma: «Naa la ɗa ga ɠɛa gi ʋɔ bɛ pɔlɔmazu, ga è loungoi ve zini bɛ, nu ɠitei luɠɔ. 27 À dɔɔɠɔi ɠaaɓela wa nii, nà zɔi ɓalaa ve è ya, è botii ɠɛ mɔnɔ pɔ̀ bɛ kona dɔfela ɠiligaa laawu.»

28 Zakɔɓe vaani bu, ti dɔɔɠɔi ɠaaɓela ta Lea. Naa ʋolu Laɓan ná-doun anzanui Lasɛle zeɠeni, é fe Zakɔɓe ya ga anza. 29 Laɓan botiɠɛ anzanui Ɓileɠa zeɠeni, é fe ná-doun anzanui Lasɛle ya ga ná-botiɠɛ anzanui. 30 Zakɔɓe Lasɛle ɓalaa daani ʋolu, nii gola nɛɛni bɛ, é leʋe Lea ʋa. É botii ɠɛɛni mɔnɔ Laɓan ʋɔ bɛ kona dɔfela ɠiligaa laawu.

31 Tɛi Ɠɔoɠɔ GALAGI kaani ga tiba la ɠɛni Lea ʋa, é naa ɠɛɛni ga kpuɠu nu, Lasɛle ma ge ɠɛni ga doun zɔlɔɔtala nu. 32 Lea kogi zeɠeni, é zunu loun zɔlɔɔ. É daasei pɛɛni ga Luɓɛn,*Luɓɛn: daaseigi nii ti maaɓuɠaai ʋa ta «à doun zunui ʋɛtɛ.» tɔɔzei é ɠɛni ma: «Ɠɔoɠɔ GALAGI nà-ɓɔɠɔmaayeii ʋɛtɛga, sìnigi ɠa nɛ̀ɛʋɛ niina niizu.» 33 É kogi zeɠeni mɔnɔ, é zunu loun zɔlɔɔ, é ɠɛ ma: «Ɠɔoɠɔ GALAGI mɛnigɛ ga tiba la bà, é nii ɓalaa fea bɛ̀.» É naa laasei pɛɛni ga Simiyɔn.†Simiyɔn: daaseigi nii ti maaɓuɠaai ʋa ta «mɛnigɛ.» 34 É kogi zeɠeni mɔnɔ, é zunu loun zɔlɔɔ, é ɠɛ ma: «Sìnigi ɠa ɠili bà niina niizu, mazɔlɔɔ gè zunu loun saʋagɔ zɔlɔɔga bɛ.» Naa ɠa é kɛɛni ti daasei pɛɛni ga Leevi.‡Leevi: daaseigi nii ti maaɓuɠaai ʋa ta «gilibai.» 35 É kogi zeɠeni mɔnɔ, é zunu loun zɔlɔɔ, é ɠɛ ma: «Nà Ɠɔoɠɔ GALAGI lɛbizu niina niizu.» Naa ɠa é kɛɛni, é daasei pɛɛni ga Zuda.§Zuda: daaseigi nii ti maaɓuɠaai ʋa ta «lɛbiyai.» É ɓeni niina doun zɔlɔɔgi ʋa.