Naɠuume
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Naɠuume ná-kulakɛlɛmai ɠa é sɛʋɛi nii zu, nii ma ɠeela wooi ɠɛni Asiili yooi laalɔɠɔma. Naɠuume zooi naa zeɠeni nɔ ga ná-taa wolai laaseigi, nii é ɠɛni ga Ninive. Asiili ɠɛni ga zooi, nii é Izilayɛle masadai zoni, nii é lɛkpɛmaʋɛ nu ɠɔʋɛzu ʋelei, é li ga ma nuɓusɛiti duɔlai zu. Ʋelei kaai la ga Naɠuume ɓɔɛʋɛ é ʋilɛ taa wolai Tɛɓe loo vai ʋa bu (3:8), toɠa ɠwɛsu naa ʋɔ ga Naɠuume ná-GALA gooi woni konagi niiti zɔɠɔzuʋɛ: kona undɔzita puulɔzita maazu saʋagɔi (663), aisa Yesu Kilista ʋa zɔlɔɔ, konagi Tɛɓe looni la bu, ta kona undɔzita puugɔ maazu felegɔi (612), aisa Yesu Kilista ʋa zɔlɔɔ, konagi Ninive looni la bu.
Naɠuume ná-keela wooi ɠɛni ga GALA ka sɔba nuiti doɠa. Anɛɛ ni GALA maanɛkɛgɛ ziiɠaawanai zu, kɛlɛ ná-zobogi zuwɔɔlɔʋɛ (1:3). GALA ge ɠɛni ma Ninive ta Asiili ta ʋaazu loozu bu, ta-nuɓusɛiti ta li duɔlai zu. Naa ɠɛni ga woo niinɛ ʋagɔ wola Zuda nuɓusɛiti bɛ (2:1).
Unsosuʋɛ
1. GALA telebogɛ ta toɠa ɗa potokulai ɠɛ (1:1-8).
2. Tukpɔɠaaleʋei Ninive ta Asiili laalɔɠɔma (1:9—3:19).
1
Tukpɔ vai Ninive laai laalɔɠɔma
1 Keela wooi ɠa ga nii, é wosu Ninive*1:1 Ninive ɠɛni ga Asiili yooi ma masa taa wolai. ma. Naɠuume Ɛlekɔse nui ná-kulakɛlɛma zɛʋɛi.
2 Ɠɔoɠɔ GALAGI ɠa ga GALAGI nii toloai ta potokula nui.
Toɠa nɔnɔi ʋotokulazu, ná-ziiɠaawanai maayikiʋɛ gola,
toɠa ɗa nɔnɔi ʋotokula sakpeɲɔɠɔiti ma,
toɠa ɗa ná-ziiɠaawanai zei yiima sili nuiti daalɔɠɔma.
3 Ɠɔoɠɔ GALAGI yii la ɗa ga ɠula fala,
ná-zobogi zuwɔɔlɔʋɛ,
kɛlɛ é la ɗa ga faa ɲɔu ɠɛ nui zalalalai yɛ ga.
Fiilɛ wolai ɠa ɗa lokoleʋe, siɛgi zu é leʋesu da.
Tonaɓiingiti ka ti ga kɔɠɔa vufiligiti.
4 Toɠa ɗa zelii lo kpoloɗɛi ma, é fɔ su,
toɠa ɗa ziɛ wolaiti pɛ fɔ su.
Ɓasan ta Kaalamɛle lufaiti ti ɓɔikpɔi,
Liɓan lufa ʋuaiti ti ʋoolo.
5 Siɛgi zu é wuzeɠezu la, gizeiti ta ɗa ɓali,
gize goiti ti ɗa ɲiikpi,
eteai zasu ɠa ɗa ɓali gaazu,
eteai é ɓɔ gaa anii pɛ ba.
6 Ɓɛ ɠa a zoo é lo tuɠɔ ná-ziiɠaawanai zu?
Ɓɛ ɠa a yɛ loni tuɠɔ, zii a ɠulana?
Ná-ziiɠulagi ɠa ɗa ɠɛ eɠɛ abui teʋegai,
anɛɛ kɔtu wolaiti ta ɗa vuka tuɠɔ.
7 Ɠɔoɠɔ GALAGI ʋagɛ,
toɠa ga nu lɔɔɠuzu kidaaʋili foloi.
Toɠa ɗa ɓaa naati maazu, zɔiti ti lɔɔɠuzu pɔ bɛ.
8 Toɠa Ninive ɠoloɠolo mɛtu ga ziɛvegi é ʋuuzu ya,
é sili nuiti daaʋili kpidii zu.
Nii ɠa wosu Zuda ma
9 Leeni ɠa wo ɠisiɛzu su Ɠɔoɠɔ GALAGI laalɔɠɔma?
Tɔ ɠa é faa zuɠoloɠologi ɠɛai mɛtu,
kidaaʋiligi ʋaala la ɠɛa fele!
10 Ti ɠɛɛʋɛ eɠɛ kpɔvɔi zu ɠaingiti ti velevelegai ɓɔɠɔ ma,
ti dɔɔi ɓɔlezu eyɛsu é ti zo.
Ta ɠala mɛtu eɠɛ tufa vɔɔi.
Nii ɠa wosu Ninive ma
11 È ʋɔ bɛ ɠa nu zeɠeai ná,
nii é ɠɛni ɠisiɛzu faa ɲɔi zu Ɠɔoɠɔ GALAGI laalɔɠɔma,
é ɗa nu ɲaka ɠisiɛi wo.
Nii ɠa wosu Zuda ma
12 Ɠɔoɠɔ GALAGI wooi ɠaa:
«Anɛɛ ni wo zili nuiti mɔinʋɛ, ti zuɓa,
ta ɲɛɛlɛ, gila kpalaa ge la yɛga ná.
Anɛɛ ni gè wo unfeni,
gè la mɔ naa taɠili kɛa pɛ.
13 Nà wo viesu niina,
gè wo ɠula wo zili nuiti ta-luɔlai zu,
gè wa-yɔlɔɠɔiti galeɠale, ti vie wo ma.»
Nii ɠa wosu Ninive masagi ma
14 Wɛlɛ nii ɠa Ɠɔoɠɔ GALAGI deveai è laalɔɠɔma:
«È la è-mavofoda zɔlɔɔga, è-laaseigi ʋa ʋɛɛ ti ʋa,
nà ɗa-ɠɔɔɠɔ ganigiti ti ga gului ɓaa kɔlu ɠaawuungaiti kula ɗa-ɠalagi ná-pɛlɛi wu,
gè ti ɠoloɠolo.
Nà ɗa-ɠabayeɠei ɓɛtɛ,
mazɔlɔɔ nɔ̀un gaazu, wo la mɔ ga ani nɔpɛ.»
*1:1 1:1 Ninive ɠɛni ga Asiili yooi ma masa taa wolai.