3 Gi gá-ƓALAGI valini naazu. Ti maaʋele ma gi gwɛlɛma nuiti seini kpidii ta foloi, nii a kɛ ta ʋaana siɛnɔpɛ su, gi ɓɔɠɔ maaɠɔkɔ ti laalɔɠɔma. 4 Kɛlɛ Zuda nuiti ti ɠɛni ɠɛɛzu ma: «Botiɠɛ nuiti ti ɓɔlɔa, ʋɛti ti ɠoloai siɠigi ʋa, naama vufiligi wola mɔinʋɛ, ade la zooga pɛ ade ʋa siɠigi niiti to ʋolu!» 5 Gi zili nuiti, naati ti ɗa ɠisiɛ ga gi la faa zuɠwɛɛga, ta gi la loa ga ná, eyɛsu ti ʋa, ti loo gi zu, ti gi ʋaa, ti pele leʋe botii luɠɔ ɠana. 6 Zuifui niiti ti ɠɛni gi zili nuiti maaɠoolizu, naati ti ʋaani ti gi loo ɠisu ga seizu puugɔ ɠɛɠala é lo faaɓaagi ʋa, ti ɠɛni ɠɛɛzu gi ma: «À ɠaaɠale ma, wo ʋa gi ʋɔ bɛ.»

7 Gè nuiti seini pele ɓɔungi zu siɠigi ʋoluʋɛ, ʋɛti náti maakala, gè ti zeini ga pɛlɛyeɠe ʋelei, boɠa zɔkpɔiti ta kpɛɛinti ti zoni ti ya, é ʋɛɛ mɛɛinti ba. 8 Kpègai ma ga adɛti kpein buuɓɛ ga pagɔ, gè ɓɔɛni nu wolaiti ta kundiɠiiti pɔ, naa ʋɛɛ nuɓusɛi mɔtai pɛ ba, gè ɠɛ ti ma: «À mina lua wo zili nuiti ba! À ɠizɛ Maliɠii zu, nii bɔɔlɔai, maayikiai, wo kɔɔi ɠɔ wo-ɠɛɛlointi bɛ, ta wo-loun zunuiti bɛ, ta wo-loun anzanuiti bɛ, naa ʋɛɛ wo-anzaiti, ta wa-ʋɛlɛyeɠeiti ba.»

9 Gi zili nuiti ti mɛnigai ma ga gi suɠwɛɛga, GALA ge ta-vaazeikpasui naa zuɠoloɠoloni, gi pɛ gi ɠaleni ma siɠigi ma, ɛsɛ ge ná-boti lɔɔzei. 10 Kɛlɛ é zo niina naama voloi ma, é li ga gi luɠɔʋelei, nà-botiɠɛ nuiti gilazuʋɛ nɔ ɠa niina é ɠɛni botii ɠɛɛzu, mɔtaiti ti kpɛɛinti, ta kɔɔɠɔ zɛpɛgiti, ta mɛɛinti ti zoni ti ya, ti maaɠiliai ga kɔɔɠɔ ɠɔlu zeɠeiti, kundiɠiiti ti ɗa wɛlɛ Zuda nuɓusɛiti ma. 11 Zɔiti ti ɠɛni botii ɠɛɛzu siɠigi losuʋɛ, kasɔ zeɠe nuiti ta daalɛ wo nuiti ɛsɛ pɛ ge ɠɛni botii ɠɛɛzu ga yee ɠilagi nɔ, kɔɔɠɔ gani gila ge zoni zɔɔma yeeiti ga. 12 Siɠi to nuiti ɛsɛ ná-boɠa zɔkpɔ ɠiliai saama, ti ɗa siɠigi lo. Nu ɠila ge ɠɛni pòlu, kɛʋele ɓɛtɛai puʋugi vɛɛ vai zu. 13 Gè ɓɔɛni nu wolaiti ta kundiɠiiti pɔ, naa ʋɛɛ nuɓusɛi mɔtai pɛ ba, gè ɠɛ ti ma: «Botii maayikiʋɛ ta suwɔɔlɔʋɛ dɛ ade ya, siɠigi lo fai zu, tama ade maaɠoozaʋɛ ɓɔɠɔ ʋa. 14 Ʋɛ nɔpɛ wa ɠɛ ná, wa puʋugi woomɛnina nɔ feya, à ɠaalɛ ba kòba, ada-ƓALAGI ɠa ɓɔ ade ʋa kɔɔi zu.»

15 Ʋele ɠana gi ɠɛni botii ɠɛɛzu la niina, nuɓusɛi ɠilazuʋɛ kpein gi zaama, kpɛɛin zoni naati zea, é tɔɔzei wozaɠa seɠena ma nɔ fuaa, eyɛsu fitiligi ɓe ga pɛɛ. 16 Naama ziɛgi nɔ zu gè ɠɛni nuɓusɛiti kpein ma: «Kɛni ɛsɛ ta ná-botiɠɛ nuiti ti ɲiisui ɠɛ Zeluzalɛme taazuʋɛ, ade makɛ vai zu kpidii laawu, nii a kɛ ade boti ɠɛ ga foloi.» 17 Gi tanɔpɛ, é zo nɔ̀un ma, é li kɛɛlointi pɔ, ta nà-botiɠɛ nuiti, ta nui niiti ti ɠɛni makɛsu, gi la ɠɛni gá zeɠe ɠulazu ɠɔba, gi ʋa maavalibo, ɛsɛ ná-kɔɔɠɔ zɔɔla ɠɛni zea.