Zɔɓe
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Sɛʋɛi nii ɠa zunui ta ná-faa zuɠulazu, nii é ɠɛni ga telebo nu, daaseigi ga Zɔɓe. Zunui naa wola ɓɔlɔni, kɛlɛ é la koto ɠɛɛni GALA daalɔɠɔma, é ʋa naa ʋeelala. Nu nɔpɛ ge la Zɔɓe Ná-Sɛʋɛi ɠɛɛ nui ɠwɛɛ, nu la ɓalaa kɛɛ yeeɠɛɠalai ɠwɛɛ, kɛlɛ ɗa ka ga Zɔɓe ná-eteai ziɛni mɛmɛwolaiti ta-ziɛgi zu, ʋelei Abalaame la, tɔɔzei sii ma ɠonagi ɠɛɛni ga kona ungila puunaanigɔ (140). Faaɠwɛ nu wolaiti ti la laani da ga Zɔɓe ɓɔɠɔ ɠa é sɛʋɛi nii ɠɛai. Ti ɠisiɛʋɛ ga nu ɠili ta, nii nu la kwɛɛ, naa ɠa é sɛʋɛai, é ɠisiɛai ga toɠa ga faa ʋagɔ ga é Zɔɓe ná-wɔlɔwɔlɔ vai zuɠula taɠiligaa ma.
Zɔɓe Ná-Sɛʋɛi ɠa ɓɔɛzu é ʋilɛ kpɔlɔi ʋa. Zobogi veeni Setana ya ga é Zɔɓe ɓɔlɔ, tɔɔzei é ɠisiɛni ga naa a la ɠɛ ga zaɓu Zɔɓe looɠo lɛbiyai vee vai ʋa GALA bɛ (1:11). Sɛʋɛi wɔɔlɔzuʋɛ kpein ka Zɔɓe ta bɔɔlaiti ta-yɛpɛi zuɠulazu, é lo ná-kpɔlɔi ma ungi ʋa. Zɔɓe bɔɔlaiti ta-ɠisiɛi ɠɛni kotoi ta ɠa é kɛai, kɛlɛ Zɔɓe mu ge laani da ga toɠa ga sɔbalala nu. Naa ʋoluma, GALA ge ɓɔɛni Zɔɓe ʋɔ, kɛlɛ é la Zɔɓe ná-kpɔlɔi ma ungi lɛɛni la pɛ. Zɔɓe kwɛɛgai ma ga GALA ka zoo fai pɛ kɛɛzu, ʋelei é pɔ la, ta nu vulu ɠila kpalaa ge la zooga GALA kɛɛ vaa ʋapagiti gaaɠaazu, é GALA ná-tuyai zɔlɔɔni ʋolu, é sɔlɔɔ ganii mɔinmɔin ta doun mɔinmɔin sɔlɔɔ.
Unsosuʋɛ
1. Fai niiti Setana ti wuzeɠeni Zɔɓe laalɔɠɔma, ti ɠɛai ga naa ná-kpɔlɔi ma ungi (1:1—2:13).
2. Zɔɓe ta bɔɔlaiti ta-ɓɔɛzuɠulaiti é lo ná-kpɔlɔi ʋa (3:1—37:24).
3. GALA ge ɓɔɛni Zɔɓe ʋɔ, Zɔɓe ma ge gooɠaaʋote (38:1—42:6).
4. Zɔɓe ná-eteai ma zeidai, ta ʋelei GALA ge tuyai looni la bɛ gaaɓelasu (42:7-17).
1
Zɔɓe ná-suɠɔɠɔ mɔungi
1 Zunui ta ɠɛni Use yooi zu, daaseigi ɠɛni ga Zɔɓe. É ɠɛni ga zunui nii peelalazu la ba, é zɔle, é ɠɛni luazu GALA ba, é ɗa maaɠooza faa ɲɔi ɠɛɛ vai ʋa. 2 Zunu loun lɔfela ɠa é sɔlɔɔni ta anzanu loun saʋagɔ. 3 Ná-toganii ɠɛni ga baalagi ta bolii waadɔfela (7.000), ta ɲɔmɛi waasaʋagɔ (3.000), ta wozawoli nikɛ waagila (1.000), naa ʋɛɛ soovale saa undɔɔlugɔ (500) ʋa. Botiɠɛ nui ɠɛni zea ga bɔɔlɔa. Zunui naa ɠa é ɠɛni ga sɔɓelama nu wolai, zooi naati su ti Zuludɛn folo ɠulazu ʋelei.
4 Ná-doun zunuiti ti ɓena ɓɔɠɔ loli, ti ɗa fɛtii ɠula ta-ʋɛlɛiti bu, naa ɓena ɠɛ ga seɠezeɠedai, ti ɠɛni ti-ʋaazeela saʋagɔiti tolisu, ti laami ʋɔɔma, ti ɓɔɔle. 5 Siɛgi zu naama vɛti voloiti gaa a la ɓelana la, Zɔɓe ɠɛni ná-dointi tolisu, ti ʋa, nii a kɛ é zalaɠai ɠula ti ʋɛ, ti ɲade. É ɓena wuzeɠe ga sobuzobui, é gala zalaɠai ɠula ti ɠilagilagi ná-faa zu. Mazɔlɔɔ é ɠɛni ɠɛɛzu ɓɔɠɔ ma: «Tanisu dòinti ti faaɠaazagi ta ɠɛɛʋɛ, ti GALA koto ti-yiimaʋɛ.» Ʋele ɠana nɔ Zɔɓe ɠɛni kɛɛzu la ɠɔ.
6 Yeeta, GALA ná-geezuɠeelaiti ti ʋaani, ti lo Ɠɔoɠɔ GALAGI ɠaazu maaɓɔgi zu. Setana, nii é ga maalɔɔ nui, naa ʋaani tɔ ɓalaa ti zaama. 7 Ɠɔoɠɔ GALAGI ɠɛni Setana ma: «Ɗa zeɠezu mini?» Naa gooɠaaʋoteni, é ɠɛ ma: «Gè ɠɛa eteai zuɓizɛzu, gè ɗa ziɛziɛ.» 8 Ɠɔoɠɔ GALAGI ɠɛni ma: «È nà-botiɠɛ nui Zɔɓe zumɔgɛ nɛi? Nu nɔpɛ ge la ga tɔun kɛʋele eteai zu, zunu ʋe peelalazu la ba, é zɔle, zunu ʋe é luazu GALA ba, é ɗa maaɠooza faa ɲɔi ɠɛɛ vai ʋa.» 9 Setana gooɠaaʋoteni, é ɠɛ ma: «Zɔɓe ɠa luazu GALA ba nɔ lɛin ɓaa? 10 Ɗa ɓaazu maazu, pele ungi pɛ ma, eɠɛ a ɠɛ sasa zu, tɔ-o, ná-pɛlɛyeɠei-yo, zeaɠɔligiti-yo È zeavai pɛ suɓɛtɛʋɛ, ná-toganiiti gaawɔɔlɔa zooi zu. 11 Kɛlɛ yeevɔɔɠu lɛɛ zeaɠɔligiti ba, ta ná-nuiti, ɗa pɛtɛ ni é la è ɠotoni gaamanɔ.» 12 Ɠɔoɠɔ GALAGI ɠɛni la Setana ma: «Kɔli pagɔi kpein ka ɗa-zobogi wu, ta ná-nuiti, kɛlɛ mina yeevɔɔɠu tɔ ɓɔɠɔi ɓusɛi ʋa.» Naazu ɠa Setana zeɠeni Ɠɔoɠɔ GALAGI ʋɔ bɛ.
13 Yeeta, Zɔɓe ná-doun zunuiti ta ná-doun anzanuiti ti ɠɛni daamii wosu, ti ɗa dɔɔi ɓɔle ʋɔɔma, ti-liɛ zunu mɔungi ʋɔ bɛ. 14 Keela ɠila ge ʋaani é Zɔɓe ɠa, é daazeeli ma ga: «Nikɛiti zɛgɛ nɔ wozai wolizu, soovale saaiti ti ɗa laami ti ɠoba, 15 Saɓa nuiti tooʋɛ ti zu, ti li ga tiye. Ti ɗa-wotiɠɛ nuiti kpein paaʋɛ ga boɠa zɔkpɔi. Nà ɠila kpe ka kùlaai, gè ʋa gè naama vai laazeeli è ma.»
16 É yɛni nɔ ɓɔɛzu, keelai taɠili ge ʋaani, é ɠɛ ma: «Geeɓadɛi looʋɛ ɗa-ʋaala kpulugiti su, ta ɗa-wotiɠɛ nuiti. É ti pɛ galaʋɛ. Nà ɠila kpe ka kùlaai, gè ʋa gè naama vai laazeeli è ma.»
17 É yɛni nɔ ɓɔɛzu, keelai taɠili ge ʋaani, é ɠɛ ma: «Ɓaɓilɔne nuiti ma ɓulugi ɠɛɛʋɛ ga seizu saʋagɔ, ti ʋa, ti loo ɲɔmɛiti su, ti li ga tiye. Ti ɗa-wotiɠɛ nuiti paaʋɛ ga boɠa zɔkpɔi. Nà ɠila kpe ka kùlaai, gè ʋa gè naama vai laazeeli è ma.»
18 É yɛni nɔ ɓɔɛzu, keelai taɠili ge ʋa, é ɠɛ ma: «È-loun zunuiti ta è-loun anzanuiti zɛgɛ nɔ daamii wosu, ti ɗa dɔɔi ɓɔle, ti-liɛ zunu mɔungi ʋɔ bɛ, 19 fiilɛ wola ɠila kpe kulaʋɛ ga teʋebai zu ʋele, é loɠa pɛlɛi ma zeki naanigɔiti ba, é wolo è-lointi ma. Ti pɛ ti zaaʋɛ. Nà ɠila kpe ka kùlaai, gè ʋa gè naama vai laazeeli è ma.»
20 Zɔɓe wuzeɠeni, é ná-seɠe wolai ʋali ga kidaaʋiligi maaʋele ma, é nɔungi ɓuye, é laaʋɛɛ zooi ma, é nɔkɔ. 21 É ɠɛni ma:
«Kàbei ɠa kùlaai la dèe ɠoozu, kàbei ɠa gè ɠalesu ma la.
Ɠɔoɠɔ GALAGI feeni, Ɠɔoɠɔ GALAGI seɠea ʋolu.
Lɛbiyai ɠa Ɠɔoɠɔ GALAGI ʋɛ!»
22 Naama maanɔɠɔiti kpein saama, Zɔɓe la ɠɛni koto ɠɛɛni, é la faa ɲɔu nɔpɛ daani GALA unma.