2 «Ee, ni nà-ziiɓɔlɔi a la zoo ɠɔɠɔsu,

ni a la zoo ɠɛɛzu nà-maanɔɠɔi kpein ge zei ʋɔɔma kiloi ɠa.

3 Ti ɠɛa wuizu, ti leʋe kpoloɗɛi ma ɲaɠaegi ʋa,

naa ɠa é kpɔ̀ɛ wooi lateʋesu.

4 Ungo, GALA Zɛbɛi-Pɛ-Maliɠii bɔ̀a ga ná-mɛɛinti,

ti ma wanai zìi laavega,

GALA ná-maalua vaiti ta ɠɛʋele ɓɛtɛzu kɔɔɠɔ vai zu dàalɔɠɔma.

5 Dɔɓɔ zoovalegi ɠa ɗa zikɔ nɛi ɓaa, siɛgi zu é tufa wundu lɛnugi miizu la?

Nikɛi ɠa ɗa zikɔ nɛi ɓaa, siɛgi zu é ná-tufai ɠakalaʋɛ la?

6 Nu ɠa zoo nɛi anii miizu, é la nɛɛni kpolo la ba?

Nɛɛzu ɠa nɛi tɛɛ ɠain ma ɗɛ ɠolegi ʋa ɓaa?

7 Nii mɔungi gè ɠɛni ɠɛlɛzu ba, naa ɠa niina é ga dàamianigi.

Ná ɠa é ga dàamianigi, anɛɛ ni wɔin la mà.

8 «Wɔin ɠa mà gola ga gè gooɠaaʋotegi zɔlɔɔ,

GALA ge va bu, é naa ɠɛ bɛ̀, nii kìtogai ba.

9 GALA ge va bu é dɛ̀ɛvɛ,

é yeei maale, é mà vaa ɠaaɓela!

10 Nà kuai wo ga koozunɛɛi nà-kpɔlɔi zu nii kpela ge la ba,

ziilɛi faa ɠaaɓelagi nà la sɔlɔɔ, naa ɠa é ga,

gè mina GALA ɲadegai ná-deveiti yaava.

11 «Leeni ɠa gè ɠitosu ba, zɛbɛ nɔpɛ ge la mɔ bà?

Leeni ɠa gè yɛnvuzu ma mɔnɔ, ʋelela ʋele la mɔ bɛ̀?

12 Nà ga kɔtui ɓaa, gè ʋa zobo sɔlɔɔ fai pɛ ma?

Kpùsɛi ɠa ga kɔlu ɓɔigi ɓaa?

13 Kpɔba la mɔ bɛ̀, ɓaa?

Kpɔbai zɔlɔɔsuʋɛ pɛ maa la ɠoozani bà ɓaa?

14 «Nui nii é taɓai zu, maanɛɛʋɛ bɔɔlaiti ti ta-wooɠɛɠiladai tago ɠula kɛlɛma bɛ,

anɛɛ ni a la looɠo lɛbiya veezu Zɛbɛi-Pɛ-Maliɠii GALA bɛ.

15 Bɔ̀ɔlaiti ti yàava eɠɛ kɔtuɗɛi,

eɠɛ kɔtuɗɛi ta, daazuʋɛ vɔai.

16 Siɛgi zu ziɛ ɓuungi ta kɔɔlɛ vukɔi ti ɠaawuunsu da,

toɠa ɗa yei ga ziɛ ɓɔlɔi.

17 Kɛlɛ die sei ziɛgi zu, ta ɗa vɔ,

foɠoi a ɠulana, ti vɔ su gaamanɔ.

18 Siɛ wo nu ɓulugiti kpɔɔle wɔin ti ma, ta zeɠezu ná-pelei ʋa,

ti ʋu teʋebai zu, ti loo ya.

19 Tema yaaɠoiti ta ziɛi ɠaiziɛzu ga ɠaazuʋɛ,

Saɓa ziɛ wo nu ɓulugiti kigi ɠa ti ʋa.

20 Kɛlɛ ti unfeni, tɔɔzei ti ɠitoni ti ʋa,

ti yɛni unfegi zu, siɛgi zu ti zeelini la ná.

21 Zekana wo la niina nɔ̀un tetema,

wo nà-kidaaʋili fai ɠaa, wo lua.

22 Gè wo valiʋɛ nɛi ɓaa, ga: ‹À faanɛɛ ɠɛ bɛ̀,

wo ta ɠula wo-ɠɔligiti ba nɔ̀un bɛ,

23 nii a kɛ wo kùla sili nui ya,

wo ùnmɔɔ, wo kùla tooma nui ya›?

24 «À kàla dɛɛ, kɛ̀ʋele ɓɛtɛʋɛ ga gè maaɠɛ kpɔ,

à bo dɛɛ mà, ɓɛgele ɠa kàkagai su?

25 Kpɔɛ gaamai la ɗa ga nu nɔpɛ maawana.

Kɛlɛ leeni ɠa wa-yelilomaiti ti dɛɛzu?

26 Wo wɔinʋɛ ga wo zelii lo kpɔɛzuɠula ɲakaiti ma,

wooiti kitotala nui ti ʋiligai fiilɛi zu?

27 Wa zoo wo kpakutoomai ɠɛ ga podoin,

wa yɛ kɛɛzu, eyɛsu wo wo-wɔɔla ɓɔɔɓɔgi ʋɔdi.

28 Kɛlɛ, anɛɛ naa ʋe, à so dɛɛ ma, wo wɛlɛ gàazu.

À bo dɛɛ mà, ni zɛɛ ɠa gè bosu.

29 À wɛlɛ lɛɛ bà: Yaava vaa la ade yɔɠɔzu!

À wɛlɛ lɛɛ bà ʋolu: Nà-sɔbalalai ɠulaʋɛ kɛlɛma niima vai tɛi su.

30 Telebotala vaa ɠa nɛi nɛ̀gi ma?

Wa kaazu ga gè la maanɔɠɔi ma ɠaawanai ɠaaɠaazu ɓaa?»