1 Ee, Maliɠii ná-ziiɠaawanai zu,

é Zeluzalɛme maalɔɔɠua ga tonaɓiingi!

É Izilayɛle ná-lɛbiyai ɠulaa geezuʋɛ,

é pili ya zooi ma!

Siɛgi zu é yiiɠaawanani la Siyɔn laalɔɠɔma,

é yeemani ga ná-kɔɠɔloma anii nɔ ʋe.

2 Maliɠii la maawɔinɠaa ɠɛɛni,

é Zakɔɓe ná-pɛlɛyeɠeiti pɛ kpɔleni.

É yɛni ná-ziiɠaawanai zu,

é Zuda laa wolaiti pɛ koloɠolo, siɠigi ti ma,

é masadai ta ma ɠundiɠiiti puuni ya zooi ma,

é ɓaaɠula ti ma.

3 Ná-ziiɠaawana wolai zu,

é Izilayɛle ná-zobogi pɛ koloɠoloni.

É ɓɔɠɔ zoni, é la ti maaloboni

siɛgi zu ti zili nuiti ti ʋaani la.

É abui ɠaazoga ná-nuɓusɛiti pɔ bɛ,

naa ti-maaɠoolii pɛ galani.

4 É ná-mɛɛin zumɛɛnga eɠɛ nu zili nui,

é zeezai ʋɛɛ ma ga é ʋa pili.

É ɓɔɠɔ lɛ ga gi zili nui ʋe,

é naa kpein paa, nii nu ɠaazu ɠɛa ɠulazu ba.

É ná-ziiɠaawanai ʋua eɠɛ abui

Siyɔn GALA sei ʋɛlɛi ma.

5 Maliɠii gi zoni eɠɛ gi zili nui,

é Izilayɛle ɓɔleni

ta ná-pɛlɛ ʋapagiti pɛ,

é ná-siɠigiti golowolo,

é ziizoolɛi ta kidaaʋiligi lɔ

Zuda nuɓusɛiti su adaʋɛ pɛ.

6 É ná-kpelei ma zasai ɠatani,

ná-gaalɛba wosuʋɛ ná ga sei ʋɛlɛi, é miná ɠoloɠoloni.

Siyɔn, Ɠɔoɠɔ GALAGI zeemai woni

fɛti voloiti ma ta dooɠo foloiti.

Ná-ziimaleʋei ma yiiɠaawanai zu,

é ɓaaɠulani masagiti ma ta zalaɠa ɠula nuiti.

7 Maliɠii la mɔ ná-zalaɠa ɠulazuʋɛ ʋɔ,

é ɠɛlɛa sei ʋɛlɛ ɲadegai ʋa,

é zɛni ná, é loo sili nuiti zeezaama,

Siyɔn ʋɛlɛ ʋapagiti ma ziɠigiti.

Ti-wooi ɠa ɠulazu Ɠɔoɠɔ GALAGI zei ʋɛlɛi wu

eɠɛ fɛti voloi.

8 Ɠɔoɠɔ GALAGI deveni

ga é Siyɔn ziɠigiti golo.

É galui laani ma, gaa ʋa ɠɛ sɔli,

é la inɛinɛni ga golo vai.

É siɠi felegɔi pɛ doɠani,

tama ti felegɔ pɛ ti ɠoloni.

9 Taai laaʋɛ ma ɓogiti ti ʋua ya,

é ma zɔɠɔgiti suɓulukpuluni.

Ná-masagi ta ná-kundiɠiiti ta zii ɠiligiti zeezu,

tɔ ge la mɔ ná.

Anɛɛ ná-GALA goo wo nuiti

ti la mɔ kulakɛlɛma zɔlɔɔsu Ɠɔoɠɔ GALAGI ya.

10 Siyɔn nuɓusɛiti ta-ɠɛwolaiti

ta zeini zooi ma, ti maaɠɛ kpɔ,

ti fufiligi ʋu tɔungi ma,

ti saa wɔlɔ wo seɠeiti too ɠɔba.

Zeluzalɛme anzalopoiti

ti unpilɛga zooi ma.

11 Gàazuɠɛzɛiti ti ɓɔlɔa ga gɔlɔi,

sàsu ɠana ɓali,

kito nɔpɛ ge la mɔ bɛ̀,

é lo maanɔɠɔi ʋa é zeelizu nà-nuɓusɛiti ma,

tɔɔzei ɲiimiɓɔlegiti ta doungo ʋɛlɛʋɛlɛgiti ta zaazu ga kpɔɔle wɔin

taazuʋɛ peleiti su.

12 Doungoiti ti ɗa ɠɛ ti-leeni ma:

«Mini ɠa ani ná nu mi ɓaa nu kpɔle?»

Naazu ti ɗa ɠɛ yɔɔɠɛ, eɠɛ nuiti ti maawanaai

taa zaamaʋɛ peleiti su,

ti-yii loozu niina

ti-lee yeelokoiti su.

13 Zeluzalɛme, gè la kwɛɛ nii nà bo è ma,

è ɠɛʋelei la ɠulani ga taɠili nɔpɛ nɔnɔ!

Ɓɛ ná-faa ɠa nà bo è ma, gè è ɠaanɛɛnɛ la,

Siyɔn nuɓusɛiti?

Mazɔlɔɔ ɗa-nimizai zuwɔɔlɔʋɛ eɠɛ kpoloɗɛi,

ɓɛ ɠa deɠɛmu a zoo é è ɠɛdɛ?

14 Ɗa-ƓALA goo wo nuiti ti ɠɛni è ʋɛ

ga zɛɛ wo nuiti nɔ.

Ti la ɠɛni ɗa-vaaɠaaza golai ɠulani kɛlɛma è ʋɛ,

nii a kɛ è mina li duɔlai zu.

Ti ɠɛni kulakɛlɛmaiti kaazu è ʋɛ,

ti ga zɛɛ ɓɔɛiti, ta yaava vaiti nɔ.

15 Zɔiti pɛ ti leʋesu náʋɛ

ta yealoɠazu ma tɔɔzei è ɠoloɠologa,

ti ɗa foei vɛ, ti ɗa tɔungiti ɲiikpi

ga ti ɲɛɛɠula è zu, Zeluzalɛme:

«Taa wolai ɠa nɛi, ti ɠɛni tolisu ga

pagi daazeeliai, eteai pɛ ná-koozunɛɛi?»

16 È zili nuiti pɛ

ta laalaosu è laalɔɠɔma,

ti ɗa foei vɛ, ti ɗa ɲiigaiti siɛ ga,

ti ɗa ɠɛ ma: «Gi kpɔlea!

Zaa voloi ɠa gi ɠɛa maaɓɔunsu,

gi yeezeelia ma, gá ga ka.»

17 Nii Ɠɔoɠɔ GALAGI a bo, naa ɠa a ɗa kɛ,

toɠa ɗa daawooi ʋilɛ su

nii é boni kaite wɔlɔwɔlɔ,

é goloni, maawɔinɠaa la su.

Ɗa-nimiza vai ɠɛa ga è zili nuiti ta-ɠoozunɛɛi,

é è-zakpeɲɔɠɔiti ta-wasogi wɔɔlɔa.

18 Nuɓusɛi ɓain gooi ɠa lɛɛzu Maliɠii ʋɔ pelei.

Siyɔn ziɠigi,

ɓe è-ɠaazuɗɛ ɓoigi ʋa,

é ʋu folo ʋɛɛ kpidi ʋa.

Mina lago pa dooɠo,

maaleʋe mina ɠɛ ɗa-wɔlɔi ʋa.

19 Wuzeɠe, è maanɛɛnɛi wo kpidii,

lɛlɛi ɠilagilagi pɛ tɔɔzeizuʋɛ!

Kula yiimaʋɛ

Maliɠii ɠaazu.

Yeezei bɛ ga maanɛɛnɛi

è-lointi zɛnvui vaa zu,

ti zaazu niina ga pului

koi yɔɠɔzu ʋelei pɛ su.

20 Wɛlɛ, Ɠɔoɠɔ GALAGI, pɛtɛ

niiti è ti zosu ɠana!

Anzanuiti ta zoo nɛi ti ti-lointi mi,

niiti ti ti zogai ɠoozu, ti nɛai ti ʋɛ?

Nu ɠa zoo nɛi é ɗa-zalaɠa ɠula nuiti ta GALA goo wo nuiti paa,

Maliɠii è zei ʋɛlɛ ɲadegai wu?

21 Doungoiti ta nu wɔlɔiti

ta ʋuuni zooi ma taazuʋɛ ná pɛ.

Doun anzanuiti ta doun zunuiti ta laani

boɠa zɔkpɔi laaʋogi ti ʋa.

È ti ʋaani ɗa-yiiɠaawana voloi,

è ti ɠɔdaaleʋeni, maawɔinɠaa la su.

22 È dùaba nuɓusɛiti toliga mà,

eɠɛ fɛti volo.

Ɠɔoɠɔ GALAGI, ɗa-yiiɠaawana voloi,

fulu nu la ɠulani, ɓaa pela gele.

Dointi gè ti nɛɛni ʋɛ gola, gè ti ɠula su,

sìli nui ti pɛ undaaʋiliga.