2 «Ee, è zoogɛ nɛi ɓɔsu naama nui ʋa, nii zɛbɛ la zea,

ɗa ɓɔ naa ʋa nɛi, nii zeezu ɓɔlɔai!

3 È zoogɛ naama nui lɛnɛsu ɓaa, nii balagai ɠimalai ma,

ɗa ɠimalai ɠulanuma mɔinmɔingi lɛɛzu!

4 Kɛlɛ ɓɛ ɠa ɗa-ɓɔɛiti ti wosu ma?

È ɓɔɛ wooi naati sɔlɔɔgɛ ɓɛ ya?

5 Gɔvɛiti kpein ta ɓalizu,

kpoloɗɛiti bu munu ta fuluaniiti ti ʋuuni ná,

6 mazɔlɔɔ gɔvɛalaazu ɠalagɛ GALA gaazu,

kwɛpele seɠe zuɠooza ge la zooga zɛlɛsu ma undaaʋili zeɠezaɠai ɠaazu luɠɔ, é ʋa maalɔɔɠu.

7 GALA ge lɛkpɛmaʋɛ nu ɠɔʋɛzuʋɛ ma ɠeeɠɔlɔgi zuviegɛ ada zu ɲakai maazu.

É eteai zɛlɛgɛ ada ɲakai maazu.

8 É ziɛiti gaalɛɛʋɛ ba tonaɓiin gaaɠiligiti su,

tonaɓiingi la ɗa ga ɓotaga ti-wuɲɛgi wu.

9 Toɠa ná-masa kpɔkpɔgi ɠaazu maalɔɔɠuzu,

é ná-tonaɓiingi ʋɛɛ gaazu.

10 É kwɛpelemaʋɛ laaʋɛ ziɛi ɠa,

wozakalagi ta kuai ti yɔɠɔzu.

11 GALA ga zelii lona,

geeɠɔlɔgi ma lɔkpalaiti ta ɗa ɓali, ti laavɔ.

12 GALA ná-zɛbɛi vɔniga kpoloɗɛi ma,

ta ná-keleɠelegi maaʋele ma,

é vɔniga ziɛ wu zua ɲɔi Laɠaɓe ma.

13 Sokpa zu viilɛi ɠa geeɠɔlɔgi ɠaaɓalesu,

zeei kaalii ɓota, nii é ʋelazu.

14 Anɛɛ naa ʋe, ma go nɔ ɠana ná-botiiti saama, é ti ɠɛɛzu,

ti-lugi ta go nɔ ade mɛnisu.

Ɓɛ ɠa a zoo é ná-faa wolaiti tugi ɠaaɠa?»