1 Naa ɠa é ba, kɛ̀ɛleaiti, wo ga GALA nɔnɔiti, é wo loligai ga wo wɔnɔ zɔlɔɔ geeɠɔlɔgi zu vaa ʋagɔiti su, à ɠisiɛ lɛɛ Yesu zu, nii ade yeezeiɗai bu kɛlɛmaʋɛ ga tɔ ɠa é ga GALA ná-keelai ta zalaɠa ɠula ɠundiɠi wolai. 2 É ɠɛni ga wooɠɛɠila nu GALA bɛ, nii é ma losuʋɛ veeni zea, eɠɛʋelei Moize ɠɛni la GALA ná-pɛlɛi wu. 3 É leveni ga soloogɛ é lɛbiyai zɔlɔɔ, nii bɔɔlɔai é leʋe Moize nɔnɔi ʋa, eɠɛʋelei pɛlɛ lo nui ná-unfemai wɔɔlɔai la pɛlɛi nɔnɔi ʋa. 4 Mazɔlɔɔ pɛlɛi ma zii pɛ to nu ɠa ná, kɛlɛ GALA ka é anii pɛ toga. 5 Moize nɔnɔi, é ɠɛni ga wooɠɛɠila nu GALA ná-pɛlɛyeɠei wu ná pɛ. É ɠɛni ga botiɠɛ nui, tosuʋɛ ɠɛni ga é naama zeele wooi wo nii GALA ge ʋaazu bosu. 6 Kɛlɛ Kilista ɠa ga wooɠɛɠila nui, é ɠɛni ga Doun Zunui seiɗai GALA ná-pɛlɛyeɠei unda. Ada ga ná-pɛlɛyeɠei wu nuiti, ni ada da-ladalai zona kpaan ta kitogi, nii ade ɓɔɠɔ wɔɔlɔzu ma vaa zu.

7 Naa ɠa é ba, eɠɛʋelei Zɛnvu Ɲadegai bosu la ga:

12 Kɛ̀ɛleaiti, à dama, nui ta mina ɠɛ wo zaama, ɠi ɲɔi ʋa lɔ ziimaʋɛ, ta kidaaleʋelalai, é ʋa ʋoluave zɛnvu su ƓALAGI ʋa. 13 Kɛlɛ à ɓɔɠɔ iɲɔdɔ folo-o-folo, ni nɔ «za voloi» ɠa dɛ ná, nii GALA daawooi ɓɔɛzu é ʋilɛ ba, wo zaama ta mina ɓɔɠɔ yɛ ná, kotoi ʋa yaava, é ʋa ɠikpa. 14 Mazɔlɔɔ da Kilista ɠa de ɓɔgai faa ɠila ma, ni da yɛna da-ladala mɔungi ʋolu kpaan, eyɛsu gaaɓela foloi zeeli. 15 Tama bogɛ ga:

16 Ɓɛɛni ka ti GALA daawooi mɛnini, ti wuzeɠe daalɔɠɔma? Naati taade ɓaa, niiti Moize loni ti luɠɔ, ti ɠula Ezipete yooi ʋa? 17 Ɓɛɛni ka GALA ge yiiɠaawanani ti ma, kona ʋuunaanigɔ (40) laawu? Naati taade ɓaa, niiti ti kotoi ɠɛɛni, ti-ma ʋoomaiti ti yɛni teʋebai zu? 18 Ɓɛɛni ka é ɠonani ti ʋɛ ga ti la lɔa ná-dooɠogi zu? Naati taade ɓaa, niiti ti kololalai ɠɛɛni? 19 Da kaazu ɓalaa ga ti la ɠɛni zooni ti ʋa lɔ GALA ná-dooɠogi zu, tɔɔzei ta-ɠidaaleʋelalai ʋa.