2 «À woilo, à woilo gòoi ma.

Naa ɠa a ɠɛ ga gàanɛɛnɛai.

3 À yeezei lɛɛ bu, wo va bu ga gè ɓɔɛ,

siɛgi zu gè ɓɔɛzu la, wa ɲɛɛi wo niina.

4 «Nu ɠa gè ɓainsu ga tɔɠɔi ɓaa?

Ɓa! Leeni vaa zu deɠɛmu gè la ɓena zoo maaɓɔungi wosu?

5 À ɠaaʋote dɛɛ mà, wo laavɔ,

wo yeelɔ la.

6 Siɛgi zu nà ɓɔɠɔi gè ɠisiɛzu la naa kpein su, nii é zeelizu mà,

toɠa gàaluazu, sàsu ɗa ɓali.

7 «Leeni vaa zu faa ɲɔu ɠɛ nuiti ti eteai ziɛzu,

ti wɔlɔzaɠasu, ti zɛbɛi zɔlɔɔ ʋolu?

8 Ti-mavofodai ɠa ɗa zei ʋele ɓɛtɛ ti ɠoba, ti ɠaazu,

ti-lounlointi pɛ ti ɗa li luɠɔma ti ɠaazu.

9 Ziilɛigi ɠa é ta-ʋɛlɛi wu, dua vaa la ná,

GALA ná-kpakɔi la ʋaazu, é ʋa zeeli ti ma.

10 Ta-nikɛ zinɛiti ta ga kpuɠu geleiti,

ta-nikɛ zaaiti ta yiʋoi ʋuuzu, ti-ɠo ge la ɠoloɠologa pɛ.

11 Ta ɓesu ti-loungoiti ba, ti ɗa ɓizɛ eɠɛ togani ɓulu,

ti-lounlointi ti ɗa kuai wo.

12 Tamadegi ta kɔnigi, ta ɗa zei ta-wuyeiti bu,

ti ɠoozunɛ koole wooiti ma.

13 Ti ta-eteai kpein siɛ ʋoluma undaanɛɛi zu,

ta yeizu ga ziilɛigi gɔvɛalaazu.

14 «Kɛlɛ ti ɠɛni ɠɛɛzu GALA ma:

‹Zeɠe gi ʋolu, wɔin la gi ma lago pa,

ga gi naama eteai ɠwɛɛ, nii è pɔ ga gi siɛ.

15 Ɓɛ ɠa é ga Zɛbɛi-Pɛ-Maliɠii, ga gi dɛbi?

Nu a ɠɛna falia, leeni ɠa nu a sɔlɔɔ naa zu?›

16 Niima nuiti ta-undaanɛɛi la tiya ɓɔɠɔ ti yeezu?

Naama ɠisiɛi maaɠooza bà, gè ʋa ʋilɛ ta-lɛnɛ gooi ʋolu!

17 Anɠɛ nɛi nu ɠa ɗa ta-eteai ma wozakalagi ɠa, é ɗa za gaamago nɔ,

ɓaa faa zuɠoloɠologi ɗa zei ti ma?

GALA ka ɗa ná-ziiɠaawanai yei nɛi ti ma?

18 Anɠɛ nɛi, yeeɠɛɠala mɔinmɔin su,

ti ɠɛɛʋɛ eɠɛ muiin vɔɔi nii fiilɛi liizu la,

ti ɠɛ eɠɛ tufa vɔɔi nii tɔngɔlɔ fiilɛi buzeɠezu?

19 «GALA ka kpɔlɔi makɛsu faa ɲɔu ɠɛ nui ná-dointi bɛ,

nii tɔ ɓɔɠɔi maanɛɛni ga é sɔlɔɔ ɓaa?

Maa la nɛɛni é ʋa naa la faa ɲɔu ɠɛ nui ɓɔɠɔi ma ɓaa,

nii a kɛ é ɠigi zɔlɔɔ?

20 Kɛni faa ɲɔu ɠɛ nui ɠaazuʋɛ tɔ ɓɔɠɔi ná-maanɔɠɔi ɠa,

tɔ ɓɔɠɔi ɠa maanɛai ga é GALA Zɛbɛi-Pɛ-Maliɠii ná-ziiɠaawanai ɠɔɠɔ.

21 Siɛgi zu ti-zii ma voloi a ɓena la,

nii é ʋaazu ɠɛɛzu ga ti-lointi ti ʋoluʋelei, ta-vaa la mɔ naa zu.

22 GALA ka nu a kala ga naama vaiti ɓaa,

GALAGI nii é geezuɠeelaiti tukpɔɠaaleʋezu?

23 Nui tanigaa zɛbɛi ɠa yɛsu ti ʋa, ti za ziilɛigi zu,

ti yɛ gaanɛɛi zu, ziizoolɛ la ti ma.

24 Ma nuiti ti-ɠɔlɔgi ti ma ga pagɔ,

ta-ɠaaɓaai pɛ ge ti zu.

25 Taɠili ɓalaa ka za, ziizoolɛi ziimaʋɛ,

é la undaanɛɛi ɠɔɠɔni.

26 Ti ɠilagilagi pɛ ti laani fufiligi zu,

koegi ma ɓulugi ɠa ʋɛɛzu ti ma mɛɛ.

27 «Ungo, gè wa-ɠisiɛiti kwɛɛ,

naa ʋɛɛ kigaiziɛi ʋa wo bosu é lo bà, wo pèelalazu la.

28 Wa gaazaɠasu ga: ‹Nu ʋaa nui ná-pɛlɛi ɠa mini?

Faa ɲɔu ɠɛ nuiti ta-zeɠe ɠotai ɠa mini, ti ɠɛa bu?›

29 «Wo la dɛ teʋe nuiti gaazaɠani ɓaa?

Wa ɠɛlɛzu naama vaiti ba, niiti ti ga ma zeeleiti?

30 Siɛgi zu maanɔɠɔi ʋaazu la, toɠa ɗa ʋoola faa ɲɔu ɠɛ nui ʋa,

GALA ná-ziiɠaawanai la vɔɔɠua ba.

31 Ɓɛ ɠa a zelilo ma, é ʋilɛ ná-siɛ ʋelei ʋa?

Ɓɛ ɠa a sala, faa ɲɔi naa vaa zu nii é kɛɛni?

32 Ti liini la kabamaʋɛ,

ti ɗa wɛlɛ ná-kabai ma.

33 Ɛsɛ pɛ ge ʋilɛni ma ʋoomai ʋolu,

bɛbɛi nii gaa la luga, naa ɗa ziɛ kakalaʋɛ.

Nɛmɛi zu ʋɔlɔi la wuini kpusɛi ma.

34 Leeni vaa zu wo gaanɛɛnɛ wafuungiti bosu ga ze?

Mazɔlɔɔ, gaamazu nii é ɠulazu wa-wooɠaaʋotegiti su, naa ɠa nɔ ga zɛɛ vai.»