1 Zoziase ná-doun zunui Sedesiyase*27:1 Sedesiyase: Eɓulu woo zɛʋɛ wɔlɔmai zu, naa ɠa ga: Yeɠoyakime. ɠɛai ma feya ga Zuda masagi, Zelemi niima leveiti sɔlɔɔni Ɠɔoɠɔ GALAGI ya: 2 «Ɠɔoɠɔ GALAGI wooi ɠaa mà: ‹Galuiti kpɛtɛ, ta unbawuluiti, è ti ʋu ɠɔma. 3 È ti leʋe Edɔme masagi ma, ta Moaɓe masagi, ta Amɔn nuiti ta-masagi, ta Tiil masagi, ta Sidɔn masagi, ti ve keelaiti zea, ti ʋaani Zuda masagi Sedesiyase ʋɔ bɛ. 4 Vali ti ma, ti bo ta-ɠundiɠiiti ma ga: Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: Wɛlɛ nii ɠa wa bo wa-ɠundiɠiiti ma: 5 Nà ɠa gè geeɠɔlɔgi ta zooi ɓɛtɛni, ta nuɓusɛiti ta suaiti ti eteai zu, ga nà-zobo golai ta nà-fɔnifaamai. Zɔi a nɛɛ bɛ̀, naa ɠa nà eteai ve zea. 6 Ɠani nɔ, gè niima yooiti pɛ dɔa Ɓaɓilɔne masagi Neɓukadenɛzaal yeezu, nà-botiɠɛ nui ʋe. Gè dɔɓɔ zuaiti ɓalaa fea bɛ, ti maavai ɠɛ. 7 Ziiti kpein ta botii ɠɛ bɛ, ta kɛ tɔun bɛ, ti kɛ ná-doun zunui ʋɛ, ta ná-dounloin ʋɛ, eyɛsu naama ziɛgi zeeli, voloi ná-zooi ɓɔɠɔi maanɛai la ga é ɠolo zii tanigaa ʋɛ ta-zobogi wɔɔlɔai gola, ta masagiti ti wola wɔɔlɔai.

8 « ‹Ni zii ta ɓaa masadai ta a ɠɛna ná, é la kɛɛni é ʋa ɠolo Ɓaɓilɔne masagi Neɓukadenɛzaal ʋɛ, ni ti la kɛɛni ti ʋa lɔ ná-unbawului wu, nà wuzeɠe ti laalɔɠɔma ga kɔɔi, ta pului, ta ɗɔfɔ zeeɓɛi, eyɛsu gè ti-ma zuwu ɠaaleʋe ga ma Ɓaɓilɔne masagi Neɓukadenɛzaal yeei,› » Ɠɔoɠɔ GALAGI wooi ɠana. 9 « ‹Wɔun wa, à mina woilo GALA goo wo nuiti goo ma, ta ungaiziɛ nuiti, ta se goo ʋoluwo nuiti, ta adɔɓɛɛ nuiti, ta zoɠoiti, tɛiti ti ɠɛɛzu ma: Wo la lɔa Ɓaɓilɔne masagi yeezu. 10 Kɛlɛ nii ti bosu wo ma kɛɛ yeeluɠɔ, zɛɛi ʋe. Ni wa woilona ti-woo ma, ta liizu ga woye, wo maaɠooza wa-yooi ʋa, nà wo ɓɛɛna, wo undaa ɠa ʋili. 11 Tama, zii é ɠɔgi lɔɔzu Ɓaɓilɔne masagi ná-unbawului wu, é botii ɠɛ bɛ, nà dooɠo fe naa ʋɛ ná-zooi ɠa, ga é tii ɠɛ ga, ta é zei ná,› » Ɠɔoɠɔ GALAGI wooi ɠana.

12 Zenɔ ɠana gè ɓɔɛni la Zuda masagi Sedesiyase ʋɔ kpein, gè ɠɛ ma: «Ɗa-o, ɗa-nuɓusɛiti-yo, à va bu wo unbawului zeɠe nii Ɓaɓilɔne masagi daazu wo unma, à ɠolo bɛ ta ná-nuɓusɛiti, naazu wo-yɛnvui ɠa yɛ wo ya. 13 Leeni vaa zu ɗa-o, ɗa-nuɓusɛiti-yo, kɛni wa za ga kɔɔi, ɓaa pului, ɓaa ɗɔfɔ zeeɓɛi? Tama naa ɠa a zeeli naama yooi ma, nii a ɠɛlɛna ga é la ɠoloa Ɓaɓilɔne masagi ʋɛ, eɠɛʋelei Ɠɔoɠɔ GALAGI boni la. 14 À mina woilo GALA goo wo nuiti goo ma, ti ɠɛɛzu wo ma: ‹Wo la botii ɠɛa Ɓaɓilɔne masagi ʋɛ.› Mazɔlɔɔ nii ti bosu wo ma ga ʋelela ʋele vai, zɛɛi ʋe. 15 ‹Gè la ti leʋeni,› Ɠɔoɠɔ GALAGI wooi ɠana. ‹Ta kɛɛzu eɠɛ ta dàawoo wosu, kɛlɛ zɛɛi ɠa ti bosu. Ni wa woilona ti-woo ma, nà wo ɓɛɛzu ʋɛ, wo undaaʋili, wa-o, GALA goo wo nuiti-yo.› »

16 Gè ɓɔɛni zalaɠa ɠula nuiti pɔ, ta nuɓusɛiti, gè ɠɛ ma: «Ɠɔoɠɔ GALAGI wooi ɠaa: ‹À mina woilo GALA goo wo nuiti ma, ti ʋelela ʋele vai wosu ga: GALA sei ʋɛlɛi wu zɔɔlaiti ta ʋaazu ɠani nɔ, ti zeɠe Ɓaɓilɔne. Mazɔlɔɔ ʋelela ʋele vai naa ti bosu, zɛɛi ʋe. 17 À mina woilo ti-wooi ma, à botii ɠɛ Ɓaɓilɔne masagi ʋɛ, wo-yɛnvui ɠa yɛ wo ya. Leeni vaa zu kɛni taa wolai nii ɠoloɠolo?

18 « ‹Ni ta ga GALA goo wo nu ɠitea, ta ni Ɠɔoɠɔ GALAGI laawooi ɠa ti ya, ti Ɠɔoɠɔ GALAGI, Fai-Pɛ-Maliɠii maanɛɛnɛ ga sɔɔlai niiti ti Ɠɔoɠɔ GALAGI zei ʋɛlɛi wu, ta niiti ti Zuda masagi ná-pɛlɛi wu, ta niiti ti Zeluzalɛme, naati ti mina li Ɓaɓilɔne. 19 Mazɔlɔɔ Ɠɔoɠɔ GALAGI, Fai-Pɛ-Maliɠii wooi ɠaa, é ʋilɛ kpɛdɛgiti faa ʋa, ta ziɛ liɠi wolai ʋa, é ga kɔlu ɓɔigi, ta ma ɠɔɠɔiti, ta sɔɔlai zɔiti pɛ ti yɛgai dɛ Zeluzalɛme, 20 Ɓaɓilɔne masagi Neɓukadenɛzaal la ɠɛni ti zeɠeni Zeluzalɛme, é ʋa li ga tiye Ɓaɓilɔne, siɛgi zu é liini la ga Zuda masagi Yekonia, Yeɠoyakime ná-doun zunui, ta seizumaanɛgiti ti ɠɛni Zeluzalɛme ta Zuda: 21 Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa, é ʋilɛ sɔɔlaiti faa ʋa, zɔiti ti yɛgai Ɠɔoɠɔ GALAGI zei ʋɛlɛi wu, ta Zuda masagi ná-pɛlɛi wu, ta Zeluzalɛme: 22 Ti pɛ ta liizu Ɓaɓilɔne, ta yɛ ná eyɛsu gè ɓaa ti maazu,› » Ɠɔoɠɔ GALAGI wooi ɠana. « ‹Nà ti zeɠe ná, gè ʋa ga tiye ʋolu niima adaʋɛ tɛi.› »