30
Izilayɛle nuɓusɛiti galema vai ʋolu
1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya: 2 «Ɠɔoɠɔ GALAGI, Izilayɛle ná-GALAGI wooi ɠaa: ‹Wooiti kpein gè ti woni è ma, ti zɛʋɛ sɛʋɛi ta zu. 3 Wɛlɛ, naama yee ɠa ʋaazu, voloi gè ʋaazu la ga nà-nuɓusɛiti, Izilayɛle ta Zuda, ti ga duɔiti,› Ɠɔoɠɔ GALAGI wooi ɠana. ‹Nà ʋaazu ʋolu ga tiye zooi naa zu, nii gè feeni ti-mɛmɛwolani zea, ta sɔlɔɔ ga tɔnɔ.› » Ɠɔoɠɔ GALAGI ɠa é boga.
4 Wɛlɛ wooiti ba, Ɠɔoɠɔ GALAGI puuni Zelemi la, Izilayɛle ná-faa zu ta Zuda ɓalaagi:
5 «Ɠɔoɠɔ GALAGI wooi ɠaa:
‹Gá zɔngɔ maalua ɓee wooi mɛnisu,
maalua vaa ʋe, ziilɛi faa laade.
6 À gaazaɠa bo, wo wɛlɛ,
ni zunu doun zɔlɔɔga!
Leeni vaa zu deɠɛmu, gè zunuiti pɛ kaazu,
ti zaamaʋɛti sogai ga yeeiti,
eɠɛ doun ɠoozuwana a ɠɛ anzanu ʋa,
ti pɛ ti ɠaazumaaloɠaai?
7 Maanɔɠɔ ʋe! Mazɔlɔɔ foloi nii maayikiʋɛ!
Taɠili ge la ɠulani ga nii!
Kidaaʋili siɛgi ʋe seeliai Zakɔɓe mavofodaiti ma,
kɛlɛ ta unmɔɔgi zɔlɔɔ, ti ɠula su.
8 « ‹Naama volo ná, nà unbawului ɠaleɠale nii é ti ɠɔba, gè ti ɠili ɠaluiti fie ti ʋa. Naazu ti la mɔ ɠɛa ga wɛɛn ná-duɔ eyɛsu ɠɔ,› » Ɠɔoɠɔ GALAGI, Fai-Pɛ-Maliɠii wooi ɠana. 9 « ‹Kɛlɛ ta botii ɠɛ bɛ̀, nà, Ɠɔoɠɔ GALAGI, ta-ƓALAGI. Nà Davide zei ʋolu ga ta-masagi, ti botii ɠɛ bɛ.
10 Ɗɔun ɗa, nà-botiɠɛ nui Izilayɛle,
deɠɛmu mina lua pɛ,› »
Ɠɔoɠɔ GALAGI wooi ɠana,
« ‹mina iɲɔteʋe, ɗɛi è ga Zakɔɓe mavofodai!
Mazɔlɔɔ nà è unmɔɔsu,
è maaɠooza ʋa poun zou ɠili su,
è-mavofodai ɓalaa ɠa ɠula zooi naa zu,
ʋɛ é ná duɔlai zu.
Izilayɛle, ɗa ɠale ma ʋolu, ɗa zei dɔin, ziilɛigi zu,
nu nɔpɛ ge la mɔ è maalua.
11 Mazɔlɔɔ nà è ʋa, gè è ɠizo,› »
Ɠɔoɠɔ GALAGI wooi ɠana.
« ‹Nà zii ɠiligiti pɛ ma zuwu ɠaaleʋezu
niiti gè wo vazani ti zaama,
kɛlɛ gè la è ma vaa ɠaaɓelaa.
Kɛlɛ tɔun nà è loɠa,
é zoloo naa ma, nii sɔlegai,
gè la è yɛga ná eɠɛ sɔbalala nu.› »
12 «Ɠɔoɠɔ GALAGI wooi ɠaa:
‹Ɗa-maawanai zuwɔɔlɔʋɛ gola,
ɗa-ʋalai la ɠɛdɛga.
13 Nu nɔpɛ ge la yiizoolɛzu ga ɗa-vaa.
Pɔlɔma ta ɗa palaiti balo,
kɛlɛ ɗɔun, sale la ná è ma vaa ma.
14 È-nɛɛɲɔɠɔiti pɛ ti yeema è ma,
ta la mɔ yiizoolɛzu ga ɗa-vaa.
Mazɔlɔɔ gè è loɠani eɠɛ nu a ɠɛ zili nu loɠazu,
gè zeini è ɠa ga maaɠoloi,
mazɔlɔɔ ɗa-vaaɠaazagi zuwɔɔlɔni,
ɗa-ɠotoiti ti mɔin gola.
15 Leeni vaa zu è kpalagi wosu ga è maanɔɠɔ vai,
palai é è ʋa é la ɠɛdɛsu?
Ɗa-vaaɠaazagiti suwɔɔlɔ vai maaʋele ʋe,
ta ɗa-ɠotoiti mɔin vai gola,
naa ɠa é kɛa gè naa ɠɛ ga ɗe.
16 Naa ɠa é ba, niiti ti è ɠoloɠolosu, naati ta ɠoloɠolo,
è maayoseɠe nuiti pɛ ta li duɔlai zu.
Niiti ti è unmazu, ta naati unma,
niiti ti loozu è ma, ta loo naati ma.
17 Mazɔlɔɔ nà ʋaazu ga ɗa-ɠɛdɛyai è ʋɔ,
gè ɗa-ʋalaiti balo,›
Ɠɔoɠɔ GALAGI wooi ɠana,
‹ɗɛi ti è lolisu ga: Kɛlɛba, Siyɔn nii nu la yiizoolɛzu la.› »
18 Ɠɔoɠɔ GALAGI wooi ɠaa:
«Nà Zakɔɓe ná-nuiti seizuʋɛ ɓɛtɛzu ʋolu,
ti-zeizuʋɛti pɛ maawɔin sòga.
Taaiti pɛ ta lo ʋolu ʋɛti ti woloni ná, pɛlɛ ʋagɔiti ta lo ʋolu ti-losuʋɛti.
19 Mama guyei ɠa ɠɛ ti zaama, ta koozunɛ vaiti.
Nà ti ɠaawɔɔlɔ, ta la ɠulaa ti-liegɔi ma.
Nà ti wɔɔlɔ, ɓaa la mɔ ɠulaa ti ma pɛ.
20 Niiti ta ɠɛ ga Zakɔɓe mavofodaiti,
ta ɠɛ eɠɛʋelei ti ɠɛni la mɔungi,
ta-maaɓɔgi ɠa yɛ ɠɛʋele ma gàazu, é la ɲiikpiga,
nà wuzeɠe ti wɔinzeɠe nuiti daalɔɠɔma.
21 Ti taɠila ka a ɠula ti zaama, é ɠɛ ga ta-ɠundiɠii.
Ungo, ta-nui taɠila ka a lo ti luɠɔ.
Nà va bu é maaɓuɠa bà,
mazɔlɔɔ nu ɠili nɔpɛ ge la vaa bu
é ʋa yee zeɠe yɛnvui maazu
ga é ʋa maaɓuɠa bà, ni gè la tolini,»
Ɠɔoɠɔ GALAGI wooi ɠana.
22 «Naazu wa ɠɛ ʋolu ga nà-nuɓusɛiti,
ta nà ɠɛ ga wa-ƓALAGI.»
23 Wɛlɛ fiilɛ wolai ɠa wuzeɠezu, tokoleʋeai Ɠɔoɠɔ GALAGI ʋɛ,
ná-ziiɠulagi lokoleʋe, é ɠɛ ga sabala golai,
é ʋu naati unmaʋɛ, niiti ti faa ɲɔi ɠɛɛzu.
24 Ɠɔoɠɔ GALAGI ná-ziiɠaawanai la ɠalega ma pɛ,
eyɛsu é naa ɠɛ, é daazeeli,
nii kpein é deveai yiimaʋɛ.
Foloi ta, wa naa ɠaaɠa.