1 Ɠɔoɠɔ GALAGI ɓɔɛni Zelemi ʋɔ, Neɓuzaladan masagi makɛ nuiti ta-ɠundiɠii teʋegai ma ga è zeɠe Lama. Zelemi ɠɛni Zeluzalɛme nuiti saama ta Zuda nuiti ti maanɛɛni ga ti li ga tiye Ɓaɓilɔne, gilia ɠɛni de ga yɔlɔɠɔi. Miná ɠa masagi makɛ nuiti ta-ɠundiɠii kulani ná nuiti saama ti ti zoni, ti ɗa li ga tiye. 2 É Zelemi zeɠeni, ti maaɠelesa ge leʋe, é ɠɛ ma: «Ɠɔoɠɔ GALAGI ɗa-ƓALAGI maanɔɠɔ vai woni é ʋilɛ taai tɛi ba, eɠɛ nii ɠɛɠalai. 3 Niizu, é ʋilɛga su, nii é boni é ɠɛa, mazɔlɔɔ wo kotoi ɠɛɛni Ɠɔoɠɔ GALAGI laalɔɠɔma, wo la woiloni goo ma. Nii é boni, naa zeelia wo ma. 4 Niizu wɛlɛ, nà è viesu, gè yɔlɔɠɔiti kula è-yeeiti ba. Ni è wɔinni ga è ʋilɛ pòlu, de li Ɓaɓilɔne, ʋa, nà ɠaaɓa è ma. Kɛlɛ ni è la wɔinni ga naa, mina ʋa. Kwɛɛ ga ɗa zoo è li zooi zu ná pɛ, li ʋɛ ná nɛai è ʋɛ ga è li ná.»

5 Kɛlɛ tɛi Zelemi ɠɛni inɛinɛsu ga gooɠaaʋote fee vai, Neɓuzaladan ɠɛni ma: «Ɗa zoo è li Gedalia ʋɔ bɛ, Ayikame ná-doun zunui, Safan ná-dounloin, nii Ɓaɓilɔne masagi seiɗai Zuda laa wolaiti unda. Li, è yɛ tɔun ba, nuɓusɛiti saama. Ɓaa mu, ʋɛ nɔpɛ ná nɛai è ʋɛ, li miná.» Masagi makɛ nuiti ta-ɠundiɠii daamianigiti feeni Zelemi ya, é faanɛɛ ɠɛ bɛ ziɛ vai zu. Naa ʋolu é yeeɓeni ba, é li. 6 Zelemi liini Ayikame ná-doun zunui Gedalia ʋɔ bɛ Misepa, é yɛ pɔ bɛ nuɓusɛiti saama, niiti ti yɛni zooi zu.

7 Salaʋusu ɠundiɠiiti niiti kpein ti ɠɛni ma yooi zu ta ta-zunuiti ti mɛnigai ma ga Ɓaɓilɔne masagi Ayikame ná-doun zunui Gedalia zeiɗa zooi unda, é bala nuiti kaliva ma, niiti ti la ɠɛni liini ga tiye Ɓaɓilɔne, zunuiti ta anzanuiti, naa ʋɛɛ doungoiti ba, 8 ti liini ti Gedalia ɠa Misepa. Tiya ɠa ti ɠɛni ga Netania ná-doun zunui Isemayɛle, Kaleya ná-doun zunuiti Yoɠanan ta Zonatan, Tanumɛte ná-doun zunui Selaya, Netofa nui Efayi ná-doun zunuiti, Maakate nui Yezania ta ta-zalaʋusuiti pɛ. 9 Gedalia, Ayikame ná-doun zunui, Safan ná-dounloin minazeɠeni ti ʋɛ, ta ta-zalaʋusuiti, é ɠɛ ti ma: «Dualua ge mina wo zo, à yeezei Ɓaɓilɔne nuiti ta-zobogi wu. À zei zooi zu, wo ɠolo Ɓaɓilɔne masagi ʋɛ, naa ɠa wa-undaanɛɛi su. 10 Nɔ̀un nà, nà zeizu Misepa, gè ɠɛ ga wo-ɠaazuʋɛ, gè ɠɛ Ɓaɓilɔne nuiti zeema, ti ʋaazu ade ʋɔ. Kɛlɛ wɔun, à dɔɔiti kpɛtɛ, wo gulu waaiti kula, ta gulɔiti, wo ti makɛ aniɲakaiti su, wo zei taaiti su, maanɛai wo zei ti zu ʋolu.»

11 Zenɔ ɠana, Zuda nuiti kpein niiti ti lɔɔɠuni Moaɓe yooi zu, ta Amɔn nuiti pɔ bɛ, ta Edɔme, ta ná maaɠoolii ma yooiti su, ti mɛnini ga Ɓaɓilɔne masagi nui mɔtaiti zɛni Zuda yooi zu, é Gedalia zei ti unda ga kundiɠii, Ayikame ná-doun zunui, Safan ná-dounloin. 12 Naa ɠa é kɛɛni, Zuda nuiti pɛ ti ʋaani, ti ɠula adaʋɛti pɛ, ʋɛti ti vazani náti. Ti ʋaani ʋolu Zuda yooi zu, ti li Gedalia ʋɔ bɛ Misepa. Ti dɔɔi ɠaalɛɛni ba gola, ta gulu waaiti.

13 Kaleya ná-doun zunui Yoɠanan ta salaʋusu ɠundiɠiiti ti ɠɛni dɛ ɓalaɠaiti su, ti pɛ ti ʋaani Gedalia ʋɔ bɛ Misepa. 14 Ti gaazaɠani ga: «È suɠwɛɛ nɛi ɓaa, ga Amɔn nuiti ta-masagi Ɓaalise Isemayɛle leʋegɛ, Netania ná-doun zunui, ga é è ʋaa?» Kɛlɛ Ayikame ná-doun zunui Gedalia la ɠɛni laani ti la. 15 Kaleya ná-doun zunui Yoɠanan boni ɠite dɔɔɠuzu Gedalia ma Misepa ga: «Va bu, gè li, gè Netania ná-doun zunui Isemayɛle ʋaa. Nu nɔpɛ ge la suɠwɛɛga. Leeni vaa zu a yɛ ná, é è ʋa? Leeni vaa zu Zuda nui kpein gaalɛai ba è ɠoba, ta vaza, Zuda nui mɔtai undaa ɠa ʋili?» 16 Ayikame ná-doun zunui Gedalia ɠɛni Kaleya ná-doun zunui Yoɠanan ma: «Mina naa ɠɛ, mazɔlɔɔ nii è bosu Isemayɛle ná-faa zu, zɛɛi ʋe.»