1 Ɠɔoɠɔ GALAGI ɠɛ ma:

«Wɔiti wo ɓizɛzu ga kizogi ɠaiziaa, wo ɠoloai bɛ̀,

à woilo gòoi ma.

À ɠaazulo dɛɛ fasai ʋa,

ʋɛ wo ɓɛtɛai ná ga kɔtui saɠaai,

à ɠigaiziɛ lɛɛ zeɠei tɔna su,

ʋɛ wo mɛɛngai, wo ɠula ná.

2 À wo-ɠɛɛ Abalaame ʋɛtɛ dɛɛ,

ta Sala é wo ɠaazulaai eteai ma.

Gè Abalaame loligai ma,

doun la ɠɛni dɛ zea.

Gè tuya looni bɛ názu,

gè mavofoda mɔinmɔin fe zea.»

3 Siyɔn maawɔin Ɠɔoɠɔ GALAGI zoni,

ta adaʋɛti ti ɠoloɠoloni.

Ti-zeizuʋɛ ʋɛ ná ɲakaai,

toɠa naa ɠɛ ga Edɛn,

niima zou vɔɔi tɛi ka ɠɛ ga Ɠɔoɠɔ GALAGI ná-kpelei zu.

Koozunɛ wolai ɠa a ɠɛ ná,

ta maamusɛ wuyeiti ta gɛingɛin ganiiti gooi.

4 Ɠɔoɠɔ GALAGI ɠɛ ma:

«Nà-nuɓusɛiti, à woilo gòoi ma,

nà-zooi, woilo gòoi ma.

Nà ɠa gè tɔgi zeizu,

nà-tukpɔɠaaleʋei ɠa é ga wozakalagi nuɓusɛiti pɛ bɛ.

5 Ungo, nà-telebo fai maaɓuɠaa,

nà-kizo fai ʋa ɠula kɛlɛma,

nà nuɓusɛiti tukpɔɠaaleʋe.

Ziɛ zaama yooiti ta kpoloɗɛi laaʋɛ yooiti ta ɠito bà,

ti ʋoluzei nà-zobogi ʋa.

6 À wɛlɛ maazu ʋelei geeɠɔlɔgi ʋa,

naa ʋolu wo wɛlɛ buu ʋelei zooi ma.

Geeɠɔlɔgi ɠa ɲɛɛlɛ eɠɛ duului,

zooi wɔlɔzaɠa, é loo ya eɠɛ seɠei,

gaa nuiti undaaʋili eɠɛ diiliiti.

Kɛlɛ kizo fai gè ʋaazu la,

naa ɠa yɛ ná ɠɔ,

kwɛ ge la ɠɛa nà-kɛɛwotii ma lelebodai ʋa.

7 «À woilo gòoi ma,

wɔi wo faa zɔlegai ɠwɛɛ.

Ee, nà-nuɓusɛiti, wɔiti wo nà-tɔgi wo-yiimaʋɛ,

à mina lua nuɓusɛiti ta-ɲɛɛɠulasui ʋa,

ta-ɓaaɠulamai mina wo zuɓali pa.

8 Mazɔlɔɔ ɓaɠaɓaɠaiti ta ti mi eɠɛ seɠei,

fɔfɔiti ti ti mi eɠɛ baala deɠa zeɠei.

Kɛlɛ nà-telebodai ɠa yɛ ná ɠɔ,

nà-kizo fai ɠaa ɠa wɔɔlɔ,

yeeɠɛɠalai zu nuiti pɛ bɛ.»

9 Wuun, wuun!

Ɓɔɠɔ maaɠili ga zobogi, Ɠɔoɠɔ GALAGI yeei!

Wuun, eɠɛ wɔlɔwɔlɔi ma voloiti,

ga wɔlɔwɔlɔi ɠɛʋele nii teʋegai na!

Ɗa la ɠɛni de ɓaa, è ʋa ɠɛni Ezipete yooi woloni,

è ʋa kpoloɗɛ wu zua wolai naa zuɓota?

10 Kɛbɛ ɗa ɠa è kpoloɗɛi vɔɔni su,

zeɠe zɛbɛlɛgi zu ɗɛiti pɛ?

Kɛlɛ ɗa ɠa è pelei laani kpoloɗɛi ɓomaʋɛ,

nii a kɛ ɗa-nuɓusɛiti è ti unmɔɔni,

ti zoo ti leʋe?

11 Zekana é la, zɔiti Ɠɔoɠɔ GALAGI ti unmɔɔgai,

ta ɠale ma, ta zeeli Siyɔn ga pilɛ sɔlɔɔ guyeiti.

Ɠɔoɠɔ koozunɛɛi ɠa ti-ɠaazuʋɛti folo,

ta undaanɛɛi ta koozunɛɛi zɔlɔɔ,

ziiɓɔlɔi ta gaazuɠili vaiti maa ɠa ɠooza ti ʋa.

12 «Nà ʋe de, nà ɠa gè wo ɠaanɛɛnɛzu.

Leeni ʋe de ɗa lua nui ʋa, é ʋaazu zaazu,

nuɓusɛi ti ɠa ɠɛʋele ta tufai?

13 È yeema deɠɛmu Ɠɔoɠɔ GALAGI ma, é è ɓɛtɛni,

é geeɠɔlɔgi zuvieni,

é zooi ma wuulaagiti da?

Folo-o-folo è zasu ɗa ɓali ga duai,

tɔɔzei nu ɲɔi ná-ziiɠaawanai ʋa,

é dɛɛzu ga toɠa ɠɛʋele ɓɛtɛzu,

é ʋa è ɠoloɠolo?

Mini ɠa nu ɲɔi ná-ziiɠaawanai ná?

14 Nágo ʋe na, kasoɠa nui ʋa ɠula kasoi ɠa.

É la zaa ná-kasoi ɠa,

é la ʋalaga ná-daamianigi ma.

15 Nɔ̀un nà, nà ga Ɠɔoɠɔ GALAGI, ɗa-ƓALAGI,

nà ɗa kpoloɗɛi ɲiikpisu,

eyɛsu ma lakpatakpagiti tugi ɠula.

Dàasei ka ga Ɠɔoɠɔ GALAGI, Fai-Pɛ-Maliɠii.

16 Gè dàawooiti pua è-la,

gè zèe ma niinigi zɛlɛ è maazu,

nɛ̀i gè geeɠɔlɔgi zuvieni,

gè zooi ma wuulaagiti kpɛtɛ,

gè ɠɛni Siyɔn ma: ‹Nà-nuɓusɛi ɠa ga ɗe!› »

17 Wuun, wuun! Wuzeɠe, Zeluzalɛme,

ɗɛi è ɓɔɔleai ga ziawɔi daavegai ga ziiɠaawanai,

Ɠɔoɠɔ GALAGI feai è ya,

ungo, è ɓɔɔleni ga gaazulati ɗaawɔi,

eyɛsu é zeeli kpogi zu.

18 Doun zunuiti pɛ è ti zɔlɔɔgai,

tanɔpɛ ge la ti zaama, é ɓɔni è ʋa.

Doun zunuiti pɛ è ti ɠulasu,

tanɔpɛ ge la ti zaama, é è zuzoni.

19 Maanɔɠɔ vaa zeizu felegɔ ɠa seeliai è ma:

faa zuɠoloɠologi ta nimizai, pului ta kɔɔi.

Kɛlɛ ɓɛ ɠa a è maaɓeeloo?

Ɓɛ ɠa a è ɠaanɛɛnɛ?

20 È-loun zunuiti dɔtɔzuleʋea,

ti laani taazuʋɛ zooi ma pele ɠobaʋɛti,

eɠɛ goegiti ti ɠɔai ga balii.

Ɠɔoɠɔ GALAGI yiiɠaawanaai ti ma,

ti ɗa-ƓALAGI ná-zelilomai laawu.

21 Naa ɠa é ba, woilo nii ma, maawɔin nui,

ɗɔungi zeɠeai ma, kɛlɛ dɔɔi maaʋele laade!

22 Ɗa-ƓALAGI, Ɠɔoɠɔ GALAGI, è-Maliɠii wooi ɠaa,

zɔi é ʋaazu ná-nuɓusɛiti maalobosu:

«Gè gaazulati ɗaawɔi ɠulaa è ya,

è la mɔ ɓɔɔlea pɛ ga ziawɔi daavegai ga nà-ziiɠaawanai.

23 Mazɔlɔɔ nà seizu è zili nuiti zeaʋɛ,

tɛi ti ɠɛni ɠɛɛzu è ma:

‹Laaʋɛ, gi ziɛ è ma!›

È è-ʋoluʋɛ ɠɛ eɠɛ zooi,

é ɠɛ ga pelei ziɛ wo nuiti bɛ.»