1 Folo lɔzita leʋegai ma naama vaiti poluma, Yesu Piyɛlɛ ta Zake zeɠeni, é ʋɛɛ naa kɛɛɠɛloin Zan ʋa, é li ga tiye yɛ gize ɠaaɠooza golai ta ma. 2 É valiboni ti ɠaazu. Gaazuʋɛ ɠɛni volozu eɠɛ foloi, kɔba zeɠeiti ti ɗa ɠole pepe, eɠɛ wozakala gola. 3 Gaamago Moize ta Eli ti ɠulani kɛlɛma kaladopoiti bɛ, ti ɗa yɛpɛ Yesu ʋɔ.

4 Piyɛlɛ ɓɔɛni Yesu ʋɔ, é ɠɛ ma: «Màliɠii, soloogɛ ga ade yɛ ʋɛ. Ni ɗa vaana bu, nà kota saʋagɔ lo ʋɛ, gilagi ɠɛ ga ɗɔnɔi, gilagi ɠɛ ga Moize nɔnɔi, zɔi ɠɛ ga Eli nɔnɔi.» 5 É yɛni nɔ ɓɔɛzu ɠana, tonaɓiingi zeɠe geezuʋɛ, é ɗa volo lɛngɛlɛngɛ, é ti maaɓidi. Wooi ta ɠulani naa zu, é ɗa ɠɛ ma: «Nii ɠa é ga nɛ̀ɛbɛ Loun Zunui, nii é gòla yiilaazu. À woilo goo ma ɗɛ!»

6 Kaladopoiti ti naama wooi mɛnigai ma, ti wola luani, ti laaʋɛɛ zooi ma, ti ɠaazulɔɔɠu. 7 Kɛlɛ Yesu maaɓuɠani ti ʋa, é yeevɔɔɠu ti ʋa, é ɠɛ ti ma: «À mina lua, à wuzeɠe.» 8 Kaladopoiti ti ɠaazuwuzeɠeai ma, ti wɛlɛni, ti la nu ɠili nɔpɛ kaani, kɛni Yesu ɠila nɔ.

9 Ti ɠɛai ma gizei yeizu, Yesu ti laa maaɓakpani, é ɠɛ ti ma: «Aisa Nu ná-Doun Zunui ʋa wuzeɠe, é ɠula saai ya, nii wo kaai ʋɛ, à mina naa wo nu nɔpɛ ma.»

10 Kaladopoiti ti niima ɠaazaɠagi woni da, ti ɠɛ ma: «Lee vaa zu mu tɔ kalamɔinti ti ɠɛɛzu ma, kɛni mɔunpa Eli a ʋaana dɛ ʋolu?» 11 É ti wooɠaaʋoteni, é ɠɛ ti ma: «Gaama ʋe, Eli maanɛɛʋɛ ga é ʋa, é fai pɛ sei kpasu ga pagɔ. 12 Kɛlɛ nɔ̀un, nà bosu wo ma ga: Eli mu paaʋɛ niina, kɛlɛ ti la naa ɠwɛɛni, ti naa zo ga ʋelei ti ɠɛni pɔ la. Tama ʋele nɔ ɠana ti ʋaazu Nu ná-Doun Zunui ɓɔlɔzu la.» 13 Kaladopoiti ti gaaɠaani ga Zan Ɓatisete ɠa, é ɠɛni vaazu ma.

14 Ti maaɓuɠaai ma bɛbɛi ʋa, zunui ta ʋaani Yesu ʋɔ bɛ, é ʋilɛ ɲiibiɠa kakala, é maanɛɛnɛ, é ɠɛ ma: 15 «Màliɠii, dòun zunui maawɔinɠa kae, fɔlivɔlii ɠa é ba, toɠa wola zoolɛzu ga ʋe. Yeeɠɛɠalai tanigaa zu, toɠa loo abui ɠa, ɓaa ziɛi wu. 16 Gè ʋaa la ɗa-ɠaladopoiti pɔ, kɛlɛ ti la zooni ti ʋa kɛdɛ.»

17 Yesu ɠɛni ma: «Ee, kidaaleʋelala nuɓusɛiti, ti ga yaava nuiti, nà yɛsu wo ʋa dɛ, eyɛsu yeelɛ? Nà yeezei wo wu, eyɛsu yeelɛ? À ʋa pɔ̀ ga doungoi.» 18 Yesu devei veeni inɛgi ya ga sɛbɛi. Tama inɛgi ɠulani doungoi zu, naa ɠɛdɛ gaamago nɔ.

19 Ti maaɠelesa teʋeai ma, kaladopoiti ti Yesu ɠaazaɠani, ti ɠɛ ma: «Lee vaa zu gi la zooni gi ʋa niima inɛgi ɓɛ?» 20 Yesu ɠɛni ti ma: «Wo la zooni wo ʋa kpɛ, tɔɔzei wa-ɠidaaleʋei lɔiʋɛ. Gè bo wo ma ga gaamai, ni wa-ɠidaaleʋei ɠɛni ga mutaalede kaei ɠɛʋele, wa la zoo ɠɛɛzu gizei nii ma: ‹Zeɠe ʋɛ, è li munu,› a la naa ɠɛ. Faa tanɔpɛ ge la ɓena ɓaa wo ya. 21 [Kɛlɛ nii ɠɛɠala inɛgi la zooga ɠulazu GALA fali ta zu sogai ʋolu.»]*17:21 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu.

22 Yeeta Yesu ta ná-kaladopoiti ti ɠɛni leʋesu Galilé yooi zu, é ɠɛni naati ma: «Nu ná-Doun Zunui ɠa ʋaazu lɔɔzu nuiti zeezu, 23 ti paa. Kɛlɛ foloi zaʋasiɛi, toɠa wuzeɠe, é ɠula saai ya.» Naama wooi ná-kaladopoiti ziiɓɔlɔni ga gola.

24 Ti lɛai ma Kapɛɛlɛnawume, zɔiti ti ɠɛni mului zosu GALA sei ʋɛlɛi ma vaa ma, naati ti maaɓuɠani Piyɛlɛ ʋa, ti ɠɛ ma: «Wa-ɠalamɔin la GALA sei ʋɛlɛi wu mului ta ɠulazu ɓaa?» 25 Piyɛlɛ ɠɛ ti ma: «Ɓa-o, toɠa ɗa kula.» Siɛgi zu é lɛɛni la pɛlɛi wu, Yesu mɔunpa ge kpɔɛi zeɠeni, é ɠɛ ma: «Simon, ɗa ɠisiɛzu ɠale? Eteai zu masagiti, ɓɛ ɠa ta ɗa mului ɠula zea? Zou lointi ɓaa wɛɛinti?» 26 Piyɛlɛ ɠɛni ma: «Wɛɛinti.» Yesu ɠɛni ma mɔnɔ: «Naa ɠa é dɛɛzu ga, zou lointi pɔ ge la ta zu. 27 Kɛlɛ anɛɛ naa ʋe, de mina ɠɛ ga niima nuiti kaka saɓu. Tɔ ɠa é ba, yei ziɛ wolai laaʋɛ, è kalagi ʋili ziɛi wu. Kale mɔunpagi è kulazu, daalao, ɗa wali ɠaei ɠaazu su. Seɠe, è fe tiya ga de felegɔ dɔnɔi.»