5
Kundiɠiiti ta-ɠotoi
1 «Zalaɠa ɠula nuiti, à woilo nii ma!
Izilayɛle nuiti, wa ɓalaa, à woilo!
Masagi ná-pɛlɛwu nuiti ɓalaa ti woilo!
Wa ɠa wo maanɛai wo telebogi ɠɛ,
kɛlɛ wo ɠɛɛʋɛ ga balii Misepa,
wo ɠɛ ga wɔni zo tumɔi pilɛgai Taɓɔɔl gizei ma.
2 Wooʋalada nuiti ti zeɠe zuɠoozagi wɔa Sitime.
Kɛlɛ nɔ̀un, nà ma zalai ɠɛʋele ɓɛtɛzu ti pɛ bɛ.
3 Nɔ̀un, gè Efelayime ɠwɛni,
Izilayɛle la lɔɔɠuni bà.
Tɛi Efelayime ɓɔɠɔ vea koloɠologi ya,
naama ɗɛi ziaa Izilayɛle pɛ ma, é kɔzɔ.
4 Ti-ɠɛɛwotii la vaazu bu
ti ʋa ɠale ma ta-ƓALAGI ʋɔ.
Tɔɔzei koloɠolo fiilɛi ɠa ti zaama,
ta ti la Ɠɔoɠɔ GALAGI ɠwɛɛ.
5 Izilayɛle ná-wasogi ɠa zeele wooi wosu daalɔɠɔma.
Tama, Izilayɛle ta Efelayime ta-ɠotoiti ta ʋaazu ti loozu,
anɛɛ Zuda ɓalaa ka ʋaazu yɛsu, ti ʋa ti loo.
6 Ta li Ɠɔoɠɔ GALAGI ɠaiziɛzu ga ta-logani goiti ta ma wolaiti,
kɛlɛ ti la kaa,
mazɔlɔɔ naa lɔɔɠua ti ʋa.
7 Ti Ɠɔoɠɔ GALAGI yaavaʋɛ,
mazɔlɔɔ ti wɛɛn lointi sɔlɔɔgɛ.
Alu toga niinɛi ma vɛtii ɠa ʋaazu,
é ti undaaʋili ta ta-ʋoganiiti.»
Kɔɔi é Efelayime ta Zuda yɔɠɔzu
8 «À koolei vɛ Giɓea,
wo puʋugi vɛ Lama.
À zezei wo Ɓɛte-Avɛn.
Ɗa ma, Ɓɛnzamɛn wolodai,
ta ga è zo ga è ʋoluʋelei.
9 Yeei Efelayime ná-kpakɔi zeelizu la ma,
ná-zooi ɠa ɠɛ ga teʋebai.
Faa ɠila ka gè bosu Izilayɛle wolodamaiti ma,
nii é la zeɠea ma.
10 Zuda ɠundiɠiiti ta ga numaa ti kwɛpelegiti seɠezu daazu,
nà nà-ziiɠaawanai yeizu ti ma eɠɛ ziɛ veinfeingi.
11 Efelayime ɠa ɠoloɠolosu,
é ɓulukpulu ga tukpɔi é zeelizu ma,
mazɔlɔɔ toɠa pɔ é ziɛ ga ɓɔɠɔ ɠisu vai nɔ.
12 Nɔ̀un nà ɠɛɛzu ga fɔingi Efelayime wolodai ʋa,
gè ɠɛ ga wologi Zuda ʋɛlɛyeɠei ʋa.
13 Efelayime ná-seeɓɛi ma vaa zuɠwɛɛga,
Zuda loa ga ná-palai vai.
Efelayime liini Asiili,
é keelaiti teʋe masa golai ma.
Kɛlɛ masagi naa la zooga é ʋa wo ɠɛdɛ,
ɓaa é ʋa sale ʋu wa-ʋalai ɠa.
14 Tɔɔzei nà ɓɔɠɔi ɠa gè Efelayime zosu,
ʋelei zalai a ɗa sogi wo da,
gè vala Zuda ʋa, ʋelei filɛ zuai a ɗa kɛɛ la.
Nà bali ga, gè li, nà lii la, nu nɔpɛ ge la kula zèa.
15 Nà li, gè ɠale ma nà-pɛlɛi wu,
eyɛsu ti ɓɔɠɔ ɠwɛɛ ga sɔba nu, ti ɠaaʋote mà.
Ta ɠɛna kidaaʋiligi zu, ta gàiziɛ naazu.»