GALA Daawoo Zɛʋɛi Aɓakuke 1

Aɓakuke

Ná-Sɛʋɛi

Sɛʋɛi lɔɔzeizuʋɛ ma woo mɔungiti

GALA gooiti Aɓakuke ti woni, naati ka ti sɛʋɛi nii zu. Aɓakuke Ná-Sɛʋɛi ɠa yɛ, GALA goo wo nui ma mɔinmɔin saama, tɔɔzei keela woo la su nii teʋegai Izilayɛle ma, ɓaa Zuda. Kɛlɛ tɔun Aɓakuke ná-kpaazaɠa felegɔ ta ná-GALA fali ɠila, naati ka ti su. Tama kpaazaɠaiti é ti woni, GALA ge naati gaaʋoteni. Faaɠwɛ nuiti ti laaʋɛ da ga Aɓakukeni ta Zelemi ti ta eteai ziɛni yeeɠɛɠala ɠila nɔ zu, Zuda masagiti Zoziase ta Yeɠoyakime ta-yeeɠɛɠalai zu. Aɓakuke Ná-Sɛʋɛi mu be ɓaa GALA Daawoo Zɛʋɛi taɠili nɔ pɛ ge la kona dɛɛni ga yeeɠɛɠalai nii Aɓakuke ná-eteai ziaai su.

Aɓakuke ɓaazaɠani ga GALA daalɔɠɔ mɔunpa, é ɠa naa ɠa tooma vai ta telebotala vaiti kaazu, kɛlɛ naa la ná-fali wooiti gaaʋotesu, é ʋa ɓɔ ba. Kɛɛʋɛ eɠɛ Aɓakuke ɠɛni niima vaiti kaazu, ti ɗa ɠɛ Zuda masadai zu. GALA ge Aɓakuke wooɠaaʋoteni, é ɠɛ ma, toɠa na Ɓaɓilɔne nuiti buzeɠe Zuda ɠoloɠolo fai ma. Naa ʋoluma Aɓakuke ɓaazaɠa mɔnɔ ga GALA daalɔɠɔ, é ɠɛ naa mu ge nu naa zeɠea, niiti ti wola ɲɔuɗai, ga é zɔiti maaɠolo ga tiye, niiti mugi ti la ɲɔuni sɛ. GALA ge gooɠaaʋoteni mɔnɔ é ɠɛ ma, Ɓaɓilɔne nui naati ɓalaa ti lukpɔ ɠaa ɠa ʋaazu leʋezu, ti maaɠolo ʋelela ʋelei. Gaaɓelasu, Aɓakuke GALA falini ga naa faa ɠɛ, ta é gaazumaawɔinɠai ɠɛ. É GALA maamusɛni naa ɠɛɛ vaa ʋagɔiti faa zu, é ti ɠɛɛni wɔlɔwɔlɔi zu.

Unsosuʋɛ

1. Aɓakuke ná-kpaazaɠa mɔungi (1:1-4).

2. GALA ná-gooɠaaʋote mɔungi (1:5-11).

3. Aɓakuke ná-kpaazaɠai velesiɛi (1:12—2:1).

4. GALA ná-gooɠaaʋotegi velesiɛi (2:2-20).

5. GALA falii Aɓakuke daazeelini GALA ma (3:1-19).

1 Keela wooi ɠa ga nii, GALA ge dɛɛni ga GALA goo wo nui Aɓakuke.

GALA goo wo nui GALA toli fai
ga é ɓɔ ba

2 Nà yɛsu è lolisu eyɛsu siɛgi ɓɛgele zeeli,

Ɠɔoɠɔ GALAGI, ga è kpɔbai ɠɛ?

È la woilosu gòoi ma.

Nà kpeei loozu ga: «É ɓɔiɗa!»

È la unmɔɔgi wosu?

3 Leeni vaa zu è telebotala vaiti pɛ dɛɛzu ga ze?

Leeni vaa zu è vaazu bu, è ɠɛ ga maanɔɠɔ vai ʋɛtɛ nu?

Toomai ta nuɓusɛ maanɔɠɔ vai nɔ ɠa gè kaazu màaɠoolii zu,

sakpegi ta kpɔɛ vaiti nɔ ɠa ti ɠɛɛzu adaʋɛ pɛ.

4 Naa maaʋele ma, nu la mɔ ziɛzu ga tɔgi,

sɔle faa la mɔ ziɛzu.

Mazɔlɔɔ faa ɲɔu ɠɛ nuiti ti la vaazu bu, telebo nuiti ti ʋa boti ɠɛ,

tukpɔiti ti ɠaaleʋezu, ta leʋezu yaavai maazu.

GALA ná-gooɠaaʋotegi

5 Maliɠii ɠɛ ma: «À ɠaazulo dɛɛ zii ɠiligiti ba,

wo laa ɠa vɔ ga duai.

Mazɔlɔɔ wa yɛsu vulua, wo naa ɠa, nii é ʋaazu ɠɛɛzu,

fai naa é ɠɛɛzu, nu a la bona wo ma, wo la ɓena la da.

6 Nà ʋaazu ga Ɓaɓilɔne nuiti,

suɲɔu nuɓusɛiti, ti ziliai,

ti ɓizɛzu eteai zu

ga boa yooiti kula ti ya.

7 Ti maayikiʋɛ, ti maalua,

tiya ɓɔɠɔ ɠa ti ti yiima vai levezu ga ta-zobogi.

8 Ta-zooiti kpizɛʋɛ, é leʋe kɔii ʋa,

ta-ɲiigi ɠaawanaʋɛ, é leʋe zuluɓuiti tɔnɔi ʋa, ti nu ɓɛɛzu kpidii.

Ta-zoo ɓizɛ nuiti ti ɠɔɠɔa loɠa, ti zeɠe ɠoozama, ti ʋa,

ti ɠoʋe eɠɛ koɠɛi, é loozu ná-daamianigi ma.

9 Nuɓusɛi naati pɛ ta ʋaazu tooma vai nɔ ma,

ti ɠaazulogai nɔ ti-ɠakalaʋɛ ʋa,

ti ɗa duɔiti gaalɛ ba eɠɛ ɲaɠaegi,

10 ti ɗa ɲɛɛɠula masagiti su,

ti ɗa kundiɠiiti ɲɛɛ.

Ada ɓii ge la ti ɠaazu ga faa,

ta pɔlɔi ziɠitona siɠigi ʋa, ti lɛ ga ti naati so,

11 ti leʋe eɠɛ fiilɛ wolai, ti li ná taɠili,

ti ɠɛ ga sɔba nui, ti-zɛbɛi ɠa ti kɛɛzu ga ta-ɠalagi.»

GALA goo wo nui wooɠula vai
GALA ma ʋolu

12 Kɛlɛ kaite wɔlɔwɔlɔ, ɗa ɠa è ga Ɠɔoɠɔ GALAGI,

ɗa ga nà-GALAGI, ɲadegai, gi la zaa!

Ɠɔoɠɔ GALAGI, nà-fasai é màkɛsu,

è yiimazeɠea ga gi zili nui niiti, è zobogi ve ti ya,

è ɠɛ ti tukpɔi la gi unma.

13 È-ɠaazuʋɛti ɲadegɛ gola,

è ʋa va bu ga è faa ɲɔi ɠa,

è la zooga zeizu kpɛ, è ɗa wɛlɛ nimiza vai ʋa.

Leeni vaa zu è wɛlɛzu nɔ, è la faa nɔpɛ bosu,

naa zu, nii yaava nuiti ti bosu?

Leeni vaa zu è maaɠɛsu kpɔ,

siɛgi zu nu ɲɔiti ti zɔiti koloɠolosu da,

tama naati sɔlegai ti ʋa?

14 Ɗa nuɓusɛiti sosu, eɠɛ kpoloɗɛi wu ɠaleiti,

eɠɛ ani vulu goiti ti-ma un ge la ná.

15 Mazɔlɔɔ Ɓaɓilɔne nuiti ta nuiti sosu,

eɠɛ kalei kalagi sosu,

ti ʋa ga tiye ta-lumɔi zu,

ti ti ʋu ɓɔɠɔ ma ta-zeemai zu.

Naazu ta ɠoozunɛɛzu, ti ɲaɠai ɠula.

16 Ti ɗa zalaɠai ɠula ta-lumɔiti bɛ,

ti ansansegiti gala ta-zeemaiti bɛ,

mazɔlɔɔ naati saɓui zu, ta zoo ti laami,

daamianigi mɔin ti ya, gola nɛɛ.

17 Ti yɛ nɔ ta-lumɔiti suwosu,

ti ɗa zii ɠiligiti paa, maawɔinɠa la su?