GALA Daawoo Zɛʋɛi Zɔɓe 23

Zɔɓe Elifaze wooɠaaʋote fai

1 Zɔɓe gooɠaaʋoteni, é ɠɛ ma:

2 «Za mɔnɔ nà-kpaazaɠa wooi ɠa ziiɠaawanai wuzeɠezu,

nà ɠaaɓaazu gè nà-kpee wooi zuzo.

3 Ni nà la zoo gè kwɛɛ, ʋɛ nà GALA ka ná,

nà la li, gè zeeli seizuʋɛ.

4 Nà la nà-gaamai lɛɛ la,

gè dàaʋɛ laave ga goozuɠulagi.

5 Nà la ná-goozuɠulagiti kwɛɛ,

nà la kwɛɛ naazu nii é wɔinni é bo mà.

6 Toɠa kpɔɛi ʋɛɛ bà, ga suvikɛi kpein ɓaa?

Ɓa, naa la ɠɛa! Kɛlɛ tɔun ka dama ga ze.

7 Toɠa kwɛɛ ga zunu ʋe sɔlegai é woozuɠulasu tɔun bɛ,

naazu, nà-tukpɔɠaaleʋe nui ɠa dɛɛ ga nà ga sɔbalala nu eyɛsu ɠɔ.

8 Kɛlɛ nà liina folo ɠulazu ʋelei, é la miná.

Ni nà liina folo liizu ʋelei, gè la kaazu ná.

9 Ni nà gaiziɛna lɛkpɛmaʋɛ nu ɠɔʋɛzuʋɛ, gè la zooga pɛtɛsu.

Toɠa lɔɔɠuzu lɛkpɛmaʋɛ nu yeezazuʋɛ ɓaa? Gè la dɛ zooʋini ma pɛ!

10 Anɛɛ naa ʋe, pelei nii gè ziɛzu la, é naa ɠwɛɛ.

Siɛgi zu é dɔ̀ɔzu la ʋoluɠulai zu, nà ɠula su ga ɲàdegai eɠɛ zanugi.

11 Mazɔlɔɔ gè ziɛni siɛnɔpɛ su ga kɔɠɔ ʋogi.

Gè ziɛni ga ná-pelei nɔ, gè la zeɠeni ba pɛ.

12 Gè la ɠɛlɛni ɠolozu ná-deveiti bɛ.

Gè zìima vaiti zɛni ná, gè ɠolo daawooi ʋɛ.

13 Kɛlɛ tɔun, siɛgi zu a devena la, ɓɛ ɠa a seɠe ma?

Nii kpein wɔinɗai la, toɠa ɗa naa ɠɛ.

14 Ungo, devei é boga é ʋilɛ nɔ̀un ba, toɠa naa laazeeli,

ta taɠiligaani ti kisu.

15 Naa ɠa é ba, dàavegɛ ga dualuagi tɔun gaazu.

Nà ɠɛna ɠigaiziɛ su, nà ɗa nɔ wola lua.

16 GALA ge ìɲɔteʋea,

Zɛbɛi-Pɛ-Maliɠii dàavegɛ ga dualuagi.

17 Mazɔlɔɔ kuai laade, é ʋa dɔ̀ maaɠɛkpɔgi zu,

ɓaa kpidii nii pɛai ma.»