40
Zɔɓe ná-gooɠaaʋote mɔungi vee vai GALA zea
1 Ɠɔoɠɔ GALAGI Zɔɓe ɠaazaɠani, é ɠɛ ma:
2 «Ɗa ʋe, GALA Zɛbɛi-Pɛ-Maliɠii maaɠaali nui, ɗa zoo nɛi è va ma?
Zɔi é GALA maaɠaalizu, gooɠaaʋote ka zea, ɓaa?»
3 Zɔɓe Ɠɔoɠɔ GALAGI wooɠaaʋoteni, é ɠɛ ma:
4 «Wɛlɛ, gè la ga ani nɔpɛ, leeni ɠa nà è wooɠaaʋote da?
Gè yeeʋɛa la deɠɛmu.
5 Gè ɓɔɛa, ná ɠɛ ɠila, gè la mɔ gooɠaaʋote bosu ʋolu.
Ná ɠɛa fele, gè la mɔ ta laazu ma.»
GALA ná-kpɔɛzuɠulai velesiɛi
6 Názu, Ɠɔoɠɔ GALAGI yɛni fiilɛ wolai zu, é Zɔɓe wooɠaaʋote, é ɠɛ ma:
7 «Ɗa-zaamaɠiligi ɠili eɠɛ ziilo nui,
nà ʋaazu è ɠaazaɠasu, ɗa kàlasu.
8 È wɔinʋɛ gaamazu, è dɛɛ ga gè la leleboni?
Ɗa pèelalazu nii a kɛ è ɓɔɠɔ maalobo?
9 È yeezuɓaaʋɛ ga GALA kɛʋele?
È-wooi ɠa zoo nɛi é zizi eɠɛ ga tona kpunɛ tugi ɠɛʋele, ga nɔ̀nɔi ɠɛʋele?
10 Li, è ɓɔɠɔ ɓɛtɛ ga unfemai ta bɔɔlɔi,
è ɓɔɠɔ maaɠili, è ɗa volo, è maayiki!
11 Ɗa-yiiɠaawana wolai ɠula ɠɔbu ga nuɓusɛiti,
wɛlɛ nɔ ná ɠɛ ɠila kpe, è waso nuiti gaayei.
12 Waso nuiti kpein pɛtɛ, è ti ʋɛɛ ɠɔɠɔwu.
Faa ɲɔu ɠɛ nuiti dɛɛvɛ gaamago nɔ.
13 Ti lɔɔɠu ʋɔɔma fufiligi wu.
Daaɠulu ti pɛ ma, saai ma ɠasoi ɠa.
14 Názu, nà ɓɔɠɔi nà è maamusɛ,
mazɔlɔɔ è-yeei ɠa a ɠɛ ga ɗa-zobo sɔlɔɔ fai.
15 «Wɛlɛ maalegi ʋa, nà ɠa gè ga kpɛtɛ nui,
eɠɛʋelei gè ga è ɓɛtɛ nui la.
Toɠa ga tufa mii zuai nɔ, eɠɛʋelei nikɛi la.
16 Wɛlɛ ba! Ná-zɛbɛi ɠa saamaʋɛ,
ná-suɓaai ɠɛ koozuʋɛ ma ɲataiti zea.
17 Toɠa wɔɔngi maalesu, é kpa kpe, eɠɛ gului daa ga sɛdelegi.
Kɔɠɔʋolu ɲataiti fɛlɛʋɛ, ti lɔ kpalai zu.
18 Kaeiti kpaaʋɛ eɠɛ kɔlu ɓɔi kalii maaɓiligi,
kaka ɠaeiti kulaʋɛ ga kɔlu ɓiligiti.
19 Toɠa ga GALA ná-kpɛtɛanii ma ɓii golai,
zɔi é kpɛtɛa, naa ɠila kpe ka zobogi bɛ ga é vɔni ma.
20 Gizeiti ka ta ɗa ná-daamiani tufai ve,
ʋɛ dɔɓɔ zuaiti kpein ti ɠaɠosu ná.
21 Ná-dooɠo bosuʋɛ ɠa ga dɔɓɔ goi ma niinigiti bu,
toɠa ɗa lɔɔɠu kpoigi laaʋɛ ma lufaiti su.
22 Maa ɠa ɗa lɔɔɠu ga dɔɓɔ goi ma niinigi,
kɔtuɗɛi ma wulu wolaiti ti laa ga pepiliye, naati ta ɗa maaɠaku.
23 Ni ziɛi a vena, é la ɲiikpiga.
Ni Zuludɛn a ʋuuna daaʋɛ, maaɠɛgɛ kpɔ, ziilɛi.
24 Nu ɠa zoo é so ɓaa, siɛgi zu é ɠaazuzeɠeai ma la?
Nu ɠa zoo nɛi, é so ga balii ɓaa, é dakulugi ɓota?
25 «Ɗa li nɛi, è sua maayikiai ɠula ga kalagi ɓaa?
Ɗa zoo è nɛgi ɠili ga galui?
26 Ɗa zoo è sokpayeɠei ɓota ga tɛmui,
è kpalɔɠaei ɓota ga kalagi?
27 Toɠa è maanɛɛnɛ ga gola ɓaa?
Toɠa woo ʋagɔa wo è ma nɛi ɓaa?
28 Toɠa minazeɠe bo è ʋɛ ɓaa?
Ɗa so, é yɛ è ya ga duɔi eyɛsu ɠɔ ɓaa?
29 Ɗa ɠaɠo da nɛi, eɠɛ wɔni goi?
Ɗa gili nɛi ɓaa, ga è-loun anzanu goiti ti ɗa ɠaɠo da?
30 Wa ɓɔna su, wa pɔdi nɛi ɓaa?
Pɔdi loo nuiti ta zoo ti gaaɠwɛ ʋa ɓaa?
31 Ɗa zoo è ma ɠɔlɔi ɓota ga doɠai ɓaa,
ɓaa nɔungi ga kale ɠula ɠalagi?
32 Yeeʋɛɛ lɛɛ ba, è la yeema naama ɲɛpii ma,
è la mɔ ta ɠɛa, eyɛsu pɛ!»