GALA Daawoo Zɛʋɛi Zelemi 12

Leeni vaa zu
faa ɲɔu ɠɛ nuiti ti ɓɔɠɔ zɔlɔɔsu?

1 Ɠɔoɠɔ GALAGI, è lelebogɛ gola,

gè ʋa tukpɔ laalɛ è wu.

Anɛɛ naa ʋe, nà pɔ gè ɓɔɛ è ʋɔ ga ɗa-lukpɔɠaaleʋe faiti.

Leeni vaa zu faa ɲɔu ɠɛ nuiti ti ɓɔɠɔ zɔlɔɔsu ta-ʋeleiti su?

Leeni vaa zu GALA kwɛɛtala nuiti ti ta-eteai ziɛzu undaanɛɛi zu?

2 È ti ziinni, ti zape ziaa,

ta liizu luɠɔma, ti ɗa kulanumai zɔlɔɔ.

È-laaseigi ɠa ti-la yeenɔpɛ,

kɛlɛ ɗa-vaa nɔpɛ ge la ti yiima.

3 Nɔ̀un nà, Ɠɔoɠɔ GALAGI, è kwɛ̀ɛ,

ɗa pɛ̀tɛsu, è fɛ̀ɠɛlɛfɛɠɛlɛga,

gè yiimazeɠea ga ɗe.

Kɛlɛ tiya ya, ti ʋu yɛ eɠɛ baalagiti ti liizu ga tiye ti ʋaazuʋɛ,

ti ʋu yɛ, ti ʋaa voloi luɠɔ.

4 Zooi ɠa yɛsu saa wɔlɔi ɠa eyɛsu yeelɛ?

Dɔɓɔi ɠa yɛsu fɔɔvɔgi laawu eyɛsu yeelɛ?

Dɔɓɔ zuaiti ta wɔniiti undaa ɠa ʋilisu zooi zu

tɔɔzei nuɓusɛi ná-ɲɔi maaʋele ma,

ti ɗa ɠɛ ma: «É la zooga naa ɠwɛɛsu, nii seiɗai gi luɠɔ.»

5 Ɠɔoɠɔ GALAGI ɠɛ mà:

«Ni ɗa ɓɔlɔzu ga kpizɛi siɛ kɔɠɔa nuiti polu,

ɗa zoo lɔɔzu ɠale zeezuɠɔɠɔgi zu wa sooiti?

Ni ɗa ɠisiɛzu ga ɗa kpaamaazu ʋagɔi zɔlɔɔ

zooi naa nɔ zu ʋɛ fai pɛ soloogai ná,

ɗa kɛ ɠale ɗa ɠɛna Zuludɛn ma lɔɓɔ ɠaaɠiligi zu?

6 Mazɔlɔɔ anɛɛ è-ɠɛɛlointi ta ɗa-wolodai zu nuiti ta yaavai lɔɔzu è ma,

ta nuiti gaalɛzu ba è laalɔɠɔma, è yeema zu.

Ti ɠɛɛ ʋa kpɔɛ nɛɛnɛgiti bosu, mina la ti la pɛ.»

Ɠɔoɠɔ GALAGI ɠɛlɛ vai
sei ʋɛlɛi ta ná-nuɓusɛiti ba

7 «Gè yeeɓega sèi ʋɛlɛi ʋa,

gè ɠɛlɛa nà-nuɓusɛiti ba ti ga nɔ̀nɔiti,

nii nɛai bɛ̀, gè naa lɔa sili nuiti zeezu.

8 Mazɔlɔɔ nuɓusɛiti ti ga nɔ̀nɔ,

naati ti ɠɛa bɛ̀ eɠɛ zalai é dɔɓɔi ʋa,

é ɗa zikɔ dàalɔɠɔma,

naa ɠa é kɛa ti la mɔ nɛɛni bɛ̀.

9 Nà-nuɓusɛiti ti ɠɛa ga wɔnii maaleɠai zupuai

nii wɔniiti ti zeɠezu adaʋɛ pɛ, ti ɗa ʋu ma?

À li, wo dɔɓɔ zuaiti pɛ gaalɛ ba!

À ʋa ga tiye daamii ɓɔgi zu!

10 Baala makɛ nu mɔinmɔin ge nà-leezɛn ɓelei zuɠoloɠologa,

ti ɠɔɠɔlo su,

ti kpele ʋapagi nii ɠɛa ga teʋebai zu naa ɠaalɛi.

11 Ti faliboga ga adaʋɛ naa ɠaalɛiɗai,

é gɔlɔi laawu, iɲɔteʋeai na gàazu.

Zooi zuɠaalɛiɗa ná pɛ,

nu nɔpɛ ge la yiizoolɛzu ga ma vai.

12 Teʋebai zu, gaaɠoozazuʋɛti nu la zeini ná,

toosu nuiti ti ʋaa,

mazɔlɔɔ Ɠɔoɠɔ GALAGI boɠa zɔkpɔi maalega,

nii é zooi ɠoloɠolosu ná pɛ,

ziilɛi ge la nu ɠila kpalaa bɛ.

13 Ʋɛ ti moloi vazani ná,

ɠaingiti ka ti ti leʋeni miná.

Ti ɓɔlɔni wafuun nɔ, tɔnɔ ge la ɠɛɛni ba.

Wa-molo leʋei ma lɔnɔgi ɠa wo yeelaave ga unfegi,

Ɠɔoɠɔ GALAGI ná-ziiɠaawana wolai ma lɔnɔgi ɠana.»

Nii seiɲɔɠɔ ɲɔiti ti ʋaazu sɔlɔɔsu

14 Ɠɔoɠɔ GALAGI wooi ɠaa: «Seiɲɔɠɔ ɲɔiti kpein ti laalɛɛzu zooi wu gè feeni nà-nuɓusɛiti zea, Izilayɛle nuiti, nà tiya ɓalaa ti lɔɔɠulazu ta-yooiti su, gè Zuda nuiti ɓalaa tɔɔɠula ti zaama. 15 Kɛlɛ gè ti lɔɔɠula ʋoluma, nà ti maawɔinɠa mɔnɔ ga niinɛ, gè ti ɠaaɠale ma ta-ʋoganiiti unda, ɛsɛ ge ɠɛ ná-zou zu. 16 Ni ta ɠaaɓaana, ti ziɛ ga nà-nuɓusɛiti kɛʋele, ti ɗa konai wo dàaseigi zu ga: ‹Gè ɠonaa Ɠɔoɠɔ GALAGI ma, nii é vulua,› eɠɛʋelei ti nà-nuɓusɛiti kalani da ga ti ɗa konai wo kɔɔɠɔ ganigi Ɓaale laaseigi zu, naazu ta zeizu zɔlɔɔ nà-nuɓusɛiti saama. 17 Anɛɛ naa ʋe, ni ma yooi ta a ɠɛna ná, é ɠɛlɛ, é la woiloni, naazu nà zooi naa lɔɔɠula ɲɛgɛlɛin, nà tɔɔɠula, gè zɛ ná undaaʋili,» Ɠɔoɠɔ GALAGI wooi ɠana.