2 «Kɛɛʋɛ eɠɛ wo ɠɛa ga nuɓusɛi ná-faaɠwɛgi,

kɛni wa ɠimalai wo za ʋɔɔma.

3 Anɛɛ naa ʋe, kèleɠelegɛ ga wo ɠɛʋele,

gè la kula bu wo ʋɛ ga tago ɓalaa.

É ɓudɛ naa maazu, ɓɛ ɠa é la naa ɠwɛɛ, nii wo bogai?

4 Gè ɠɛa bɔ̀ɔlaiti bɛ ga ɲɛɛɠulasu anii,

nɛ̀i gè wooɠulazu GALA ma, ga é gòoɠaaʋote,

telebo nui, zunui é ga lada nui, naa ɠa é ga ɲɛɛɠulasui ma ungi.

5 «Niiti ti ta-eteai ziɛzu gaanɛ zu,

naati kisu vai ɠa ga maanɔɠɔi ta bɛlɛɠulabai ɠa é naati tuɠɔ,

niiti ti-ɠɔɠɔi ɓunɛsu.

6 Kɛlɛ tooma nuiti ta ɠoozunɛɛzu ta-ʋɛlɛiti bu,

zɔiti ti GALA daazuɠɔlizu, naati ta gaanɛ zu,

ti la gala kili kwɛɛ, kɛni ti-zɛbɛi.

7 «Dɔɓɔ zuaiti gaazaɠa dɛɛ, ta è ɠala,

ta wɔniiti, ta ɠi fe è ʋɛ.

8 Yɛpɛ lɛɛ zooi ʋɔ, toɠa è ɠala,

ta kpoloɗɛi wu ɠaleiti, ta faa mɔinmɔin bo è ma.

9 Naama aniiti kpein saama, ma ɓɛgele ɠa é la suɠwɛɛ ga GALA ka é ti ɓɛtɛa?

10 Fuluanii kpein zɛnvui ɠa zoni zeezaamaʋɛ,

ta nu vului kpein zɛnvui.

11 Nu woiyeɠei ɠa ɗa wooiti zɔɠɔzuɠula,

eɠɛʋelei nu laaɠoozuʋɛ a ɗa daamianigi ma nɛɛi yɔɠɔzuɠula la.

12 Ɠimalai ɠa ɗa ɠɛ kɛwola wɔlɔiti zea,

keleɠelegi ɠa sii zuɠoozai zu.

13 Ɠimalai ta zobogi ti lɔɔɠuʋɛ GALA koozu.

Tɔ ɠa po ge ga soofaalai ta keleɠelegi.

14 «Nu la naa loga ʋolu, nii GALA ge golozu.

Zɔi é pilisu kasoi ɠa, nu la naa ʋilɛga.

15 A yeeʋilina ziɛiti su, é ti zo, fɔɔvɔgi ɠa ʋa.

A yeeɓena ti ʋa, é ti ʋilɛ, eteai ɠa ɠoloɠolo.

16 Zɛbɛi ɠa zea, ta ɠimalai.

Ni nui ta a ɓɔɠɔ loona ya, ɓaa é nui ta ɠaka,

toɠa naati kpein sosu ga ná-zobogi.

17 Toɠa ɗa li ga zou lɛnɛbo nuiti duɔlai zu,

é nuɓusɛiti ta-ɠundiɠiiti dɔ ɠimalala vai zu.

18 Toɠa ɗa masagiti ta-zobogi ɠula ti ya,

é ti maaɠili ga duɔla zeɠei.

19 Toɠa ɗa li ga zalaɠa ɠula nuiti duɔlai zu.

Zobobɛ nuiti ti zeiɗai, toɠa ɗa ta-masa kpɔkpɔgi loka.

20 É kpɔɛi ɠula kpɔɛ wo nu wolaiti da.

É kɛwola wɔlɔiti bala faa wuuɓɛɛi ma.

21 Toɠa ɗa bɛlɛɠulabai ʋilɛ seizumaanɛgiti polu.

Toɠa ɗa faaɓaa nu wolaiti ta-ɠɔɔɠɔ zɔɔlai ɠula ti ya.

22 Toɠa ɗa kpidii ɓomaʋɛ vaiti kula kɛlɛma,

é kpidi ɓɔii la foloi ɠa.

23 Toɠa ɗa ziiti gaawɔɔlɔ, naa ʋolu é ti undaaʋili.

Toɠa ɗa ta-masadai zuɓaɠo, naa ʋolu é ti zo, é li ga tiye ɠoozama.

24 Toɠa ɗa ɠigi ɠula nuɓusɛiti ta-ɠundiɠiiti zea,

é ti ʋilɛ ɠɔɠɔma teʋebai zu, ʋɛ pele la ná.

25 Ta ɗa yeeʋɛɛ mɛmɛ kpidii zu, wozakala ge la ná,

é ti ʋilɛ ɠɔɠɔma eɠɛ nui niiti dɔɔzogai.»