1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Aalɔn ʋɔ, è ɠɛ ma: Siɛgi zu è fitina lɔfelaiti seizu la ti-zeizuʋɛti, ɗa ti zei ga pagɔ, nii a kɛ ti-ma zezei ɗa ɠula fitina zei anii ɠakala, ʋelela ʋelei.»

3 Aalɔn kɛɛni ɠana. É fitinaiti seini, fitina zei anii ɠa ʋelela ʋelei, eɠɛʋelei Ɠɔoɠɔ GALAGI ma levei veeni la Moize ya. 4 Pɛtɛ ʋelei fitina zei anii ɓɛtɛni la, é ɠɛni ga zanu doɠai, é zo kɔɠɔi ma, é lɛ ma wulu ʋuaiti pɔ. Ti fitina zei anii ɓɛtɛni, é zoloo naama ɠazaʋigi ma, nii Ɠɔoɠɔ GALAGI dɛɛni ga Moize.

5 Ɠɔoɠɔ GALAGI ɓɔɛni Moize ʋɔ, é ɠɛ ma: 6 «Levi nuiti seɠe Izilayɛle nuiti saama, è ti ɲade. 7 Wɛlɛ ʋelegi ɗa ti ɲade da. Ɗa ziɛi vaza ti ma, nii é ga ɲade ɗɛi, ti kpekai zeɠe, ti ti-ɓusɛi maaʋɛ pɛ bo da, ti ta-zeɠeiti gba. Tɔgi letemazu ti ɲadegai ɠana. 8 Ta nikɛ zinɛ ɓokpa gila seɠe, é ʋɛɛ vebɛ zalaɠai ʋa, nii soloogai ma, naa ɠa é ga ɓulu vukɔ ʋagɔi, gaayɔgai ga gulɔi. Ɗɔun ɗa nikɛ zinɛ ɓokpagi velesiɛi zeɠe, é ɠɛ ga koto gba zalaɠai. 9 Ɗa li ga Levi nuiti GALA daaɠomi seɠe ʋɛlɛi laaʋɛ, è Izilayɛle nuɓusɛiti kpein toli. 10 Ɗa Levi nuiti maaɓuɠa Ɠɔoɠɔ GALAGI ʋa, Izilayɛle nuiti ti yeei la ti ma. 11 Aalɔn ɠa Levi nuiti fe nɔ̀un bɛ, Ɠɔoɠɔ GALAGI, Izilayɛle nuiti bɛ, ta lɔ niina nà-botii zu. 12 Levi nuiti ta yeei ʋɛɛ nikɛ zinɛ felegɔiti unmaʋɛ. Ɗa ti ɠula ga zalaɠai, gilagi ɠɛ ga koto gba zalaɠai, zɔi ɠɛ ga gala zalaɠai Ɠɔoɠɔ GALAGI ʋɛ, naa ɠa a kɛ koto gba zalaɠai ɠula Levi nuiti bɛ, eɠɛʋelei tɔgi la. 13 Ɗa Levi nuiti to Aalɔn ta ná-doun zunuiti kakala, è ti ve Ɠɔoɠɔ GALAGI ʋɛ. 14 Pele ɠana, ɗa Levi nuiti sei la yɛ, Izilayɛle nuiti saama, ta ɠɛ ga nɔ̀nɔiti. 15 É zo názu ma niina, ta lɔ botii zu, ti ɗa kɛ GALA daaɠomi seɠe ʋɛlɛi wu.

«Maanɛɛʋɛ è Levi nuiti ɲade, è ti ve bɛ̀ ɠana. 16 Mazɔlɔɔ ti veeʋɛ bɛ̀ ɲɛgɛlɛin Izilayɛle nuiti saama, ga Izilayɛle nuiti ti-loun zunu mɔungiti potogi. Gè Levi nuiti seɠeʋɛ ga nɔ̀nɔiti. 17 Mazɔlɔɔ doun zunu mɔungi kpein ka ga nɔ̀nɔ, Izilayɛle nuiti saama, nuiti ti-lointi, ta suaiti ti-ma yiʋoiti. Voloi gè doun zunu mɔungiti paani la Ezipete yooi zu, naama yeei ɠa gè ti makɛni la ɓɔɠɔ ʋɛ. 18 Gè Levi nuiti seɠeʋɛ, ga Izilayɛle nuiti ti-loun zunu mɔungiti potogi. 19 Gè ti veeʋɛ Aalɔn ta ná-doun zunuiti bɛ Izilayɛle nuiti saama, ga ti Izilayɛle nuiti ta-wotii ɠɛ GALA daaɠomi seɠe ʋɛlɛi wu, ta botii ɠɛ ti ya, koto gba vai zu. Naazu faa ɲɔu la ɠɛa ga Izilayɛle nuiti, mazɔlɔɔ ti la maaɓuɠazu seizu ɲadegai ʋa.»

20 Moize ta Aalɔn, ta Izilayɛle nu ʋɛbɛi kpein, ti naa ɠɛɛni Levi nuiti ta-vaa zu, nii kpein Ɠɔoɠɔ GALAGI ma levei veeni Moize ya, é ʋilɛ ti ʋa. 21 Levi nuiti ti ɓɔɠɔ ɲadeni, ti ta-zeɠeiti gba. Aalɔn ti veeni Ɠɔoɠɔ GALAGI ʋɛ, é tɔgi ma ɲade fai laazeeli koto gba vai zu ti ʋɛ, nii a kɛ ti ɲade. 22 Naa ʋoluma, Levi nuiti ti lɔɔni botii zu, GALA daaɠomi seɠe ʋɛlɛi wu, Aalɔn ta ná-doun zunuiti zeezu. Ti kɛɛni ta-vaa zu, eɠɛʋelei nɔ Ɠɔoɠɔ GALAGI ma levei veeni la Moize ya.

23 Ɠɔoɠɔ GALAGI ɓɔɛni mɔnɔ Moize ʋɔ, é ɠɛ ma: 24 «Levi nuiti ti kona ʋuufelegɔ maazu lɔɔlugɔi (25) zɔlɔɔgai, eyɛsu é lɛ zeemaazu, ta lɔ botii zu, ti ɗa kɛ GALA daaɠomi seɠe ʋɛlɛi wu. 25 Zɔi a kona ʋuulɔɔlugɔ (50) zɔlɔɔna, naa ná-botii ɠa ɠwɛ niina, é la mɔ botii ɠɛa. 26 Toɠa zoo é ɗa ɓɔ kɛɛɠɛleaiti ba GALA daaɠomi seɠe ʋɛlɛi wu, naati ta-wotiiti su, kɛlɛ tɔ ɓɔɠɔi la mɔ botii ɠɛa. Pele ɠana ɗa Levi nuiti ta-boti vaiti so da.»