Gaalu Sɛʋɛi
Sɛʋɛi lɔɔzeizuʋɛ ma woo mɔungiti
Kona ʋuunaanigɔi (40) niiti Izilayɛle nuɓusɛiti ti kɛɛni siɛi ɠa teʋebai zu, aisa ti ʋa zeeli minazeɠe zooi ma, é ga Kanaan yooi, fai niiti kpein ti ziɛni, naa ɠa Gaalu Sɛʋɛi suɠulazu. Sɛʋɛi laasei pɛɛʋɛ ga Gaalu Sɛʋɛi tɔɔzei, ada felegɔ ɠa su, ti zunuiti tiegɔi lɛɛzu Izilayɛle wolodamai ɠilagilagi pɛ su, niiti ti kɔɔmaʋɛ (1:1-54; 26:1-65). Faaɠwɛ nu wolai tanigaa ti laaʋɛ da ga GALA goo wo nui Moize ɠa é Minazeɠe Pɔlɔmai ma zɛʋɛ lɔɔlugɔ mɔungiti sɛʋɛa, Gaalu Sɛʋɛi ta zɔiti (Zenɛze, Ɛgezɔde, naa ʋɛɛ Levi Nuiti Ta-Zɛʋɛi ʋa, ta Tɔ Sɛʋɛi Velesiɛi). Naa ɠulaʋɛ kɛlɛma sɛʋɛi nii ɓɔɠɔi zu, tɔɔzei Gaalu Sɛʋɛi nii woo lɔɔzeiʋɛ ga é ɠɛ ma GALA ge niima wooiti boni Moize ma (1:1). Toɠa zoo ɠɛɛzu ga gaama ɓalaa ga Moize sɛʋɛi bɔɔlɔzuʋɛ zɛʋɛni, kɛlɛ sɛʋɛ ɠɛ nuiti ti ta ʋɛɛ ba, ná ʋolu ʋelei poun. Naama ʋoogi ɠa ga nii, gola ɓaaʋɛ nu ʋa ɠisiɛ ga Moize a la zoo é tɔ ɓɔɠɔi ná-ɓɔɠɔmaayeii maamusɛ (12:3).
Izilayɛle nuiti ti ɠɛai ma siɛi laawu teʋebai zu, ti kpee mɔinmɔin tooni ga GALA daalɔɠɔ, ti ɗa ɓaka daalɔɠɔma, tama ti naama ɓakɔi zɔlɔɔni ga gooɠaaʋotegi. Naama ʋoogi ta ɠa ga nii, siɛgi zu Izilayɛle nuiti ti luani la, ti kpee loo GALA daalɔɠɔma ga Kanaan nuɓusɛiti sɛbɛi wola wɔɔlɔʋɛ (14:1-4). Naa maaʋele ma, GALA ge ɠɛni ma, naama yeeɠɛɠalai zu ɠɛɠalama ɠila ɲɛgɛlɛin kpakologiti saama, ta zaazu pɛ, Izilayɛle nuiti ti ʋa lɛ minazeɠe zooi zu. Moize ɓɔɠɔi kololalai ɠɛɛni ga GALA, tama zobo ge la mɔ ɠɛni veeni bɛ, é ʋa lɛ minazeɠe zooi zu. Tama anɛɛ ni nuɓusɛi ɠɛni ɓakasu, GALA ge ɠɛni ba nɔ, é ɗa ɓaa ti maazu. Siɛgi zu Izilayɛle zili nuiti ti GALA kwɛɛtala ɠala goo wo nui ta zeɠeni la, nii daa ɠɛni ga Ɓalaame, ga é Izilayɛle nuɓusɛiti foovo, aisa naa mu ge ʋa ɠɛ, GALA ge vaani bu ga tɔun é ɗa tuya wooiti nɔ wo (22:1—24:25).
Unsosuʋɛ
1. Fai tanigaa wogɛ é lo Izilayɛle nuiti gaalu fai ʋa, naa ʋɛɛ ti-ʋuuzuʋɛ ɓɛtɛ vai ʋa, ta zalaɠa ɠula nuiti tosuʋɛ, naa ʋɛɛ vebɛ aniiti ba, niiti bolodai ɠilagilagi maanɛɛni, é ʋa la zalaɠa ɠulazuʋɛ laalao fai zu (1:1—10:10).
2. Izilayɛle ná-siɛi é boni teʋebai zu (10:11—25:19).
3. Gaalugi velesiɛi wo fai, ta devei taɠiligaa ti veeni é lo Izilayɛle nuiti ba. Naa ʋolu adaʋɛ tanigaa laasei bogɛ, ʋɛti Izilayɛle nuiti ti ti-ʋuuzuʋɛti toni ná, ti ɠɛai ma liizu ga minazeɠe zooi ʋɔ pelei, faa wogɛ ɓalaa é lo zooi naa ɠaaɠwɛ ʋelei ʋa bolodamaiti zɔɠɔzu niiti ti ʋaazu lɛɛzu zooi zu (26:1—36:13).
Izilayɛle Nuiti Kɛai Ma
Sinayi Teʋebai Zu
1
(1:1—10:10)
Izilayɛle nuiti gaalu faa mɔungi
Ɠɔoɠɔ GALAGI ɓɔɛni Moize ʋɔ Sinayi teʋebai zu, GALA daaɠomi seɠe ʋɛlɛi wu, alugi velesiɛi ma volo mɔungi ma, ti ɠulaai ma Ezipete yooi ʋa, ma ɠonagi velesiɛi. É ɠɛni ma: «À Izilayɛle nuɓusɛiti kpein gaalu, eɠɛʋelei ta-wolodamaiti ti la, ta ta-ʋɛlɛyeɠeiti, wo zunuiti kpein gaalu, é zo kona ʋuufelegɔ (20) ma, é lɛ zeemaazu, nii dɔin seeliai kɔɔɠɔ vai ma Izilayɛle nuiti saama. Wa Aalɔn, wa ti ɠaalu ga kɔɔʋɛbɛi ɠɛʋelei.
«Zunu ɠilagila ka ɠɛ wo ʋa, é ɠula bolodai ɠilagilagi zu, zunui nii a ɠɛ ga pɛlɛyeɠe ɠundiɠii. Wɛlɛ zunuiti daaseigiti ba, niiti ta ɓɔ wo ʋa:
Luɓɛn ʋɔ bɛ, Elisuul, Sedeyuul ná-doun zunui,
Simiyɔn ʋɔ bɛ, Selumiyɛle, Sulisadayi ná-doun zunui,
Zuda ʋɔ bɛ, Naason, Aminadaɓe ná-doun zunui,
Isakaal ʋɔ bɛ, Netaneyɛle, Suaal ná-doun zunui,
Zaɓulɔn ʋɔ bɛ, Eliyaɓe, Ɠelon ná-doun zunui,
10 Zozɛfe ná-doun zunuiti pɔ bɛ,
Efelayime ʋɔ bɛ, Elisama, Amiyude ná-doun zunui,
Manasé ʋɔ bɛ, Gameliyɛle, Pedasuul ná-doun zunui,
11 Ɓɛnzamɛn ʋɔ bɛ, Aɓidan, Gideyɔni ná-doun zunui,
12 Dan ʋɔ bɛ, Ayiyezɛɛl, Amisadayi ná-doun zunui,
13 Asɛɛl ʋɔ bɛ, Pagiyɛle, Wokelan ná-doun zunui,
14 Gade ʋɔ bɛ, Eliasafe, Deyuwɛle ná-doun zunui,
15 Nɛfɛtali ʋɔ bɛ, Ayila, Enan ná-doun zunui.»
16 Naati ka ti ɠɛni ga nuɓusɛiti gaazuʋɛti, ti ti lolini. Ti ɠɛni ga ta-wolodamaiti ta-lotuɠɔiti. Tiya ɠa ti ɠɛni ɓalaa ga Izilayɛle ɠɔɔɓɔgi ma ɠundiɠiiti.
17 Moize ta Aalɔn ti zunui niiti kpɔni ɓɔɠɔ ʋa, niiti ziimazeɠegi ɠɛni ga tiye ga ti-laaseigiti. 18 Ti nuɓusɛiti pɛ gaalɛɛni ba, alugi velesiɛi ma volo mɔungi ma. Ti Izilayɛle nuiti kpein gaaluni, eɠɛʋelei ta-wolodamaiti ti la, ta ta-ʋɛlɛyeɠeiti. Ti zunuiti daaseigiti sɛʋɛni ga gilagila, é zo kona ʋuufelegɔ (20) ma, é lɛ zeemaazu, 19 eɠɛʋelei Ɠɔoɠɔ GALAGI ma levei veeni la Moize ya. Zekana Moize ta-ɠaalugi woni da Sinayi teʋebai zu.
20 Luɓɛn, Izilayɛle ná-doun zunu mɔungi, mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 21 Luɓɛn ná-bolodai zu nii gaaluni, naa ɠɛni ga zunu waaʋuunaani maazu lɔzita undɔɔlugɔ (46.500).
22 Simiyɔn mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 23 Simiyɔn ná-bolodai zu nii gaaluni, naa ɠɛni ga zunu waaʋuulɔɔlu maazu taaʋuu unsaʋagɔ (59.300).
24 Gade mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 25 Gade ná-bolodai zu nii gaaluni, naa ɠɛni ga zunu waaʋuunaani maazu lɔɔlu undɔzita puulɔɔlu (45.650).
26 Zuda mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 27 Zuda ná-bolodai zu nii gaaluni, naa ɠɛni ga zunu waaʋuulɔfela maazu naani undɔzita (74.600).
28 Isakaal mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 29 Isakaal ná-bolodai zu nii gaaluni, naa ɠɛni ga zunu waaʋuulɔɔlu maazu naani unnaani (54.400).
30 Zaɓulɔn mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 31 Zaɓulɔn ná-bolodai zu nii gaaluni, naa ɠɛni ga zunu waaʋuulɔɔlu maazu lɔfela unnaani (57.400).
32 Zozɛfe ná-doun zunui Efelayime mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 33 Efelayime ná-bolodai zu nii gaaluni, naa ɠɛni ga zunu waaʋuunaani undɔɔlu (40.500).
34 Manasé mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 35 Manasé ná-bolodai zu nii gaaluni, naa ɠɛni ga zunu waaʋuusaʋa maazu fele unfelegɔ (32.200).
36 Ɓɛnzamɛn mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 37 Ɓɛnzamɛn ná-bolodai zu nii gaaluni, naa ɠɛni ga zunu waaʋuusaʋa maazu lɔɔlu unnaanigɔ (35.400).
38 Dan mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 39 Dan ná-bolodai zu nii gaaluni, naa ɠɛni ga zunu waaʋuulɔzita maazu fele undɔfela (62.700).
40 Asɛɛl mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 41 Asɛɛl ná-bolodai zu nii gaaluni, naa ɠɛni ga zunu waaʋuunaani maazu ɠila undɔɔlugɔ (41.500).
42 Nɛfɛtali mavofodaiti tetemazu, ti zunuiti gaaluni ga gilagila, eɠɛʋelei ta-wolodamaiti ti la, ta ta-ʋɛlɛyeɠeiti, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ. 43 Nɛfɛtali ná-bolodai zu nii gaaluni, naa ɠɛni ga zunu waaʋuulɔɔlu maazu saʋa unnaanigɔ (53.400).
44 Naati tiegɔi ɠa Moizeni ta Aalɔn ti gaaluni. Zunu puugɔ maazu felegɔiti (12) niiti ti ɠɛni ga Izilayɛle woloda ɠundiɠiiti, naati ti ɓɔni ti ʋa. 45 Izilayɛle nuiti saama, niiti kpein ti ti ɠaaluni, eɠɛʋelei ta-ʋɛlɛyeɠeiti ti la, é zo kona ʋuufelegɔ (20) ma, é lɛ zeemaazu, niiti kpein ta la zoo ti li kɔɔmaʋɛ, 46 ti ɠɛni ga zunu waaundɔzita zunu waasaʋagɔ undɔɔlu puulɔɔlu (603.550).
Levi nuiti ta-vai
47 Levi nuiti ta-wolodai zu, ti-ɠɛɛ ʋɛlɛyeɠeiti bu, ti ɠaa la ɠɛni luni ti zaama. 48 Ɠɔoɠɔ GALAGI ɓɔɛni Moize ʋɔ, é ɠɛ ma: 49 «Mina Levi nuiti ta-wolodamaiti gaalu, mina ti ɠaalu Izilayɛle nuiti saama ɲɛgɛlɛin. 50 Seɠe ʋɛlɛ ɲadegai, nii zeele woo ɠesui bu, naa ma wotii ve Levi nuiti zea, ta ma zɔɔlaiti kpein, ta nii kpein é ga naama vai. Ta seɠe ʋɛlɛi zeɠe, ta ná-sɔɔlaiti kpein, ti ná-botii ɠɛ, ti ʋu seɠe ʋɛlɛ ɲadegai maaɠoolii zu. 51 Siɛgi zu seɠe ʋɛlɛ ɲadegai a ɠɛna zeɠea la losuʋɛ, é ʋa li ada ɠili, Levi nuiti ta kulakula ba, ti to ʋolu ga niinɛ, ʋɛ ta ɠɛ zeizu ná. Zɔi nɔpɛ a maaɓuɠana ná ʋa, nii é la ga Levi ná-bolodai zu nui ta, ta naama nui ʋaa. 52 Izilayɛle nuiti ta ʋu ti-ʋuuzuʋɛ ti ɠilagilagi, ná-bolodai ná-poogi ɠobaʋɛ. 53 Kɛlɛ Levi nuiti ta ʋu seɠe ʋɛlɛ ɲadegai maaɠoolii zu, nii zeele woo ɠesui bu, naa ɠa a kɛ nà-ziiɠaawanai mina vuka Izilayɛle ʋɛbɛi ma. Levi nuiti ta ɠɛ seɠe ʋɛlɛ ɲadegai makɛsu.»
54 Izilayɛle nuiti ti ɠoloni, ti deveiti kpein so, niiti Ɠɔoɠɔ GALAGI ti veeni Moize ya.