GALA Daawoo Zɛʋɛi Zɔɓe 10

1 «Zɛnvui wɔinzeɠea mà,

gè la mɔ kpàla gooiti dɔɔɠuzu,

ziiɓɔlɔi é zìimaʋɛ laavegai,

nà naa ɠulazu kɛlɛma.

2 Gè ɠɛ GALA ma: ‹Mina pèelala,

dɛɛ lɛɛ ga ze, leeni vaa zu, è sàkpesu!›

3 È yiima vai ɠa ga è kpɔ̀lɔ,

è ɗa-ɓɛtɛanii ʋɛlɛʋili, nii è-yeei kpɛtɛai?

Faa ʋagɔ ɠana nɛi ɓaa, è nu ɲɔiti ta-vaazeikpasuiti maalobo?

4 Kpusɛi ma ɠaazuɠɛzɛiti nɔ ɠa ti è ʋa ɓaa?

Ɗa-wozaɠaai ɠa ga nuɓusɛiti ta-wozaɠaai ɠɛʋele nɔ ɓaa?

5 È-zii ma voloiti su ɠa ɓuɠazu ga nuɓusɛiti tɔnɔi ɠɛʋele ɓaa,

ɗa-ɠonagiti ti ɠɛ ga nui nɔnɔiti kɛʋele,

6 ga è ʋa nà-faaɠaazagiti gaiziɛ ʋolu,

ga è nà-kotoiti kula kɛlɛma?

7 Anɛɛ naa ʋe, è kwɛni ga gè la ga sɔba nu.

Nu nɔpɛ ge la ná, nii a kùla è ya.

8 «Ɗa ɠa è kpɛ̀tɛni, è-yeeiti ti kpùun ʋɔɔma ɲɛgɛlɛin,

tama, ɗa ɠa è kòloɠolosu niina!

9 Nà è maanɛɛnɛzu, ɠizɛ su ga è kpɛ̀tɛni eɠɛ penɛi ɠɛʋele.

Ɗa pɔ niizu è gàaɠale ma fufiligi zu?

10 È kpɛ̀tɛni dèe ɠoozu,

eɠɛʋelei nu nɔnɔi ɠaaɲiizu la pɔlɔ liɠii zu.

11 È màaɠiliʋɛ ga kɔlɔgi ta ma zuai,

è fɛ̀lɛʋɛ ga kàeiti ta ɲàtaiti.

12 Ɗa ɠa è zɛnvui vea bɛ̀, è ɗa-wooɠɛɠiladai ɠula kɛlɛma,

è ɓaa vai màazu, naa ɠa é nà-fiilɛi makɛga.

13 «Kɛlɛ wɛlɛ nii è makɛni è-yiimaʋɛ,

gè naa ɠwɛɛga niizu, nii è ɠɛni ɠigaiziɛzu.

14 Ni nà koto ɠɛɛna, ɗa pɛtɛsu,

è la sòsu ga sɔbalala nu nà-faaɠaazagiti faa zu.

15 Ni nà ga sɔba nu, maanɔɠɔ ɠa tùɠɔ!

Ni peelalazu la bà, anɛɛ naa ʋe, gè la zooga gè ʋa nɔ̀ungi wuzeɠe,

nɛ̀igi unfegi ta nimizai kula ɠɛai ga ze.

16 Kɛlɛ nà nɔ̀ungi wuzeɠena nɔ feya, ɗa ɠa è kpɛ̀ɛzu eɠɛ zalai,

ɗa dòɠazu mɔnɔ ga ɗa-laavɔɔ vaiti.

17 Ɗa sòpele niinɛi ɠaiziɛzu nɔ kenein,

ta nɔ ɠa é ɓɔsu ɗa-yiiɠaawanai ʋa dàalɔɠɔma.

Kɔɔʋɛbɛi ɗa ɓɔɠɔ maavalibo sò fai ma.

18 «Leeni vaa zu è kùlani dèe ɠoozu?

Nà la za ná, nu ɠaazu nɔpɛ ge la ɓena la mà.

19 Nà la ɠula nɔ dèe ɠoozu, gè sakpa nɔ kabayeɠei zu,

nà la ɠɛ eɠɛ naati, niiti ti la etea ɠaani.

20 Sìi ma voloiti maa la ʋɛlɛni niina ɓaa?

È ɓe bà deɠɛmu!

È zeɠe kòba, gè ɓɔɠɔ lago iɲɔdɔ,

21 aisa gè ʋa li, gè la mɔ ɠalesu ma ʋolu,

kpidi yooi zu, kpidi ɓɔii zu,

22 zooi ná zu, ʋɛ geelaalaosuʋɛ ná ga kpidii,

ʋɛ kpidi ɓɔii zeini ná faazupui pɛ unda,

ʋɛ wozakalagi ɠɛai ná eɠɛ kuai.»