GALA Daawoo Zɛʋɛi Zonase 2

Zonase ná-GALA maanɛɛnɛi
é boni kalei ɠoozuʋɛ

1 Ɠɔoɠɔ GALAGI kale wolai gila teʋeni, é ʋa, é Zonase ɓɔle. Zonase kɛɛni kalei ɠoozu ga folo saʋagɔ, kpidi saʋagɔ. 2 Zonase yɛni kalei ɠoozu, é Ɠɔoɠɔ GALAGI maanɛɛnɛ, ná-GALAGI. 3 É ɠɛ ma:

«Nà-kidaaʋiligi zu, gè wooɠulani Ɠɔoɠɔ GALAGI ma,

tama é gòoɠaaʋoteni.

Zɛ̀gɛ gɔvɛalaazu, gè è loli ga è ɓɔ bà,

ɗa ma, è gòomɛnini.

4 È pìlini ya kpoloɗɛi ma ʋalii zu,

ziɛ veinfeingi màaveleveleni,

ziɛ vegiti ta ziɛ lakpatakpagiti ti ɗa leʋe mà.

5 Gè ɠɛni ɓɔɠɔ ma: ‹Wɛlɛ bà, màaɠoozaai na è ʋa,

kɛlɛ nà ʋaazu ɠaazulaazu ʋolu è zei ʋɛlɛ ɲadegai ma.›

6 Ziɛi lɛɛni mà, é zeeli kɔ̀daʋɛ,

palii màaɓɔleni,

ziɛ wu lufaiti ti velevele nɔ̀ungi ma.

7 Gè yeini kpoloɗɛi ɓomaʋɛ, ʋɛ gizeiti kpein tɔɔzeiɗai ná,

gɔvɛalaazu ʋɛlɛlaʋɛti ti ʋilisu mà eyɛsu ɠɔ.

Kɛlɛ, ee, Ɠɔoɠɔ GALAGI, è zɛ̀nvui yɛga su,

è kùla gɔvɛalaazu.

8 Siɛgi zu kì ge la mɔ ɠɛni bà la ga zɛ̀nvui ɠa yɛ sù,

kì ge looni Ɠɔoɠɔ GALAGI zu.

Nà-maanɛɛnɛ wooi gè daazeelini è ma,

naa zeelini è zei ʋɛlɛ ɲadegai wu.

9 Niiti ti ɓɔɠɔ veezu kɔɔɠɔ ganigiti zea, naati ta ɠɛlɛzu è-zaalai ʋa.

10 Kɛlɛ nɔ̀un, nà nà-faanɛɛ wuuɠwɛɛgai loo è ʋɛ ga guyei,

gè nà-minazeɠegiti daazeeli.

Ɠɔoɠɔ GALAGI ɠa kizogi zɔlɔɔsu zea!»

11 Ɠɔoɠɔ GALAGI ɓɔɛni kalei ʋɔ, é unpili ga Zonase kakei ma.

Zonase
<
2
>