38
Ezekiase zeeɓɛ vai ta kɛdɛ fai
(2 Dɔlɔ Sɛʋɛi 32:24-26;
2 Masagiti 20:1-11)
2 Masagiti 20:1-11)
1 Naama ziɛgi zu Ezekiase zeeɓɛni, é ɠɛnina zaazu. Amɔse ná-doun zunui Ezayi, GALA goo wo nui liini pɔ bɛ, é ɠɛ ma: «Ɠɔoɠɔ GALAGI wooi ɠaa: ‹Ɗa-vaiti gaaɠula ba, é devei yɛ ɗa-ʋɛlɛyeɠei ya, tɔɔzei ɗa ga za, è la ɠulazu seeɓɛi nii zu.› » 2 Ezekiase ɠaaʋoteni pɛlɛi ma, é Ɠɔoɠɔ GALAGI maanɛɛnɛni ɠani: 3 «Ee, Ɠɔoɠɔ GALAGI, soma è ɠizɛ su ga sìɛʋɛ è ɠaazu ga wooɠɛɠiladai ta ɠi pagɔlai, gè naa ɠɛ nii pagai è ɠaazu.» Naa ʋoluma Ezekiase wɔlɔni, gaazuɗɛi ʋu ga gola.
4 Naazu Ɠɔoɠɔ GALAGI ɓɔɛni Ezayi ʋɔ, 5 ga é li, é ɠɛ Ezekiase ma: «Ɠɔoɠɔ GALAGI, è-mɛmɛwola Davide ná-GALAGI wooi ɠaa: ‹Gè ɗa-maanɛɛnɛ wooi mɛniga, gè è-ɠaazuɗɛi ɠaa. Deɠɛmu gè kona puugɔ maazu lɔɔlugɔ (15) ʋiliga è-zii zu. 6 Ɗa-o, taai nii-yo, nà wo unmɔɔsu, gè wo ɠula Asiili masagi ya, nà taai nii makɛ.› 7 Wɛlɛ Ɠɔoɠɔ GALAGI ná-poogi ʋa è ʋɛ, é dɛɛ ga wooi nii é bogai, toɠa daazeeli: 8 ‹Nu lɛɛzuʋɛ Aɠaze ná-kɔɠɔ losuʋɛ wu, foloi zeɠeni niina ná, niinigi ʋɛɛ naa ma.› » Ɠɔoɠɔ GALAGI niinigi ɠulani ʋolu ga kɔɠɔ losu puugɔ, é zeɠe nu ɠɔɠɔ losuʋɛti, foloi ɗa loo naa ma ʋolu.
9 Zuda masagi Ezekiase ɠɛdɛgai ma, é ɠula ná-seeɓɛi zu, é ɠima ɓɔɛi nii zɛʋɛni.
10 «Gè ɠɛni ɠɛɛzu ma:
‹Gè sìi ma ɠaaɠwɛ saamai nɔ ɠɛa,
kɛlɛ kɛni gè li!
Kɛni gè leʋe ga gɔvɛiti ta-laazu ʋele,
gè ʋalaga nà-eteai ma ɠonagi mɔtaiti ma.›
11 Gè ɠɛni ɠɛɛzu ma:
‹Gè la mɔ Ɠɔoɠɔ GALAGI ɠaa,
Ɠɔoɠɔ GALAGI, fulu nuiti ta-eteai zu,
anɛɛ nu vulu ɠila kpalaa, etea nuiti saama.
12 Zɛ̀nvui ɠulaa zèa, é li maaɠooza bà,
eɠɛ baala makɛ nui ná-seɠe ɠotai.
Zɛ̀nvui ma ɠezei ɠa ɓilisu,
eɠɛʋelei geze vɛlɛ nui a ɗa kɛɛ la ga ná-seɠe vɛlɛai,
kpega ʋoluma ga ma ɠeze ɠaluiti teʋeleʋe.
Aisa kpɔkɔi ʋa é zeeli, Màliɠii,
è ɓega ga nà-fai ɠaaɓela!
13 Gè ɓɔɠɔ zoni eyɛsu sobui.
Maliɠii mà ɠaeiti golowoloni,
eɠɛʋelei zalai a ɗa kɛɛ la.
Aisa kpɔkɔi ʋa é zeeli, Màliɠii,
è ɓega ga nà-fai ɠaaɓela!
14 Gè ɠɛni kpee goiti toozu eɠɛ sɛʋɛzɛʋɛgoi,
gè ɗa ɓala eɠɛ poopogi.
Gàazuʋɛ zuɓɔlɔ ga gɔlɛi geezuʋɛ.
Ee, Maliɠii, nà kidaaʋiligi zu.
Ʋa è ɓɔ bà!›
15 Leeni ɠa nà bo?
Maliɠii ɓɔɛni pɔ̀, tɔ ɓɔɠɔi é ti pɛ kɛa.
Nà yɛ ziɛzu ɓɔɠɔmaayeii zu,
sìi ma voloiti pɛ su,
nà-ziizoolɛ vai maaʋele ma.
16 Maliɠii, è-laawooi zaɓui zu ɠa nu ɠa yɛnvu la è ɠoozunɛ,
saɓu zu ɠa gè zɛnvui wosu da ʋolu.
Ɗa pù su ʋolu, è zɛ̀nvui ve zèa mɔnɔ.
17 Nà-kidaaʋili golai valiboga ga ziilɛigi,
mazɔlɔɔ ɗa-nɛɛbɛi zu, è kùla saai ya,
è nà-faaɠaazagiti piliga ya è ʋoluʋelei.
18 Gɔvɛalaazu laade a è maamusɛ,
saai laade a è maamusɛ,
zɔiti ti laani kabai zu,
naati ki ge la mɔ looni ɗa-wooɠɛɠiladai ʋa.
19 Fulu nuiti nɔ ɠa ta zoo è maamusɛzu,
eɠɛʋelei nɔ̀un gè la za.
Ɠɛɛɠɛi ɠa a ná-dointi kala ga ɗa-wooɠɛɠiladai.
20 Ɠɔoɠɔ GALAGI kìzoni!
Gá è maamusɛ ga gɛingɛin ganigiti
gi-zii ma voloiti pɛ su ɗa-ʋɛlɛi wu, Ɠɔoɠɔ GALAGI.»
21 Ezayi devei woni ga: «Ti ʋa ga kooleɠoolegi ɠaawaai ɠaayɔgai, ti siɛ wologi ɠa, masagi ɠa ʋalo.» 22 Ezekiase ɠɛni ma: «Poogi ɓɛgele ɠa nà kwɛɛ da ga nà zoo gè li Ɠɔoɠɔ GALAGI zei ʋɛlɛi ma ɠoizuʋɛ?»